(අංජුල මහික වීරරත්න)

මූල්‍ය දුෂ්කරතා ඇති මධ්‍ය ආදායම් ලබන රටවල් සඳහා සහාය වීමට විධිමත් සැලැස්මක් අවශ්‍ය බව ජනාධිපති රනිල් වික්‍රමසිංහ මහතා  අවධාරණය කළේය.

ජනාධිපතිවරයා මේ බව අවධාරණය කළේ නිව්යෝර්ක් නුවර එක්සත් ජාතීන්ගේ මූලස්ථානයේ පැවති සංවර්ධනය සඳහා මුල්‍යකරණය පිළිබඳ ඉහළ පෙළේ සංවාදයක ප්‍රධාන දේශනය සිදු කරමිනි.

“කිසිවෙකු අත් නොහැරෙන ලෝකයක් වෙනුවෙන් තිරසර සංවර්ධන ඉලක්ක සඳහා මුල්‍යකරණය” යන තේමාව යටතේ තිරසර සංවර්ධන ඉලක්ක පිළිබද 2023 සමුළුවට සමගාමීව මෙම සංවාදය පැවැත්විණි.

ණය හිමියන්ට සත්‍ය අපහසුතාවයන් පවතින බව පිළිගන්නා බව කී ජනාධිපතිවරයා  ඒ පිළිබඳ අවධානය යොමු කර කටයුතු කළ යුතු බවට යෝජනා කරන්නේ යැයිද  නමුත් අඩු ආදායම්ලාභී රටවල් සඳහා කඩිනම් සහන හිමිවිය යුතුයැයි ද සඳහන් කළේය.

 වහාම එම සහන ලබා නොදුන්නොත්,  ඉදිරිපත් කර ඇති අනෙකුත් සියලුම යෝජනාවලින් ඵලක් වන්නේ නැතැයි ද   වචනයෙන් සහයෝගය ලැබී ඇතත් එම වචන ක්‍රියාවට නංවන්නේ කවදාද කියා අහන බවද ජනාධිපතිවරයා මෙහිදී පැවසීය.