(අංජුල මහික වීරරත්න)

වී අලෙවි මණ්ඩලය සතු ව ඇති වී තොග වලින් මසකට සහල් මෙට්‍රික් ටොන් දස දහසක් වෙළඳපලට නිකුත් කරන ලෙස කෘෂිකර්ම අමාත්‍ය මහින්ද අමරවීර මහතා වී අලෙවි මණ්ඩලයට අද (16) උපදෙස් දුන්නේය.

වී අලෙවි මණ්ඩලය විසින් පසුගිය සතියේ සහල් මෙට්‍රික් ටොන්  1500ක් වෙළඳපොළට සපයා ඇති අතර, දැනට වෙළඳපොළේ දක්නට ලැබෙන සහල් හිඟය සහ මිල ඉහළ යාම පාලනය කිරීම සඳහා මාසිකව සහල් මෙට්‍රික් ටොන් 10,000 බැගින් නිකුත් කිරීමට තීරණය වූ බව කෘෂිකර්ම අමාත්‍යවරයා සඳහන් කරයි.

 එමෙන්ම  වී අලෙවි මණ්ඩලය සතුව පවතින සම්බා වී තොග උපයෝගී කර ගනිමින් ‘PMB Rice’ නමින් කිලෝග්‍රෑම් 05 සහ කිලෝග්‍රෑම් 10 ප්‍රමාණයෙන් සහල් මලු වෙළඳපොළට  නිකුත් කරන ලෙස ද අමාත්‍යවරයා උපදෙස් දුන්නේය.

වී අලෙවි මණ්ඩලයේ සහල් නිකුත් කිරීම, මෙවර යල කන්නයේ වී අස්වනු මිලදී ගැනීම ආදී කරුණු සම්බන්ධව අද (16) දින විශේෂ සාකච්ඡාවක් කොළඹ වී අලෙවි මණ්ඩල ප්‍රධාන කාර්යාලයේදී පැවැත්වුණු අතර එහිදී අමාත්‍යවරයා මෙි උපදෙස් දුන්නේය.