(විමුක්ති එස් රුද්‍රිගු)

යුක්රේනයට ආධාර කරන පුණ්‍යායතනයකට ඩොලර් 51ක් පරිත්‍යාග කිරීමට වරදකරු වූ ආධුනික නර්තන ශිල්පිනී ක්සෙනියා කරෙලිනා රුසියානු අධිකරණයක් විසින් වසර 12 ක සිර දඬුවමක් නියම කරනු ලැබුවේය.

කරෙලිනා ඇමෙරිකානු සහ රුසියානු ද්විත්ව පුරවැසිභාවය හිමි ආධුනික නර්තන ශිල්පිනියකි.

ඇය පසුගිය 2021 වසරේ සිට ඇමෙරිකාවේ පුරවැසිභාවය ලබා ගනිමින් ලොස් ඇන්ජලිස් නුවර ජීවත්වුවාය. මෙම වසරේ ජනවාරි මාසයේදී සිය පවුලේ සාමාජිකයන්ගේ සුවදුක් විමසීම සඳහා රුසියාවට පැමිණි අවස්ථාවේදී රුසියානු බලධාරීන් කරෙලිනාව අත් අඩංගුවට ගෙන ඇති අතර දේශද්‍රෝහීවීමේ චෝදනාව යටතේ ඇයට නඩු පවරා තිබිණි.

යුක්රේනයට ආධාර කරන පුණ්‍යායතනයකට මුදල් පරිත්‍යාග කිරීම රුසියාවට ද්‍රෝහිවීමක් බවත් පරිත්‍යාග කළ මුදලේ ප්‍රමාණය අදාළ නොවන බවත් නඩුව කැඳවූ අවස්ථවේදී පැමිණිල්ල මෙහෙයවූ නිලධාරීන් ප්‍රකාශ කර ඇත.

ඒ හේතුවෙන් කරෙලිනාට වසර 15 සිර දඬුවමක් ලබාදෙන ලෙසද පැමිණිල්ල මෙහෙයවූ නිලධාරීන් අධිකරණයෙන් ඉල්ලා තිබිණි.

නඩු විභාගය බාහිර පුද්ගලයන්ගේ සහභාගීත්වයකින් තොරව පවත්වා ඇති අතර එහිදී ක්සෙනියා කරෙලිනා වරද පිළිගෙන ඇති බවද පැවැසෙයි. වරද පිළිගැනීම හේතුවෙන් ඇයට වසර 12 සිර දඬුවමක් අධිකරණය ඇයට නියම කර තිබිණි.

කරෙලිනා රුසියාව යුක්රේනය ආක්‍රමණය කර දිනයේ ජංගම දුරකතනය භාවිත කරමින් ඇමෙරිකානු ඩොලර් 51.80 ක මුදලක් යුක්රේනය වෙනුවෙන් පරිත්‍යාග කර තිබිණි.