“චිත්‍රපටය ඇතුළේ තියෙන්නේ දේශපාලනික කතාවක්, 
මොකද, රට වැටුනත් කුළුන කෙළින්නේ”

නෙළුම් කුළුන අධ්‍යක්ෂක 
ඉලංගෝ රාම්

ඉලංගෝ රාම්ගේ  අධ්‍යක්ෂණයෙන් සහ හිරණ්‍යා පෙරේරා ගේ නිෂ්පාදනයෙන් මේ දිනවල රිදී තිරය තුළ වෙනස්ම පෙරළියක් ඇති කරපු අලුත් රසයක්, සිනහවක් එකතු කරපු  ‘නෙළුම් කුළුණ’ චිත්‍රපටය ‘හවුස් ෆුල්’ වෙන මට්ටමට ප්‍රේක්ෂකයන් විසින් වැළඳගෙන තිබෙනවා. චිත්‍රපටි කෙරුවාව ඇතුළේ ප්‍රේක්ෂයන්ව ඇඳ ගන්න පුළුවන් මට්ටමට නිර්මාණයක් හදනාවය කියන්නෙත් ලංකාව වගේ රටක ගේමක්. ඒ ගේමට ගේමක් දීපු ‘නෙළුම් කුළුණ’ අති දක්ෂ නළු නිලි පිරිසක්, හැඩය වෙනස් තිර පිටපතක්, අලුත් නිර්මාණකරුවෙකුගේ වෙනස්ම ඉනිමක්. කොහොම වුණත් යෝජනා චෝදනා තර්ක විතර්ක හොඳ නරක ප්‍රතිචාර මද්දේ චිත්‍රපටය ‘හවුස් ෆුල්’ වෙන මොහොතක ඒ නිර්මාණකරුවා සොයා යන්න සිතුවා. 

‘නෙළුම් කුළුණ’ බලපු ඔබ හිනා වුණා විතරමද ? එහෙනම් ඒ කතාවේ නොකී කතාව ඔහුගෙන්ම අහලා බලමු.  

ප්‍ර චිත්‍රපටි වංශකතාවට වෙනස්ම හැඩයක් ගෙනාපු කවුද මේ ඉලංගෝ රාම්?

මගේ ගම නාවලපිටිය. මම මගේ උසස් අධ්‍යාපනයට යනවා  ඉන්දියාවට. එතනින් පස්සේ කැමරා ගැන ඉගෙන ගන්න තියෙන ආසාව නිසාම ෆිල්ම් ඉගෙන ගන්න මම යනවා ඇමෙරිකාවට. එතැනින්  පස්සේ  ලංකාවට ඇවිල්ලා මගේ කලා ගමන පටන් ගන්නේ වෙ‍ෙළද දැන්විම් නිර්මාණකරනයෙන්. මුලින්ම මම වැඩ කලේ සහය කැමරා ශිල්පියෙක් විදිහට. පස්සේ මම ටෙලිවිෂන් වෙළෙද දැන්විම් අධ්‍යක්ෂණය කරන්න පටන් ගත්තා. කෝක්, ෆැන්ටා, ශ්‍රි ලංකන් එයාර්ලයින්ස්, ලක්ස්, ඩයලොග්, එටිසලාට් වගේ වෙ‍ෙළද දැන්වීම් ගොඩාක්  කරන්න මට අවස්ථාව ලැබුණා. පස්සේ හිතුනා චිත්‍රපට පැත්තට දැන් එන්න කාලය හොඳයි කියලා. සිනමා නිර්මාණයක් කරන එක මගේ හිතේ තිබුණ ලොකු ආසාවක්. මම ආසියානු චිත්‍රපට ඇකඩමිය, රොක් පෝටර් විශ්ව විද්‍යාලය (ඇමෙරිකාව) වැනි චිත්‍රපටි වැඩසටහන් වල සම්බන්ධවෙලා තිබුණ නිසා ඒ සියලු අත්දැකීම් පාදක කරගනිමින් ‘බ්ලැක් කොමඩි’ කියන ශානරය තේමා කරගනිමින් තමයි නෙළුම් කුළුණ හැදුවේ. 

ප්‍ර කොහොමද මේ කතාව ලියැවෙන්නේ ?

මේක ලියන්න මම ලොකු ටයිම් එකක් ගත්තා. දේශපාලනික කාරණා ටිකක් එක්ක බද්ද වෙච්ච වෙනස් දෙයක් ලියන්න ඕක කියලා හිතාගෙන තමයි වැඩේට බැස්සේ. මේ කතාව ලියන්න කිසිම විශේෂ හේතුවක්වත් පාදක කරගත්ත විශේෂ දෙයක්වත් නැහැ. මේ වගේ දෙයක් වුණොත් මොකද වෙන්නේ කියලා හිතුණා. ඒක හරි අපූරුවට ගැලපුණා. සමහර දෙබස් සිද්ධි මම අතුළත් කළේ රූපගත කිරිම් කරන තැනට ගියාට පස්සේ. ඒක හරියයිද නැද්ද කියන දේට වඩා මගේ හිතට ආපු කතාව මම ලිව්වා .

