(සුජිත් හේවාජුලිගේ )

ආරක්ෂාව අවශ්‍ය නොවන යම් යම් පුද්ගලයන්ගේ  සහ ස්ථානවල  ආරක්ෂාව සඳහා යොදවා ඇති පොලිස් නිලධාරීන් ඒ පුද්ගලයන්ගෙන් සහ ස්ථානවලින් ඉවත් කර පොලිස් ස්ථානවලට වහාම අනුයුක්ත කරන ලෙස මහජන ආරක්ෂක අමාත්‍ය ටිරාන් අලස් මහතා පොලිස්පති චන්දන වික්‍රමරත්න මහතාට උපදෙස් දුන්නේය.

යම් යම්  පුද්ගලයන්ට  ආරක්ෂාව අවශ්‍යදැයි තක්සේරුවක්   කරන ලෙසටද අමාත්‍යවරයා ඉල්ලා සිටියේය.

ආරක්ෂාව අවශ්‍ය නොවන පුද්ගලයන්ට සහ ස්ථානවලට ආරක්ෂාව සැපයීම සඳහා පොලිස් නිලධාරීන් විශාල වශයෙන් ලබා දීම නිසා පොලිස් ස්ථානවල නිලධාරීන්ගේ හිඟයක් පවතින බව පාර්ලිමේන්තු මන්ත්‍රීවරු පෙන්වා දුන්හ.

මන්ත්‍රීවරුන් මෙසේ පෙන්වා දුන්නේ මහජන ආරක්ෂක කටයුතු පිළිබඳ අමාත්‍යාංශයීය උපදේශක කාරක සභා රැස්වීමේදීය.

මේ අතර වලංගු වීසා කාලය ඉක්මවා ඇති විදේශිකයන්ගෙන් වීසා ගාස්තු වලට අමතරව අතිවාස කාල සීමාව සඳහා අයකරනු ලබන ඇමරිකානු ඩොලර් 500 ක දඩ මුදල සංශෝධනය කිරීම සඳහා ආගමික හා විගාමික පනත යටතේ මහජන ආරක්ෂක අමාත්‍යවරයා සෑදූ  නියෝග වලට මහජන ආරක්ෂක කටයුතු පිළිබඳ අමාත්‍යාංශයීය උපදේශක කාරක සභාවේ අනුමැතිය   හිමිවිය.

මහජන ආරක්ෂක කටයුතු පිළිබඳ අමාත්‍යාංශයීය උපදේශක කාරක සභාව එහි සභාපති අමාත්‍ය  ටිරාන් අලස් මහතාගේ ප්‍රධානත්වයෙන් පාර්ලිමේන්තුවේදී  පසුගිය (25) වැනිදා
රැස්විය.

මේ අතර, මත්ද්‍රව්‍ය  වැටලීම්වලට සම්බන්ධ නිලධාරීන් අගය කිරීමට පියවර ගැනීමේ අවශ්‍යතාව මන්ත්‍රීවරු  කාරක සභාවේදී  පෙන්වා දුන්හ.  ඒ අනුව සෑම පොලිස් කලාපයකින්ම මත්ද්‍රව්‍ය වැටලීම්වලට අදාළ නිර්දේශ ලබා ගනිමින්  නිලධාරීන් අගය කිරීමට පියවර ගන්නා ලෙස අමාත්‍යවරයා උපදෙස් දුන්නේය.

මෙම කාරක සභා රැස්වීමට  රාජ්‍ය අමාත්‍ය ශාන්ත බණ්ඩාර, පාර්ලිමේන්තු මන්ත්‍රීවරුන්වන  දයාසිරි ජයසේකර,  අකිල එල්ලාවල,  මධුර විතානගේ, චන්දිම වීරක්කොඩි,  මහින්දානන්ද අලුත්ගමගේ,  අසංක නවරත්න,  තිසකුට්ටි ආරච්චි,  රාජිකා වික්‍රමසිංහ, ඉසුරු දොඩංගොඩ,  කුමාරසිරි රත්නායක,  වීරසුමන වීරසිංහ සහ සහන් ප්‍රදීප් විතාන යන මහත්ම මහත්මීහු සහභාගී වූහ.