මේ අහසට පොළොවෙන් 
නඟින්නේම එක දුමාරයයි...
උඹ ලෝකෙට කවුරු වුණත් 
මතක එක සුමානයයි...

මේ දිනවල කා අතරත් ජනප්‍රිය ඉහත ගීතයට හඬ මුසුකරන්නේ ‘සකුරා ලෙජන්ඩ්ස්’ හි නිත්‍ය ගායන ශිල්පියා වන, අසංක රණවීරය. ‘මිස්ටර් ලෙබ්බේ’ සහ ‘රොබී ජේ’ ලෙස ද ජනාදරයට පත්ව සිටින ඔහුට ජනප්‍රිය සංගීත අධ්‍යක්‍ෂවරයකු වන, අනුරාධ අබේසිංහ මුණ ගැසෙන්නේ එක්තරා ‘රියැලිටි’ වැඩසටහනකදීය. ඔහු විසින් සංගීතය මුසුකරනු ලැබ අලංකෘත කළ මේ ගීතයේ පද රචනය සිදුකරන ලද්දේ අත්තිඩියේ පුඤ්ඤරතන හිමියන් විසිනි. 

“නන්දා මාලිනී මහත්මියගේ ‘මලට රේණු සේ’ ගීතයද ඇතුළු ජනප්‍රිය ගීත රැසක සංගීත අධ්‍යක්‍ෂවරයා වුණේ සංගීතවේ දී අනුරාධ අබේසිංහ. ඔහු සංගීතවත් කළ ගීත රැසක්ම තිබෙනවා. ගාමිණී හේවාවිතාරණ මහතාගේ චිත්‍රපට ගීතයක් ගයන්නයි මට අනුරාධ මුලින්ම ආරාධනා කළේ. මම මේ ගැන කිසිවක්ම හරියට දැනගෙන හිටියෙ නෑ. කොහොම නමුත් මේ වෙද්දී ඒ ගීතය ගායනා කරලා ඉවරයි. චිත්‍රපටයත් ඉදිරියේ දී විකාශය වීමට නියමිතයි.

‘දුමාරේ’ නමැති පදවැලට හොඳ හඬක් මුසුකර ගැනීම පුඤ්ඤරතන හිමියන්ගේ අදහස වී තිබිණි. උන්වහන්සේ අවස්ථා කිහිපයකදීම සංගීත අධ්‍යක්‍ෂ අනුරාධ අබේසිංහ දැනුවත් කිරීමට ද කටයුතු කළ අතර, ‘රොබීජේ’ ගේ හඬ මාධූර්යය පිළිබඳව උන්වහන්සේට යම් හෝඩුවාවක් ලැබෙන්නේ ද ඔය අතරය. මෙකී ගීතය මෙරට සංගීත රසිකයන් අතර ‘උන්මාදයක්’ හෙවත් ‘පිස්සුවක්’ වනු ඇතැයි යන්න පුඤ්ඤරතන හිමියන්ගේ අදහස වී තිබිණි. ගීතය මිස්ටර් ලෙබ්බේගේ අතට පත්කරමින් උන්වහන්සේ කී පරිදිම අද වනවිට මෙකී ගීතය මෙරට සංගීත සයුර කැලඹූ ‘සුනාමියක්’ම වී හමාරය. 

“මේ වෙද්දී මට ලැබෙන රසික ප්‍රතිචාර නම් ඉහළම මටටමක තිබෙනවා. ලංකාවේ මෙතෙක් ‘ටික්ටොක්’ මාධ්‍ය තුළ වැඩිම ‘වීඩියෝ ක්ලිප්’ සංඛ්‍යාවක් නිර්මාණය වුණානම් ඒ ‘දුමාරේ’ සින්දුවට වෙන්නැති කියල මට හිතෙනවා.  ‘යූ ටියුබ්’ නාළිකාවලත් මේ වෙද්දී ගීතය ඉහළම තැනක තියෙනවා. මිලියන හතකට අධික පිරිසක් දැනටමත් ගීතය නරඹා තිබෙනවා. යුරෝපය ද ඇතුළු රටවල් කිහිපයකින් වගේම ලංකාවෙනුත් මේ වෙද්දී මට ප්‍රසංගවලට ඇරයුම් ලැබෙමින් තිබෙනවා.”

සාමාන්‍ය රසිකයන් ගීතය වටහා ගන්නා අයුරින්ම තමාද වටහාගන්නා බව ‘රොබී ජේ’ පවසයි. සමාජයේ සුලබ වදන් සහ ඇතැම් යෙදුම් ද ගීතයේ අන්තර්ගත අතර, මෙහි ගැඹුරු අදහසක් ඇති බැව් පුඤ්ඤරතන හිමියන් තමා හා පැවසූ බවද ඔහු පැවසීය. 

“හාමුදුරුවෝ කියපු විදියට මේ ගීතය තුළ ලොකු අදහසක් තියෙනවා. උන්වහන්සේට අවශ්‍ය වෙලා තියෙනවා මේකෙන් යම් ගැඹුරු අදහසක් සමාජගත කරන්න. උන්වහන්සේම තව නොබෝ දිනෙකින් මේ ගැන හරියටම යමක් කියාවි කියලත් මම විශ්වාස කරනවා.”

ගීතය ජනගත කරලීම අභියෝග රැසක් මධ්‍යයේ සිදුවූ බව කියන අසංක රණවීර එහිලා මුදල් ප්‍රශ්න මුල් තැනක් ගත් බවද කියයි. රූප රචනයට එක්වීමට නියමිතව සිටි ඇතැම් රංගන ශිල්පීන් ඉදිරිපත් මිල ගණන් අනුව තමන්ට මෙය සිහිනයක් පමණක්ම වීමට ඉඩ තිබුණු බව කී හෙතෙම එවන් පරිසරයක සිසිර ගීකියනගේ, කෂ්මි නවෝදා, අජිත් ආනන්ද සහ අජිත් ප්‍රදිප් ආදීන්ගේ දායකත්වය අමතක කරනු අසීරු බවද පවසයි. සඳරු ගමගේ ශබ්දාගාරයෙහි පටිගත කරන ලද ගීතයට ප්‍රවීණ ‘ලීඩ් ගිටාර්’ ශිල්පියකු වන, බුද්ධික පෙරේරාද දායක වූ අතර, මීගමුව ප්‍රාර්ථනා රූපලාවන්‍යාගාරයද මීට දායකත්වය සැපයීය. මීගමුව යාබද කටුක ග්‍රාමීය පරිසරයක් වන ‘මුන්නක්කරය’ ජනතාව මෙන්ම ප්‍රදේශයේ සංචාරක ව්‍යාපාරිකයන් කිහිප දෙනකුද මෙකී නිර්මාණය සාර්ථක කරගැනීමට තමන්ට සවියක් වූ බවද මේ කතාබහට විරාමය තබමින් ‘රොබී ජේ’ අප හා පැවසීය. 

අමිල දොළපිහිල්ල