(පුෂ්පකුමාර මල්ලවආරච්චි ,කොච්චිකඩේ වාර්තාකරු සහ මීගමුව අධිකරණ ඩබ්ලිව් කීර්ති  )

දෙවසරකට  ඉහත පාස්කු ඉරිදා  සිදු වූ ත්‍රස්ත ප්‍රහාරයෙන් මරණයට පත්වූ 269 දෙනා වෙනුවෙන් සාධාරණය ඉටු කරන ලෙස ඉල්ලා පියතුමන්ලාගේ හා කන්‍යා සොහොයුරියන්ගේ සහභාගිත්වයෙන් පැවති පා ගමන  අද  (21)  පස්වරු 6ට පමණ කටුවපිටිය ශාන්ත සෙබස්තියන් දේවස්ථානය කරා ළඟා වූයේය.

පස්වරු 4ට පමණ මීගමුව මාරිස්ටෙලා විද්‍යාලය අසලින් මෙම පාගමන ආරම්භකරන ලද්දේ මැල්කම්  කාදිනල් රංජිත් අගරදගුරු තුමන්ගේ  ප්‍රධානත්වයෙනි.

මේ අවස්ථාවට දිවයිනේ සතර දෙස විසිරී පැතිරී සිටින දේවස්ථානයන්ගේ පියතුමන් ලාද රදගුරුවරුන් ද සමග දේශය සුරැකීමේ ව්‍යාපාරයේ ඇල්ලේ ගුණවංශ හිමියන් ප්‍රමුඛ බෞද්ධ භික්ෂූන් වහන්සේලා  පිරිසක් ද සහභාගීව සිටියහ .

දෙවසරකට ඉහත දී සිදු වූ මේ ප්‍රහාරයෙන් විපතට පත්වූවන් වෙනුවෙන් යුක්තිය සාධාරණය ඉෂ්ට කර වේදනාවට පත්ව සිටින අයට සැනසුම ලබා දිය යුතු බව මෙහිදී අදහස් දැක්වූ ඇල්ලේ ගුණවංශ හිමියෝ සඳහන් කළහ.

 එමෙන්ම මහා වෘක්ෂයක්  සේ කාදිනල් හිමියන් රැඳී සිටිමින් කළ සේවයද උන්වහන්සේගේ පැසසීමට ලක්විය . 

මැල්කම්  කාදිනල් රංජිත් අගරදගුරුතුමෝ පස්වරුවේදී  කටුවපිටිය සාන්ත සෙබස්තියන්  දේවස්ථානයට ත්‍රස්ත ප්‍රහාරයෙන් මිය ගිය ජනතාව වෙනුවෙන් ඉදි කර ඇති සිහිවටන ඵලකය ඉදිරියේ මල් කළඹක් තබා උපහාර  දැක්වූහ.

යුක්තිය සාධාරණය පතන අතර රටේ ආරක්ෂාව තහවුරු කරන ලෙස ඉල්ලමින් මෙම පා ගමනේ පිරිස ගමන් කළහ

ත්‍රස්ත ප්‍රහාරයෙන් මියගිය 269 දෙනා වෙනුවෙන් ඔවුන්ගේ ඡායාරූප ඒ අවස්ථාවට සහභාගිව සිටි පියතුමන්ලා සහ කන්‍යා සොහොයුරියන් වෙත බාර කිරීම සිදු වූ අතර ඉන් අනතුරුව  පාගමන කටුවපිටිය සාන්ත සෙබස්තියන් දේවස්ථානය කරා ගමන් ඇරඹිණි .

දෙපැයකටත් අධික කාලයක් තිස්සේ පා ගමන සාමකාමී අන්දමින් පැවැති අතර පොලිසිය ගුවන් හමුදාව මෙන්ම යුද හමුදාවද ප්‍රදේශයේ  ආරක්ෂාව  කර තිබිණි.