( බී.ජී.චතුරංග)

හෙරොයින් මත්කුඩු තොගයක් සමඟ සැකකරුවන් දෙදෙනෙකු හා සැකකාරියක් මෝටර් රථයක් සමග අද (14) දහවල් අත්අඩංගුවට ගත් බව අනුරාධපුර කොට්ඨාශ දුෂණ මර්ධන ඒකකය පවසයි.

හෙරොයින් මත්කුඩු ග්‍රෑම් 147 මිලි ග්‍රැම් 800ක් සමග මෙම සැකකරුවන් අනුරාධපුර ශ්‍රාවස්තිපුර 'තුරුලිය සෙවන' අසලදී  පොලීසිය අත්අඩංගුවට ගෙන තිබේ.

එහි වටිනාකම ලක්ෂ 40 කට ආසන්න වටිනා කමකින් යුක්ත බව පොලීසිය කියයි.

අත්අඩංගුවට ගත් වයස අවුරුදු 38 වන කාන්තාව මෙම මත්ද්‍රව්‍ය  ජාවාරමේ ප්‍රධාන සැකකාරිය වන අතර, 28 හැවිරිදි සිය අනියම් සැමියා සමඟ මෝටර් රථයකින් කොළඹ සිට අනුරාධපුරයට කුඩු රැගෙන එමින් සිටින අතර තුර,ශ්‍රාවස්තිපුර  ප්‍රදේශයේ දී පදිංචි වයස අවුරුදු 23 ක ගැණුම්කරුවෙකු හට මත්කුඩු ලබා දීමට යාමේදී අත්අඩංගුවට පත් වූ බව පොලීසිය පවසයි. 

අත්අඩංගුවට  ගත් සැකකාරියගේ නීත්‍යානුකූල  සැමියාද මත්කුඩු ජාවාරමේ නිරත වන්නෙකු බවත්,  සැකකාරියගේ  අනියම් සැමියා  මීට පෙර  අනුරාධපුර  ලෝලුගස්වැව ප්‍රදේශයේ සිට පැමිණ  ඔහුගෙන් මත්කුඩු මිලදීගත්  අයකු බවත් පොලිසිය පවසයි .

පසුව මෙම ජාවාරම්කාරිය  නීත්‍යානුකූල සැමියාගෙන් වෙන්වී සැකකරු සමඟ  අනියම් සබඳතාවයක් පවත්වා ගනිමින් වත්තල හුණුපිටිය ප්‍රදේශයේ පදිංචිව සිටිමින්  කාලයක සිට  අනුරාධපුරයට මත් කුඩු බෙදා හැර ඇති බව පොලීසිය අනාවරණය කර ගෙන තිබේ.

මෙම සැකකරුවන්ට එරෙහිව මත්ද්‍රව්‍ය චෝදනා යටතේ මහාධිකරණයේ නඩු කිහිපයක්ම විභාග වන බවත් පොලිසිය පවසයි. සැකකරුවන් මත්කුඩු ප්‍රවාහනය  සඳහා යොදාගත් මෝටර් රථය බොරලැස්ගමුව ප්‍රදේශයේ පදිංචිකරුවෙකු ගෙන් දිනකට රුපියල් 2,500ක කුලී පදනම මත ලබාගත් ලබා ගත් එකක් බව සැකකරුවන්ගෙන් සැකකරුවන් ගෙන් සිදු කළ ප්‍රශ්න කිරීම්වල දී පොලීසිය අනාවරණය කරගෙන තිබේ.

ලැබුණු තොරතුරකට අනුව මෙම අත්අඩංගුවට  ගැනීම සිදුකර ඇති අතර  සැකකරුවන් අද(15)අධිකරණයට ඉදිරිපත් කිරීමට නියමිතව තිබුණි.

අනුරාධපුර කොට්ඨාස භාර ජ්‍යෙෂ්ඨ පොලිස් අධිකාරී කීර්ති  ලංකා ගීගනගේ මහතාගේ උපදෙස් මත අනුරාධපුර කොට්ඨාශ අපරාධ කාර්යංශයේ ස්ථානාධිපති බණ්ඩාර විජේකෝන් මහතාගේ  මෙහෙයවීමෙන්, අනුරාධපුර කොට්ඨාස දූෂණ මර්දන ඒකකයේ ස්ථානාධිපති පො.ප ආර්.එම්.ඒ.ඒ අලුත් ගෙදර  මහතා , පොලිස් සැරයන්වරුන් වන මංජුල (53403), වික්‍රමසිංහ (54904), ධනපාල(61500), පො.කො. මධුසංක(71531), සේනාරත්න(68493), විජේරත්න(66935), තිලකරත්න(36896), රියාල් (85752), කා.පො.කො.නිරංජලා (33285),පො.සැ.රි.ධනපාල (33826) යන නිලධාරීන් වැටලීම සිදු කර සැකකරුවන් අත්අඩංගුවට ගෙන තිබේ