(ශ්‍රීනාත් ප්‍රසන්න ජයසූරිය)

පොතුවිල් ඇති මුණේ කැලෑබද ප්‍රදේශයේ පිහිටි ගල් ලෙනක භාවනා කරමින්  සිටි පොතුවිල්  මුහුදු මහා විහාරයේ වැඩ වාසය කරන  හිමිනමකට හ්බලකින් පහර දී රුපියල් 57,000 මුදලක් සහ ජංගම දුරකථනයක් පැහැරගත් බව කියන  පුද්ගලයින් අට දෙදෙනෙකු  පොතුවිල් පොලිසියේ නිලධාරීන් කණ්ඩායමක් විසින් පෙරේදා සැකපිට අත්අඩංගුවට ගනු ලැබූහ.

අත්අඩංගුවට ගත් සැකකරුවන් අටදෙනාම පොතුවිල්  ප්‍රදේශයේ පදිංචි ධීවර රැකියාවේ නිරත වන අය බව ප්‍රදේශයේ උසස් පොලිස් නිලධාරියෙක් ලංකාදීපයට පැවැසීය.

මෙම සැකකරුවන් අවුරුදු 34, 40 ,39, 34, 38, 43 ,සහ 56 හැවිරිදි වියේ පසු වන අය වෙති.

පොතුවිල්  මුහුදු  මහා විහාරයේ වැඩ වාසය කරන මෙම හිමියන් ගල්ලෙනේ භාවනානු යෝගීව සිටියදී පුද්ගලයින් කණ්ඩායමක් එම ගල්ලෙනට කඩාවැදී කබලකින් පහරදුන් අවස්ථාවේ ජීවිතය බේරා ගැනීම සඳහා එම හිමියන් දිවගොස් කොහොඹ ගසකට මුවා වී සැඟවසිට ඇතැයි පොලිසිය කියයි.

මේ අවස්ථාවේ පාර්ලිමේන්තු මන්ත්‍රීවරයකු  සහ පොතුවිල් ප්‍රාදේශීය සභාවේ හිටපු සභාපති වරයෙකු පැමිණි අවස්ථාවේ ඔවුන්ට ද මෙම සිද්ධිය දැනුම් දී එම හිමියන් විසින් මේ බව පොලිසියට පැමිණිලි කර ඇත.

පැහැර ගත්තේ යැයි  කියන ඡංගම දුරකථනය ගල් ලෙන ආසන්නයේ තිබී පොලිසිය විසින් පසුව සොයා ගනු ලැබීය.

ගල්ලෙන තුළ තිබූ රුපියල් පනස් හත් දහසක මුදලක් දපහර දුන් පුද්ගලයින් විසින් පැහැරගෙන ගොස් ඇති බව එම හිමියන් කළ පැමිණිල්ලේ සඳහන් වන්නේ යැයි කියති.

භාවනානු යෝගීව  වැඩ වාසය කරන එම හිමියන් කළ පැමිණිල්ල අනුව පරීක්ෂණ පවත්වා හෙළිවූ තොරතුරු මත මෙම සැකකරුවන් අටදෙනාඅත්අඩංගුවට ගන්නා ලදැයි පොලිසිය කියයි.

අත්අඩංගුවට ගත් සැකකරුවන් සම්බන්ධයෙන් තවදුරටත් පොලිසිය පරීක්ෂණ පවත්වාගෙන යයි.