ප්‍ර ඇත්තටම නෙළුම් කුළුණ දෙමළ කොපියක්ද?

හැමදාම අපි කළේ ඉන්දියානු චිත්‍රපට වල කොපි සිංහල චිත්‍රපටි  ලෙස නිර්මාණය කරපු එක. ඒ නිසා ගොඩාක් දෙනා හිතනවා මේකත් ඉන්දියානු චිත්‍රපටයක් බලලා හදපු කොපියක් (Remake) කියලා.  ඔරිජිනල්ම ෆිල්ම් එක තමයි අපේ සිංහල චිත්‍රපටය වන ‘නෙළුම් කුලුණ’. සිංහල චිත්‍රපටය බලලා තමයි දෙමළ චිත්‍රපටය නිර්මාණය වුණේ. ඊට පස්සේ තමයි අපේ සිංහල චිත්‍රපටය බලලා  දෙමළ, හින්දි, ඉතාලි, ඇමෙරිකා, ස්පාඥ්ඥය යන රටවලත් දැන් මේ චිත්‍රපටය ප්‍රතිනිර්මාණ වුණේ. හැමදාම අපි කළේ  ඉන්දියාවේ නිර්මාණ කොපි කරපු එක. පළමුවැනි වතාවට තමයි ලංකාවේ ෆිල්ම් එකක් අනිත් රටවල ප්‍රතිනිර්මාණය වෙන්නේ. මේ වෙනකොට නෙළුම් කුළුණ ඉන්දියාවේ දෙමළ කොපිය කරලා ඉවරයි. ඒක අධ්‍යක්ෂණය කරෙත් මමයි. හින්දි කොපිය කරන්න මේ වෙනකොට සූදානම් වෙනවා.

ප්‍ර මේ සඳහා නළු නිලියන් තෝරාගැනුණේ කොහොමද

පිටපත ලියලා නිශ්පාදනය කළේ මගේ වයිෆ්  හිරණ්‍යා පෙරේරා. මම මුලින්ම ඇය සමඟ නළු නිලියන් ගැන කතා කළා. මට ඕන වෙලා තිබුණා ප්‍රවීණ සෙට් එකක් එක්ක මේ වැඩේ කරන්න. ප්‍රියන්ත සහ තුසිත මේ වැඩේ අයියාටයි මල්ලිටයි ගන්න ඕන කියලා හිතුණා. කෞෂල්‍යා ප්‍රනාන්දු, චමිලා පිරිස්, චාන්දනි සෙනෙවිරත්න, දිල්හානි ඒකනායක ,ආලෝකා ගයත්‍රි , රන්ජිත් පනාගොඩ, ප්‍රියන්ත සිරිකුමාර, සුලෝචනා විරසිංහ, මධුර ප්‍රභාෂ්වර,සංජිව උපේන්ද්‍ර, අසේල ද සිල්වා, රාජා ගනේෂන්, සරත් හොරොන්තුව, සමන් කෝරලගේ කට්ටිය ප්‍රේක්ෂයකයන්ට අමතක නොවන රංගනයක් දුන්නා. ඒ හැම කෙනාගෙම මහන්සියට මම ස්තුති කරනවා. මම සියලු නළු නිලියන් තේරුවෙ පිටපත ලියලා ඉවර වුණාට පස්සේ. මෙහි රෑපගතකිරිම් කෙරුණෙ අරගලය කාලේ. කරන්ට් නෑ, තෙල් නෑ ගොඩාක් කැපකිරිම් අභියෝග වලට මුහුණ දෙන්න වුණා. කණ්ඩායමේ සියළු දෙනා ඒ හැමදේටම විඳගෙන එකාවගේ සහයෝගයෙන් වැඩේ කළා. හැමෝම එකා වගේ කැපවුණා.

ප්‍ර බලද්දි මෙච්චර හිනා නම් චිත්‍රපට රෑපගත කරද්දි කො​ෙහාම තියෙන්න ඇතිද?

රූපගත කිරිම් කළේ පානදුර ප්‍රදේශයේ. දර්ශන තලයේ සමහර රූපගතකිරිම් වලදි අපිට හිනාව නවත්තගන්න බැරි වුණ අවස්ථා ඕන තරම් තිබුණා. සීරියස් වෙන්නම බැරි තැනුත් ඒ වගේමයි.  

