(ජයන්ත සමරකෝන්)

“ගත වූ තුන් වසර තුළ ලෝක වෙළෙඳපොළේ තෙල් මිල පහත වැටීමෙන් රට තුළ ඉතිරි වූ ඇමරිකන් ඩොලර් බිලියන 1.5ක මුදල නිවැරදිව කළමනාකරණය කළා නම් හම්බන්තොට වරාය විකිණීමටත්, චීනයෙන් ණය ගැනීමටත්, ජාත්‍යන්තර මූල්‍ය අරමුදලේ කොන්දේසිවලට යටත්වීමටත් සිදුවන්නේ නැතැයි”, ඒකාබද්ධ විපක්‍ෂයේ පාර්ලිමේන්තු මන්ත්‍රී ආචාර්ය බන්දුල ගුණවර්ධන මහතා පැවසීය.

“එදා මුළු ලෝකයම තෙලෙන් බැදෙද්දී මහින්ද රාජපක්‍ෂ ආණ්ඩුව තෙල් මිල ස්ථාවරව පවත්වාගෙන යාමට ගත් උත්සාහයන් අවඥාවට ලක්කළ පිරිස් අද රට පාලනය කරමින් තෙල් මිල සූත්‍ර හඳුන්වාදීමට සැරසෙන බවද”, පුංචි බොරැල්ල, වජිරාශ්‍රම බෞද්ධ මධ්‍යස්ථානයේ පැවති ප්‍රවෘත්ති සාකච්ඡාවකදී මන්ත්‍රීවරයා කීය.

ඒකාබද්ධ විපක්‍ෂයේ ආර්ථික කළමනාකරණ ඒකකය විසින් මෙම ප්‍රවෘත්ති සාකච්ඡාව සංවිධානය කර තිබුණි.
එහිදී අදහස් දැක්වූ මන්ත්‍රීවරයා මෙසේද කීය.

“ආර්ථිකය ගිනිගෙන දැවෙන දුක්ඛිත යුගයක ලංකා ඉතිහාසයේ ප්‍රථමවතාවට ඇමරිකන් ඩොලරයකට අද රුපියල් 160.20ක් ගෙවන්නට සිදුවෙලා.

එදා මහින්ද රාජපක්‍ෂ රජය රට භාරදෙන විට ඩොලරය 131යි. රුපියල දරුණුතම කඩාවැටීමට ලක්වෙලා. ජනතාවට මේ නිසා සිදුවන මිල පීඩනය දරාගන්නට බැරිවෙලා.

එදා සියලුම පාරිභෝගික භාණ්ඩ හා ප්‍රාග්ධන භාණ්ඩවලට ඩොලරයට ගෙවූ රුපියල් 131 වෙනුවට අද වනවිට 160.20ක් ගෙවන්නට වෙලා.

මේ විදියට ගියොත් වසර අවසන් වීමට පෙර ඩොලරයට රුපියල් 165ක් ගෙවන්නට සිදුවන එක වළක්වන්නට බැහැ.
අද අපගේ අපනයන ආදායම ඇමරිකන් ඩොලර් බිලියන 11ක් වනවිට ආනයන වියදම ඇමරිකන් ඩොලර් බිලියන 21ක වෙළඳ පරතරයක්. ශූද්ධ විනිමය ඉතාමත් අඩුයි.

ආර්ථිකය නූල කැඩුණු සරුංගලයක් වාගේ ඔහේ පාවෙනවා. ආණ්ඩුවේ ආර්ථික ඔස්තාර්ලා ආර්ථිකය කළමනාකරණය කරගන්නට බැරිව විවිධ ව්‍යාජ ප්‍රකාශ කරනවා. ආර්ථිකය කඩා වැටෙන එක වසන් කරන්නට මධ්‍යම අධිවේගී මාර්ගයේ ඉදිකිරීම් සඳහා චීනයෙන් ලැබුණු ඇමරිකන් ඩොලර් බිලියන එක නිසා විදේශ සංචිතය වැඩිවෙන බව කියනවා.

මේ වාගේ හුදු ප්‍රකාශවලින් රටක ප්‍රශ්න විසඳන්නට බැහැ. අවුරුදු 3ක් තිස්සේ ආණ්ඩුව විනිමය කළමනාකරණය වරද්දාගෙන තිබෙනවා.

එදා 2012, 2013 සහ 2014, වසරවලදී ලෝක වෙළඳපළේ බොරතෙල් බැරලයක් ඇමරිකන් ඩොලර් 160ට ඉහළ ගියා.

