(*** නිමල කොඩිතුවක්කු)  

බෞද්ධ ප්‍රතිපත්ති අනුගමනය කරමින් බුද්ධාගමට ප්‍රමුඛත්වය දෙමින් විනයානුකූල ඉලක්කගත, සොඳුරු රාජ්‍ය පාලනයක් වෙනුවෙන් කැප වන බව සමගි ජන බලවේගය නායක හිටපු විපක්ෂ නායක සජිත් ප්‍රේමදාස මහතා කොළඹදී පැවසීය.

සමගි ජන බලවේගය බිහි කරන රජයක් මගින් වෙහෙර විහාර ඉදි කරමින් භික්ෂූන් වහන්සේ රැකගනිමින් සම්බුද්ධ ශාසනයේ උන්නතිය උදෙසා දැවැන්ත ප්‍රායෝගික ජාතික වැඩපිළිවෙළක් කිරීමට කැප වන බවද සජිත් ප්‍රේමදාස මහතා සඳහන් කළේය.

බුදු දහම අනුව කටයුතු කරමින් සහ සෙසු ආගම්වලට ගරු කරමින් නාස්තිය, දූෂණය, වංචාව පිටුදකින, සැමට ප්‍රතිලාභ හිමි වන කාර්යක්ෂම රාජ්‍ය පාලනයක් ඉටු කිරීම තම අරමුණ බවද ඔහු පැවසීය.

සජිත් ප්‍රේමදාස මහතා මේ බව පැවසුවේ පිටකෝට්ටේ සෝලිස් උත්සව ශාලාවේ පැවැති මහා සඟ සමුළුවේ ප්‍රධාන ආරාධිතයා ලෙස එක්වෙමිනි.

වැඩිදුරටත් අදහස් දැක්වූ සමගි ජන බලවේගය නායක හිටපු විපක්ෂ නායක සජිත් ප්‍රේමදාස මහතා මෙසේද කීවේය.

රට තුළ බෞද්ධාගමට ආණ්ඩුක්‍රම ව්‍යවස්ථාවෙන් ප්‍රමුඛස්ථානය තිබෙනවා. ඒ අනුව සම්බුද්ධ ශාසනයේ චිරත්ථිතිය උදෙසා සියලු දෙනාම ඇප කැප වී සිටිනවා.

රටේ බුද්ධ ශාසන අමාත්‍යාංශය නිර්මාණය කරන්න මගේ පියා කටයුතු කළේ එතුමාට බෞද්ධාගම පිළිබඳ තිබූ ලැදියාව, ගෞරවය නිසයි. බුද්ධ ශාසන අමාත්‍යාංශය ස්ථාපනය කිරීමත් සමග බුද්ධ ශාසන අරමුදල නිර්මාණය කළා. රටේ සියලුම විහාරස්ථානවලට එකවර මූල්‍ය පරිත්‍යාගය කර ඒ විහාරස්ථාන නගාසිටුවීමට එමගින් කටයුතු කළා.

මූල්‍ය සම්පත් නැති වීම නිසා ගරාවැටුණු සිද්ධස්ථාන රට වටේ යන ගමනේදී බහුලව දකින්න ලැබෙනවා. වයඹ පළාතේ පමණක් බෞද්ධ සිද්ධස්ථාන හාරසියයක් පමණ වැසී ගොස් ඇති බව දැන ගන්න ලැබුණා.

ඉතාම උස් හඬින් දේශ හිතෛෂී භාවය දේශමාමකත්වය ගැන කතා කරන රටේ සමහරුන්ට මේ අඩුපාඩුව පෙනී නැහැ. ඒ අඩුපාඩුව දැක ‘සිසු දහම් සෙවණ’ දහම් පාසල් ව්‍යාපාරය මා නිර්මාණය කළා. 2019 වසරේ අලුතින් දහම් පාසල් ශාලා දහසක් රට පුරා ඉදි කිරීමට කටයුතු කළා. මේ වන විට ඒ වැඩසටහන සම්පූර්ණයෙන්ම නතර කරලා.

