(*** අංජුල මහික වීරරත්න)

සමගි තරුණ බලවේගය සමග එකතු වන්නැයි තරුණ පරපුරට ආරාධනා කරන බව හිටපු පාර්ලිමේන්තු මන්ත්‍රී මයන්ත දිසානායක මහතා මාධ්‍ය හමුවේදී පැවසීය.

රට පුරා තරුණ පරපුර සමඟ එක්ව සමගි ජන බලවේගය සඳහා දැවැන්ත ශක්තියක් එක් කිරීමට කටයුතු කරන්නේ යැයිද මයන්ත දිසානායක මහතා සඳහන් කළේය.

ඇතුල්කෝට්ටේ සමගි ජන බලවේග කාර්යාලයේ පැවැති මාධ්‍ය හමුවේදී වැඩිදුරටත් අදහස් දැක් වූ මයන්ත දිසානායක මහතා මෙසේද කීවේය.

රටේ තාරුණ්‍යය වෙනුවෙන් සමගි තරුණ බලවේගය ගොඩ නගන්න අප බොහෝ කැප වී ක්‍රියා කළා. අප සමග එක්වන ලෙස තරුණ පරපුරට ආරාධනා කරනවා.

අවුරුදු හැත්තෑ හයක් වන මහින්ද රාජපක්ෂ අගමැතිවරයා ආණ්ඩුවේ ආයතන 85 කට වඩා පවරාගෙන සිටිනවා. මුදල් අමාත්‍යාංශය, සංස්කෘතික ආගමික ඇතුළු අමාත්‍යාංශ රාශියක්ද පවරාගෙන තිබෙනවා.

නව ව්‍යවස්ථාවක් ගෙන ඒම පිළිබඳවද පො​හොට්ටු ආණ්ඩුව කතා කරනවා. එය ඉතා භයානක තත්ත්වයක් ජනතාව එය තේරුම් ගත යුතුයි.
එක් පවුලකට පමණක් බලය දිය යුතුද? දේශපාලන ප්‍රජාතන්ත්‍රවාදය ආරක්ෂා කිරීමට හැකියාව ඇත්තේ සමගි ජන බලවේගයටයි. ජනතාව දුන් පණිවිඩය තේරුම් ගෙන රට පුරා අපේ සංවිධානය ව්‍යාප්ත කිරීමට කටයුතු කරනවා.

මෙහිදී මාධ්‍යවේදීන් ඇසූ ප්‍රශ්න සහ මයන්ත දිසානායක මහතා ඒවාට දුන් පිළිතුරු මෙසේය.

ප්‍රශ්නය: සමගි ජන බලවේගයේ පළාත් සභා මැතිවරණ සූදානම කෙබඳුද?
පිළිතුර: පුවත්පත් නිවේදනයක් හරහා ඉල්ලුම්පත් ප්‍රසිද්ධ කර සුදුසු අපේක්ෂකයන් තෝරා ගන්නවා. එක්සත් ජාතික පක්ෂයේ අර්බුදය සමග අප වටා විශාල පිරිසක් එක් වනු ඇතැයි කල්පනා කරනවා.
දේශපාලන පක්ෂයක් ලෙස ඕනෑම මැතිවරණයකට මුහුණ දෙන්න අප සූද‌ානම්.

ප්‍රශ්නය: පාර්ලිමේන්තු මැතිවරණයේ දී පරාජයට පත් වූ අපේක්ෂකයන්ට පළාත් සභා මැතිවරණයේ නාම යෝජනා දෙනවාද?
පිළිතුර: පක්ෂ නායකත්වය තීරණයකට පැමිණේවි. අප ප්‍රජාතන්ත්‍රවාදී දේශපාලන පක්ෂයක් සාකච්ඡා කර ඒ තීන්දුව ගන්න හැකියි.