(දයාරත්න ඇඹෝගම)

මිහින්තලේ,කුරුන්දන්කුලම ආසන්නයේ පිහිටි විහාරස්ථානයක පිටුපස පුරාවිද්‍යා රක්ෂිතයේ ඩෝසර් යොදා ගනිමින් පිරිසක් විසින් කැණිම කරන බවට ප්‍රදේශවාසිහු චෝදනා කරති.

මෙම රක්ෂිතයේ දේවානම්පියතිස්ස රජ සමයේ ඉදිකළ වෙහෙර විහාරවල නටඹුන් පවතින බවද ඔවුහු පවසති.

මෙම සිද්ධිය සම්බන්ධයෙන් ප්‍රදේශවාසින් පිරිසක් විසින් අනුරාධපුර නියෝජ්‍ය පොලිස්පතිවරයාටද පැමිණිලි කොට තිබේ.

මේ සම්බන්ධයෙන් අප පුරාවිද්‍යා දෙපාර්තමේන්තුවේ මිහින්තලේ පුරාවිද්‍යා කලාප භාර නිලධාරි මංජුල රත්නායක මහතා ගෙන් සිදුකළ විමසුමේදි ඒ මහතා මෙසේ පැවසිය.

ප්‍රදේශවාසින් විසින් සිදුකළ දැනුම් දිම මත එම ස්ථානය පරික්ෂා කළා.

කිසියම් පිරිසක් විසින් ඩෝසර් යන්ත්‍ර යොදා කැණිම් කර තිබෙන බව දක්නට ලැබුනා.

එම ස්ථානයේ ස්මාරක කිහිපයක්ම තිබෙනවා.පුරාවිද්‍යා දෙපාර්තමේන්තුවේ අවසරයක් නොලබා කිසිවෙකුටත් මෙම ස්ථානයට ඇතුල් වෙන්න බැහැ.කැණිම් කරන්නත් බැහැ.මේ සම්බන්ධයෙන් පුරාවිද්‍යා දෙපාර්තමේන්තුවේ අනුරාධපුර සහකාර අධ්‍යක්ෂකවරයාත් දැණුවත් කර තිබෙනවා.

මේ සම්බන්ධයෙන් පරික්ෂා කිරිම සදහා සහකාර අධ්‍යක්ෂකවරයා හෙට(26)දින පැමිණෙන බව දැණුම් දුන්නා.ඉන්පසුව මෙම කැණිම් කටයුතු කරන පිරිසට විරැද්ධව නීතිමය ක්‍රියාමාර්ගයක් ගන්නා බවද මංජුල රත්නායක මහතා මෙහිදි පැවසිය.