ෙරංජන් කටුගම්පොළ

ගල්කිස්ස හෝටලයේ පබිලිස් සිල්වාගේ ‘හෙළ රටාවට ඉවුම් පිහුම්’ නමැති කෘතියේ කර්තෘවරයා ප්‍රවීණ සූපවේදී පබිලිස් සිල්වා මහතා බව ශ්‍රේෂ්ඨාධිකරණය තීන්දු කර ඇත.

ශ්‍රේෂ්ඨාධිකරණය මෙසේ තීන්දු කළේ සී/ස සරසවි ප්‍රකාශන සමාගම ගොනුකළ අභියාචන පෙත්සමට අවසර ලබාදෙමිනි.

මෙම කෘතියේ කර්තෘවරිය වශයෙන් ධර්මා සමරනායක මහත්මිය බවට ප්‍රකාශ කරමින් මහාධිකරණය ලබාදුන් තීන්දුව ඉවත දැමීමට නියෝග කළ ශ්‍රේෂ්ඨාධිකරණය ධර්මා සමරනායක මහත්මියට රුපියල් 25,000ක නඩු ගාස්තුවක් සී/ස සරසවි ප්‍රකාශන සමාගමට ගෙවන ලෙස ද නියෝග කළේය.

ඒ.එච්.එම්.ඩී. නවාස් සහ ප්‍රීති පද්මන් සූරසේන මහත්වරුන්ගේ එකඟත්වයෙන් ශ්‍රේෂ්ඨාධිකරණ විනිසුරු මෘර්දු ප්‍රනාන්දු මහත්මිය විසින් මෙම තීන්දුව ප්‍රකාශයට පත් කර ඇත.

අභියාචන පෙත්සමේ මෙසේද සඳහන් වේ.

ගල්කිස්ස හෝටලයේ පබිලිස් සිල්වාගේ ‘හෙළ රටාවට ඉවුම් පිහුම්’ නමැති කෘතිය සී/ස සරසවි ප්‍රකාශන සමාගම මගින් ප්‍රකාශයට පත් කෙරිණි. මෙම කෘතිය පළකර වසර ගණනකට පසුව හයවන මුද්‍රණයටත් පසුව 2008 වසරේදී එම කෘතියේ සංස්කාරක ධර්මා සමරනායක මහත්මිය මෙම කෘතියේ අයිතිය තමන් සතුවිය යුතු බවටත් තමන්ට මුළු කර්තෘ භාගය ගෙවිය යුතු බවටත් ඉල්ලා සී/ස සරසවි ප්‍රකාශන සමාගමට එරෙහිව වාණිජ මහාධිකරණයේ නඩුවක් පවරන ලදී.

මෙම නඩුව විභාගයට ගැනීමෙන් පසු නඩුවේ තීන්දුව සංස්කාරක ධර්මා සමරනායක මහත්මියට පක්‍ෂව ලැබුණු අතර ඒ අනුව කෘතිය මුද්‍රණය කිරීම වළකාලමින් අතුරු නියෝගයක් ද නිකුත් කෙරිණි.

මෙම නියෝගයෙන් අගතියට පත් සී/ස සරසවි ප්‍රකාශන සමාගම ඊට එරෙහිව ශ්‍රේෂ්ඨාධිකරණයට මෙම අභියාචන පෙත්සම ඉදිරිපත් කළේය.

ඉදිරිපත් වූ සාක්ෂි සහ කරුණු සැලකිල්ලට ගත් අධිකරණය, අදාළ කෘතියේ කර්තෘත්වය ධර්මා සමරනායක මහත්මියට පැවැරීම වැරැදි සහගත බවත් එහි කර්තෘවරයා පබිලිස් සිල්වා බවටත් තීන්දු කරන බව ද සඳහන් කළේය.

ඒ අනුව අභියාචනයට අවසර ලබාදුන් අතර මහාධිකරණ තීන්දුව බලරහිත කිරීමට නියෝග කළ ශ්‍රේෂ්ඨාධිකරණය, පැමිණිලිකාර වගඋත්තරකාරිය වන ධර්මා සමරනායක මහත්මියට නඩු ගාස්තු වශයෙන් රුපියල් 25,000ක මුදලක් ගෙවන ලෙස ද නියෝග කෙරිණි.

සී/ස සරසවි ප්‍රකාශන සමාගම වෙනුවෙන් නීතිඥ අසෝක සේරසිංහ මහතා පෙනී සිටියේය.

ධර්මා සමරනායක මහත්මිය වෙනුවෙන් නීතිඥ ඩී.කේ.වී. ජයනාත් මහතා සමඟ නීතිඥ කේ.ජී. ජිනසේන මහතා පෙනී සිටියේය.