2015, 16, 17 වසරවලදී තෙල් මිල එකට එකකින් කඩා වැටුණා. එනම් 2016 වසරේදී ඩොලර් 48ට පහත ගියා. 
මෙවැනි වාසියක් ඉතිහාසයේ කවදාවත් තිබිල නැහැ. ශ්‍රී ලංකා මහ බැංකුව, 2009 වසරේ සිට 2015 ඔක්තෝබර් දක්වා ලෝක තෙල්මිල අඩු වැඩි වීම ප්‍රස්ථාරයකින් පැහැදිලි කර තිබෙනවා. 2015 ඔක්තෝබර් වනවිට පහළම තැනකයි ලෝක තෙල් මිල තිබෙන්නේ.

එහි තෙල් බැරලයක අවම අගය ඇමරිකන් ඩොලර් 36.36යි. මෙම කාලය තුළ රටේ ඉතිරිවූ විදේශ විනිමය ප්‍රමාණය ඇමරිකන් ඩොලර් බිලියන 5.1යි.

මෙම මුදල නිවැරැදිව කළමනාකරණය කළා නම් හම්බන්තොට වරාය විකුණලා බිලියන 1.4, මධ්‍යම අධිවේගයේ ඉදිකිරීම් සඳහා චීනයෙන් බිලියන 1ක ණයක්, හා අයි.එම්.එෆ්. එකෙන් බිලියන 1.5ක ණයක්  ගන්නට කොන්දේසිවලට යටත්වන්නට සිදු වන්නේ නැහැ.

මේකෙන් පෙනෙන්නේ ආණ්ඩුවේ ආර්ථික කළමනාකරණයේ දැවැන්ත නොහැකියාවයි.

මහින්ද යුගයේ තෙල් සංස්ථාව 2011 දී රුපියල් බිලියන 94.5කි. 2012 දී රුපියල් බිලියන 89.7ක්, 2013 දී රුපියල් බිලියන 7.9ක් 2014 දී රුපියල් බිලියන 19ක් ලාභ ලබා තිබෙනවා.

එය 2015 දී රුපියල් බිලියන 18.4යි. 2016දී රුපියල් බිලියන 69.6යි. 2017 දී රුපියල් බිලියන 5.1ක ලාභයක් වශයෙන් පෙන්නුම් කරලා.

2016 වසරේදී රුපියල් බිලියන 69.6ක ලාභයක් ලැබූ සංස්ථාවේ එම ලාභය 2017 වසරේදී රුපියල් බිලියන 5.1ට අඩු වීම බරපතළ ප්‍රශ්නයක්.

මේකට ආණ්ඩුවෙන් උත්තරයක් අවශ්‍යයි. 

අද ලෝක වෙළෙඳපළේ භූමිතෙල් මිල අඩුවෙලා. ලංකාවේ භූමිතෙල් මිල වැඩිකරලා කුප්පිලාම්පු දල්වාගෙන ජීවත්වන දුප්පතාට මේ ආණ්ඩුව එළව එළවා පහර දෙනවා.

එදා භූමිතෙල් මිල තිබූ මිලටම සහනාධාරයක් ලෙස ලබා දෙන ලෙසට මහින්ද ප්‍රමුඛ ඒකාබද්ධ විපක්‍ෂය ආණ්ඩුවෙන් ඉල්ලනවා.

තැනිනම් දුප්පතාට මේ මිල පීඩනය දරාගන්නට බැරි වෙයි.
අයි.එම්.එෆ්. එක මිල සූත්‍රයක් හඳුන්වා දෙන්නට කියා බලකරනවා. නැත්නම් 5 වැනි ණය වාරිකය ලැබෙන්නේ නැහැ.

මහින්ද යුගයට වඩා 2017දී මිල අඩුවීමේ දැවැන්ත වාසියක්, රටට ලැබී තිබියදීත් එය ජනතාවට ලබා දී නැහැ. 
මහින්ද පාලන යුගයේදී සප්ත මහා අභියෝගවලින් එකක් වූ ලෝක තෙල් මිල අසාමාන්‍ය ලෙස ඉහළ යනවිට ගත් ක්‍රියාමාර්ග එකක්වත් ගන්නට මේ ආණ්ඩුව අද අපොහොසත් වෙලා. ආර්ථික කළමනාකරණය පිළිබඳ තීන්දු-තීරණ ගැනීමේදී දේශපාලන ප්‍රයෝග යොදාගැනීම බරපතළ වරදක්. ලෝක තෙල් මිළ ඉහළ යනවිට ඉහළ දැමීමටත්, පහළ යනවිට පහළ දැමීමටත් ආණ්ඩුවක් මොකටදැයි ප්‍රශ්න කළ වත්මන් පාලකයින්ට එදා කී දේ අද අමතක වීම ගැන අපි පුදුමු වන්නේ නැහැ. මේ පිළිබඳව ඕනෑම අයෙකු සමඟ විවෘත සංවාදයකට වුවද සූදානම්.”

