(විනීතා එම් ගමගේ)
 
අපේක්ෂකයන්ට සම බිමක් නිර්මාණය නොවන්නේ වසර 39 ක් පැරණි මැතිවරණ පනත හේතුවෙන් යැයි මැතිවරණ  ප්‍රචණ්ඩ ක්‍රියා නිරික්ෂණ මධ්‍යස්ථානය කියයි.
 
මේ නිසා මෙකී පැරණි පනත වෙනස් කොට නව පනතක් ගෙන ඒමට පියවර ගැනීම මෙවර මැතිවරණයෙන් ජය ලබා පාර්ලිමේන්තුවට තේරි පත්වන ජනතා නියෝජිතයන්ගේ පළමු වගකීම වන්නේ යැයි මැතිවරණ ප්‍රචණ්ඩ ක්‍රියා නිරික්ෂණ මධ්‍යස්ථානයේ ජාතික සම්බන්ධීකාරක මංජුල ගජනායක මහතා ලංකාදීපයට පැවැසීය.
 
වසර 39 ක් පැරණි මෙම පනත තවමත් වෙනස් කර නැති අතර සෑම මැතිවරණයක දීම සිදුවූයේ අවශ්‍ය වෙනස්කම් චක්‍රලේඛ මගින් සිදුකිරීම බවත් එය පක්ෂවල සහය ලබමින් සිදුකළ බවත් කී ඔහු එසේ නොකර මෙතෙක් බිහිවූ කිසිදු පාර්ලිමේන්තුවක් මෙම පනත වෙනස් කර ගන්නට කටයුතු නොකලේ මන්දැයි ප්‍රශ්න කළේය.
 
මෙවර එසේ චක්‍රලේඛවලින් පනතට සංශෝධන ගෙන එන්නට මැතිවරණ කොමිෂන් සභාවේ සාමාජිකයන් දෙදෙනෙකු විරුද්ධ වීම නිසා නොහැකි වූ බවත් සභාපතිවරයා උත්සාහ කළ නමුත් කිසිවක් කර ගත නොහැකිවූ බවත් පෙන්වා දුන් ගජනායක මහතා පනතට සංශෝධන අවශ්‍ය නම් පාර්ලිමේන්තුව එය කරගන්නේ නැත්තේ මන්දැයි රත්නජීවන් හූල් මහතා නගන තර්කය සාධාරණ යැයි ද කීය.
 
පවතින පනත යටතේ අසමානකම් අපේකෂකයන්ට අසමානකම් සිදුවන බව පෙන්වා දුන් හෙතෙම අපේකෂකයන් අතරින් 150ත් 200  හිටපු පාර්ලිමේන්තු මන්ත්‍රීන් 225 දෙනාගෙන් 208 ක්ම මෙවරත් ඉදිරිපත් වන බවත්  ඔවුන් ද ප්‍රබල ප්‍රචාරණ ව්‍යාපාරයක් ගෙන යන බව ද පෙන්වා දුන්නේය.
 
සාධාරණ සම බිමක් නිර්මාණය නොවන බැවින් අපේක්ෂකයන් විවිධ නීති විරෝධී ක්‍රම භාවිතා කරන බව පෙන්වා දුන් ගජනායක මහතා නව පාර්ලිමේන්තුවේ මන්ත්‍රීන්ගේ ප්‍රථම කාර්යය විය යුත්තේ මේ පනත වෙනස් කරගැනීම යැයි ද පෙන්වා දුන්නේය.