(සිතුම් චතුරංග)        

මුලතිව්, වෙල්ලමුල්ලි වයික්කාල් බටහිර ප්‍රදේශයේ ඉඩමක් තුළ තිබී කිලෝ 15 පමණ බර පීඩන බෝම්බ තුනක් සමඟ පුපුරණ ද්‍රව්‍ය විශාල ප්‍රමාණයක් අද (16) සොයාගත් බව මුලතිව් පොලිසිය කියයි.

සංවර්ධන කටයුත්තක් සඳහා වෙල්ලමුල්ලි වයික්කාල් ප්‍රදේශයේ පැරණි ඉඩමක් සකස් කිරීමේදී එල්.ටි.ටි.ඊ සංවිධානයේ භූගත බංකරයක් වැනි ස්ථානයක තිබී  මෙම පුපුරණ ද්‍රව්‍ය තොගය හමුවූ බව පොලිසිය පවසයි.

හමුවූ පුපුරණ ද්‍රව්‍ය අතර සීෆෝ කිලෝ පහක් , ක්ලේමෝ බෝම්බයක්, මිලිමීටර 80 මෝටාර් උණ්ඩ හතක්, ඩෙටනේටර 115 හා බෝම්බ පිපිරවීමට ගන්නා ෆියුස් විශාල ප්‍රමාණයක් හමුවී තිබේ.

පුපුරණ ද්‍රව්‍යට හමුවූ ස්ථානයේ තිබී සොයා ගත් ටි.එන්.ටි පුපුරණ ද්‍රව්‍යයට  පුරවන ලද කිලෝ 15 ක පීඩන බෝම්බ තුනක් එල්.ටි.ටි.ඊ සංවිධානය විසින් මෝටර් රථ හා පාලම් තුළ අටවා ආරක්ෂක අංශ වෙත ප්‍රහාර එල්ල කිරීම සඳහා එම සංවිධානය විසින් නිපදවූ විශේෂ බෝම්බ වර්ගයක් බවද පොලිසිය පවසයි.

හමුවූ බෝම්බ සම්බන්ධයෙන් මුලතිව් මහේස්ත්‍රාත් අධිකරණ නියෝග යටතේ පොලිස් විශේෂ කාර්ය බළකාය එක්ව තවදුරටත් පරීක්ෂා කිරීම් සිදුකිරීමට නියමිත ය.