ශ්‍රී ලංකා පොදුජන පෙරමුණේ සභාපති හිටපු අමාත්‍ය මහාචාර්ය ජී.එල්. පීරිස් මහතා අදහස් දක්වමින් මෙසේ කීය.
“භූමිතෙල් මිල අද සියයට තුන්සියයකින් වැඩි කරලා. ධීවර ප්‍රජාවගේ ජන ජීවිත මුළුමනින්ම කඩා වැටිලා. මුහුදු යාම නතර කරලා.

මාළු මාර්කට් වහලා. කළුකොඩි දාලා, අලුත් ධීවර ඇමැති කියනවා කැබිනට් නෝට් එකක් දැම්මාලු. 18දා පටන් භූමිතෙල් සහනාධාරය දෙනවාලු.

කාවින්ද ජයවර්ධන මන්ත්‍රීවරයා කියනවා ආණ්ඩුවෙන් වරදක් සිදු වෙලාලු.

මෙහෙම ආණ්ඩුවක් ගෙනියන්නට පුළුවන්ද? ධීවර ජනතාව මරණ මංචකයේ ඉදිද්දී ඔක්සිජන් දෙන්නට හදනවා.
මේවා වැඩි කරන්නට පෙර ප්‍රායෝගික ක්‍රමවේදයක් සකස් කළ යුතුව තිබුණා.
වතුකරයේ ජනතාවට ගොවි ජනතාවට මේකෙන් මරු පහරක් වැදිලා.

අති දූෂිත රජයකට තව තවත් දූෂණය වැඩි කරන්නට මේකෙන් අවස්ථාව ලැබිලා.
මේකත් හරියට ග්ලයිෆොසේට් විසඳුම වගෙයි.
මේ සියලුම ප්‍රශ්නවලට මුල දූෂණය අන්තයට යාමයි.

අයෝජකයින්ගෙන් කප්පම් ගන්නා රටක් මේක. ඔවුන්ට නිදහසේ ජීවත්වෙන්නට බැරි රටක් මේක. කන්තලේ සීනි සමාගමේ ආයෝජකයාගෙන් ජනාධිපතිගේ ප්‍රධාන නිලධාරියෙක් අල්ලස් ගැනීමේ සිද්ධිය පැමිණිලි කළාම ඔහුට මරණ තර්ජන එනවා.

එවැනි රටකට ආයෝජකයින් එයිද? 

මේ තර්ජන කර තිබෙන්නේ එල්ටීටීඊ එකෙන් බවටයි වාර්තා වන්නේ.

අද නීතිය කඩා වැටිලා. පසුගිය අප්‍රේල් මාසයේ පමණක් මිනීමැරුම් 37යි. දවසකට එක බැගින් මිනීමැරුම් සිදුවන රටක් බවට පත් වෙලා.

එදා දෙනවා කිව්ව යහපාලනය අ කෝ, ඒ වෙනුවට අල්ලස, දූෂණය රජ කරනවා. පැමිණිලි කළොත් මරණ තර්ජන.
මහ දවාලේ ප්‍රසිද්ධියේ මිනීමරණ යුගයක් අද උදාවෙලා. 2015 ජනවාරි 8 ආරම්භ වූ වෙනස ඒකයි.

අගමැතිවරයා පමණක් පසුගිය කාලය තුළ ප්‍රතිපත්ති ප්‍රකාශ 8ක් ඉදිරිපත් කරලා. ඒවා රාජාසන කතාව වගෙයි. ඒ වුණාට එකක්වත් ක්‍රියාත්මක වී නැහැ.

මේ ආණ්ඩුව නාඩගම් මඩුවක් වගෙයි. 
ජනතා පීඩනය පුපුරා යන්නට ආසන්නයි.

අවුරුදු 20ක් මැලේසියාව පාලනය කළ මහතීර් මහමුද් අවුරුදු 92දී නැවතත් අගමැති ධුරයට පත්කරලා මැලේසියාවේ දූෂිත පාලකයින් පන්නා දැමූ ජනතාව වගේ ශ්‍රී ලංකාවේත් ඒ දේම සිදුවෙනවා.

මහින්ද රාජපක්‍ෂ හැර මේ රට ගොඩගන්නට වෙනත් නායකයෙක් බිහි වෙලා නැහැ. මහින්දගේ නායකත්වය නැවතත් රටම ඉල්ලා සිටින යුගයක් මේක.

අපි ඡන්දයක් ඉල්ලා සිටින්නේ මේ යථාර්ථය නිසයි. ඡන්දයකින් තොරව ආණ්ඩුවක් වෙනස් කරන්නට බැහැ. ආණ්ඩුව ඡන්ද කල්දාන්නෙත් ඒකයි ” යැයිද ඔහු කීවේය.