(සුජිත් හේවාජුලිගේ සහ  අංජුල මහික වීරරත්න)

මැතිවරණ කොමිෂන් සභාව ඇතුළු අනෙකුත් ස්වාධීන කොමිෂන් සභා හතර සඳහා  නව සාමාජිකයන් ඉදිරි දින කිහිපයේදී පත්කර අවසන් කිරීමට ආණ්ඩුක්‍රම ව්‍යවස්ථාදායක සභාව බලාපොරොත්තුවෙන් සිටින බව පාර්ලිමේන්තු ආරංචි මාර්වලින් පැවසේ.

මේ සම්බන්ධයෙන් අවසාන තීරණය ගැනීම සඳහා ආණ්ඩුක්‍රම ව්‍යවස්ථාදායක සභාවේ විශේෂ රැස්වීමක් කතානායක මහින්ද යාපා අබේවර්ධන මහතාගේ ප්‍රධානත්වයෙන් පාර්ලිමේන්තු සංකීර්ණයේදී  හෙට ( 9) දහවල් 12.00 ට පැවැත්වීමට නියමිතය.

කොමිෂන් සභා පත් කිරීම සම්බන්ධයෙන් අප කතානායක මහින්ද යාපා අබේවර්ධන මහතාගෙන් කළ විමසුමකදී ඔහු පැවසුවේ මැතිවරණ කොමිෂන් සභාව ඇතුළු සෙසු කොමිෂන්  සභා පත් කිරීම ප්‍රමාද කිරීම නිශ්ඵල ක්‍රියාවක් බවයි.

එම කොමිෂන්  සභා හැකි ඉක්මනින් පත්කර අවසන් කිරීමට බලාපොරොත්තු වන බවද  හෙතෙම සඳහන් කළේය.

ස්වාධීන කොමිෂන්   සභා පහක් ආණ්ඩුක්‍රම ව්‍යවස්ථාදායක සභාව විසින් දැනටමත් පත් කරනු ලැබ ඇත.

පළාත් පාලන මැතිවරණය සඳහා නාමයෝජනා කැඳවා ඇති අවස්ථාවක මැතිවරණ කොමිෂන්  සභාවට  නව සාමාජිකයන් පත් කිරීම සුදුසු නොවන බව විපක්ෂ නායක සජිත් ප්‍රේමදාස මහතා ආන්ඩුක්‍රම  ව්‍යවස්ථාදායක සභා රැස්වීම්වලදී දිගින් දිගටම කරුණු පෙන්වා දී තිබිණ. එහෙත් මැතිවරණය කල් ගොස් ඇති අවස්ථාවක මැතිවරණ කොමිෂන් සභාව සඳහා නව සාමාජිකයන් පත් කිරීමට කිසිදු බාධාවක් ඇති නොවන බව කතානායකවරයා වැඩිදුරටත් පැවසීය.