(ජයන්ත සමරකෝන්)
 
වැලිකඩ බන්ධනාගාරයේ කාන්තා අංශයේ කළ හදිසි වැටලීමකදී ජංගම දුරකතන 17ක් ඇතුළු දුරකතන උපාංග තොගයක් සිය බාරයට ගත් බව බුද්ධි අංශය පවසයි.
 
කාන්තා අංශයේ මත්කුඩු සම්බන්ධයෙන් බන්ධනාගාර ගතකර සිටින කාන්තා රැඳවියන් වැඩි පිරිසක් රඳවා සිටින ‘වයි වාට්ටුවේ’ මෙම හදිසි සෝදිසි මෙහෙයුම සිදුකර ඇති අතර,  එහිදී සිර වාට්ටුවේ සිවිලිමේ හා බිත්තියේ සඟවා තිබී මෙම ජංගම දුරකතන 17, බැටරි 150ක්, සිම්පත් 7ක් ඇතුළු උපාංග තොගය සිය බාරයට ගත් බවද බුද්ධි අංශ සඳහන් කරයි.
 
වරින්වර වැටලීම් කළද, මෙපමණ ජංගම දුරකත තොගයක් බන්ධනගාරය තුළට රැගෙනවිත් ඇත්තේ කෙසේද යන්න වැටලීම් අංශවල දැඩි අවධානයට ලක්වී ඇතැයිද වාර්තා වේ.

මේ අතර, මීගමුව බන්ධනාගාරයේ විශේෂ ගණයේ රැඳවියන්ගේ සිර වාට්ටු දෙකකින් හා කාන්තා සිර වාට්ටුවකින් ජංගම දුරකතන 14ක්, සිම්පත් 15ක්, චාජර් 2ක් හා හෑන්ඩ් ෆ්‍රී 6ක් ඇතුළු ජංගම දුරකතන උපාංග තොගයක් බන්ධනාගාර බුද්ධි අංශ නිලධාරීන් කණ්ඩායමක් විසින් සිය බාරයට ගෙන ඇතැයි බන්ධනාගාර ආරංචි මාර්ග අනාවරණය කරයි.
 
බන්ධනාගාර බුද්ධි අංශ වෙත ලැබුණු තොරතුරකට අනුව මීගමුව බන්ධනාගාරයේ එල් හා අංක 2 දරණ, විශේෂ රැඳවියන්ගේ සිරවාට්ටු 2ක් හා කාන්තා අංශයේ සිරවාට්ටුවක් ද මෙහිදී දැඩි පරීක්ෂාවට ලක් කර ඇතැයි පැවසේ.
 
එහිදී විශේෂ ගණයේ රැඳවියන්ගේ වාට්ටු දෙකකින්, ජංගම දුරකතන 11ක්ද, කාන්තා සිර වාට්ටුවකින් ජංගම දුරකතන දෙකක්ද සිය බාරයට ගෙන ඇතැයි වාර්තා වේ.
 
පසුගිය දිනවල ඉමහත් ආන්දෝලනයට ලක් වූ විශේෂ ගණයේ සිරවාට්ටු දෙකකින් නැවතත් ජංගම දුරකතන ඇතුළු උපාංග හමුවීම පිළිබඳ බුද්ධි අංශවල දැඩි අවධානය යොමුවී තිබේ.

මේ හේතුවෙන්, කොළඹ බන්ධනාගාරවල ආරක්ෂාව හා පරීක්ෂාව සඳහා බන්ධනාගාර නිලධාරීන්ට අමතරව පොලිස් විශේෂ කාර්ය බලකාය යොදවනු ලැබූයේ ඉකුත් 24දීය.