(ඩයනා උදයංගනී)

හිටපු අමාත්‍යවරයකු වන මංගල සමරවීර මහතාගේ මියගොස් තෙමසක් සම්පූර්ණවීම නිමිත්තෙන් ඔහුගේ පවුලේ ඥාතීන් සහ හිතමිතුරන් එක්ව “මතක මංගල” නමින් ආගමික හා සමරු වැඩසටහන් මාලාවක් සංවිධානය කර තිබිණි.

මංගල සමරවීර මහතාගේ දේහයට අවසන් ගෞරව දැක්වීමට බොහෝ දෙනෙකුට නොහැකිවීම හේතුවෙන් ඔහුගේ භෂ්මාවශේෂ කොළඹ 08, බෞද්ධාලෝක මාවතේ පිහිටි ‘ද රෙස්ට්පෙක්ට්’ ජයරත්න මල් ශාලාවෙහි අද (25) පෙරවරු 10 සිට පස්වරු 6 දක්වා තැන්පත් කර ඇත.

ඒ අනුව ඔහුට අවසන් ගෞරව දැක්වීම සඳහා ඔහුගේ හිතවතුන් ඇතුළු විවිධ පිරිස් පැමිණි අතර හිටපු ජනාධිපතිනි චන්ද්‍රිකා බණ්ඩාරනායක කුමාරුංග මහත්මිය ද ඒ අතර විය.

මෙම භෂ්මාවශේෂ සීමිත වාහන සංඛ්‍යාවක් සහිත රිය පෙරහැරකින් හෙට (26) මාතරට රැගෙන ගොස් මංගල සමරවීර මහතාගේ මග පෙන්වීමෙන් ප්‍රතිසංස්කරණය කෙරුණු ‘නූපේ ඕලන්ද වෙළඳපොළ ශාලාවේ’ පස්වරු 2.00 සිට 4.00 දක්වා තැන්පත් කෙරෙන අතර අනතුරුව බෞද්ධ, හින්දු, ඉස්ලාම් සහ ක්‍රිස්තියානි ආගමික වතාවත් සිදුකර එම භෂ්මාවශේෂ මාතර සුසාන භූමියෙහි ඇති සමරවීර පවුලේ සොහොනෙහි තැන්පත් කෙරෙනු ඇත.

(ඡායාරූප: ශාන්ත රත්නායක)