ආගමික සිද්ධස්ථාන සංවර්ධනය කිරීමේදී රාජ්‍ය ඉංජිනේරු සංස්ථාව ඇතුළු රාජ්‍ය ආයතන හරහා වැඩකටයුතු කළා. මොනම ආකාරයකින්වත් වෙනත් වැඩකටයුතුවලට ආගමික සංස්කෘතික නොවන වැඩවලට මේ මුදල් වලින් එක රුපියලක් වත් වැය කර නැහැ.
ප්‍රායෝගික බෞද්ධයන් විදියට ඉදිරියටත් මගේ අරමුණ සංඝාවාස ගොඩ නගමින්, වෙහෙර විහාරස්ථාන ගොඩනගමින් ආගමික පුනරුදය ඇති කිරීමයි. සමගි ජන බලවේග රජය තුළින් ඒ ආකාරයෙන්ම ඉදිරියට ක්‍රියාත්මක කරන්න මා අපේක්ෂා කරනවා.

වසර තුනක් තුළ චෛත්‍ය 1125 ක් ඉදිකිරීමේ දැවැන්ත සැලසුම අපට තිබුණා. අවාසනාවකට නොවැම්බර් 16 වැනිදායින් පසුව අපට ඒ අවස්ථාව අහිමි වුණා. විහාරස්ථාන ආශ්‍රිතව වසරක් තුළ මා ආරම්භ කළ සංවර්ධන වැඩපිළිවෙළ මේ වන විට සම්පූර්ණයෙන්ම නතර වෙලා.
බුදුපුත් මාපිය කැපකරු ක්‍රමය මා ආරම්භ කළා. කුල දරුවන් සසුනට දායාද කරන පවුල්වලට නිවාස සංවර්ධන වැඩසටහන මා ක්‍රියාත්මක කළා. විශාල වැඩ කොටස මා සැලසුම් කර තිබුණා. නමුත් නොවැම්බර් 16 න් පසුව රාජ්‍ය බලය අහිමි වීමෙන් අප සැලසුම් කළ වැඩසටහන් ක්‍රියාත්මක වුණේ නැහැ.

එවක විපක්ෂය පහුගිය ජනාධිපතිවරණයේදී සහ ඊට පෙර එම්.සී.සී. ගිවිසුම ගැන පැහැදිලි ප්‍රකාශ කරනවා අප දැක්කා. එම්.සී.සී. ගිවිසුමෙන් රට ඇමෙරිකානු කොලනිය වෙනවා. රට දෙකට බෙදෙනවා. ශ්‍රී මහා බෝධීන් වහන්සේ වැඳ පුදා ගන්නත් ඇමෙරිකාවෙන් අවසර ගත යුතුයි වගේ ප්‍රකාශ එවක විපක්ෂය කළා.

මේ ගිවිසුමෙන් රට බේරා ගන්න භික්ෂූන් වහන්සේ නිදහස් චතුරඝ්‍ර ඉදිරිපිට මාරාන්තික උපවාසය කළා. ජනතා මතයට ගරු කරමින් එම්.සී.සී. ගිවිසුම අත්සන් නොකරන බවට මා ප්‍රකාශ කර තිබෙනවා. අප බලයට පත් වූ විගසම එම්.සි.සී. ගිවිසුම ඉරා දමනවා කියා මා ප්‍රතිඥා දෙනවා.

එදා ජනාධිපතිවරණයේදී එම්.සී.සී. ගිවිසුම සම්පූර්ණයෙන්ම බැහැර කරනවයි කියපු කණ්ඩායම බලයට පැමිණි වහාම එම්.සී.සී. ගිවිසුම හැත්තෑවයි, තිහයි සූත්‍රයට ලඝු කළා. මේ සූත්‍රය අප පිළිගන්නේ නැහැ. එම්.සී.සී. ගිවිසුම අහෝසි කරන්න රජය පැකිළෙන්නේ ඇයි?
උතුම් බෞද්ධ ප්‍රතිපත්ති අනුගමනය කරමින් බෞද්ධ ආගමට ප්‍රමුඛත්වය දී විනයානුකූල ඉලක්ක ගත සොඳුරු රාජ්‍ය පාලනය වෙනුවෙන් සමගි ජන බලවේගය කැප වෙනවා. සමගි ජන බලවේග රජය තුළ ඒ වැඩපිළිවෙළ ක්‍රියාත්මක කිරීමට මා කැප වෙනවා යැයි ද ඔහු එහිදී පැවසීය.

මෙම අවස්ථාව සඳහා මහා සංඝරත්නය, ජාතික හෙළ උරුමය මහ ලේකම් පාඨලී චම්පික රණවක, සමගි ජන බලවේගය ජාතික සංවිධායක තිස්ස අත්තනායක යන මහත්වරුන් ඇතුළු පිරිස එක්ව සිටියහ.