ප්‍ර කොහොමද ප්‍රතිචාර?

අතිවිශිෂ්ටයි. මෙච්චර කල් ලාංකීය සිනමා ඉතිහාසයේ මෙහෙම එකක් ලියවිලා නෑ කියලා තමයි බලපු ගොඩක් දෙනා කිව්වේ. සිනමා ශාලා හවුස් ෆුල් වෙනවා. බලපු අය ගොඩාක් හිනා වුණා කියනවා. හරිම විනෝදයෙන් ඒ පැය කිහිපය හිටියා කියනවා. නිර්මාණකරුවෙක් විදිහට ඒවා අහද්දි හරි සතුටුයි. අපි කොච්චර නිර්මාණ කරත් ප්‍රේක්ෂකයෝ එන්නැහැ කියලා බැනලා වැඩක් නැහැ. ප්‍රේක්ෂකයෝ ඉල්ලන්නේ වෙනස් අමුතු රහ  දේවල්. අපි නිර්මාණකරුවෝ විදිහට විවිධ අත්හදාබැලීම් කරන්න ඕන. ප්‍රථම වතාවට සිංහල චිත්‍රපටයක් ජාත්‍යන්තර ප්‍රතිනිර්මාණය සදහා දොරටු විවෘත කර දෙන්න ලැබීම ලාංකිය සිනමාව ලැබූ ජයග්‍රහණයක් විදිහට මම දකිනවා. ඒ ජයග්‍රහණය මගේ නමට බැර කරගන්නවාට වඩා ශ්‍රි ලාංකීය සිනමාවට බැර කරලා හොඳ නිර්මාණ කරන්න කියලා උත්තේජනය ලාංකිය අධ්‍යක්ෂකවරුන්ට ලබාදෙනවා.

ප්‍ර ලෝකයේ ඉහළම ජූරි සම්මානයටත් නෙළුම් කුළුණ හිමිකම් කියනවා ඒ ගැනත් කියමු

ඇත්තටම ඔව්. එස්ටෝනියාවේ ටලින් නගරයේ පැවැත්වුන ‘බ්ලැක් නයිට් ෆිල්ම් ෆෙස්ටිවල්’ එකේ කුලුඳුල් සිනමා නිර්මාණයක් වෙනුවෙන් පිරිනමන ඉහළම ජූරි සම්මානය තුන් වැනි වතාවට මේ චිත්‍රපටය හිමිකරගත්තා. මම හිතන විදිහට වසර 17 කට පසු A ශ්‍රේණියේ සම්මාන උළෙලකින් ජයග්‍රහණය කළ පළමු ලාංකික චිත්‍රපටය ලෙස නෙළුම් කුළුණ  ඉතිහාස ගත වෙනවා. ඒක සිංහල සිනමාවට හොඳ උත්තේජනයක් කියලා මම විශ්වාස කරනවා.

ප්‍ර ‘නෙළුම් කුළුණ’ දිගහැරන්නේම වෙනස් තැනකින්. පියා මියගියත් පුරුෂලිංගය ප්‍රාණවත්ව පැවතීමේ සිදුවීම සමාජයෙන් සැඟවිමට උත්සාහ දරන තැන ඉඳලාම තියෙන්නේ  සිනහව. නිර්මාණයක් තුල ප්‍රේක්ෂකයාව රඳවා ගැනිමම ලොකු සටනක්. ඔබ එය ජයගත්තා ? 

අනිවාර් යෙන්ම. මම චිත්‍රපට කලාවට අලුත්. හැබැයි මම මේ වැඩේ පටන් ගත්ත කාලේ ඉදලා හැමදේම සුබවාදිව සිතුවා. අභියෝග ආවත් මම ඒවාත් සුබවාදිව හිතුවා.මේක ලොකු හිට් එකක් වෙයි කියලා හිතුවා. ඇත්තටම ඒක මගේ ප්‍රේක්ෂකයෝ ඔප්පු කරලා දිලා තියෙනවා.

ප්‍ර මරණ ගෙයක් ඇතුලේ මෙච්චර හිනාවෙන්න පුළුවන්ද ? 

හොඳ වගේම විවේචන තියෙනවා. තාත්තාව ඇයි මෙහෙම විහිලුවට ගන්නේ කියලා අහලා තිබුණා සමහර අය. හැබැයි මේ චිත්‍රපට හරියට බලන කෙනෙකුට පේනවා මේ කතා කරන්නේ තාත්තා ගැන නෙමෙයි දේශපාලන කතාවක් කියලා. විවේචනය කරන අය මේක බලන විදිහයි වැරදි. ‘නෙළුම් කුලුණ’ කියලා නම දැම්මෙත් තාත්තාගේ ප්‍රශ්නයට වඩා වෙන දේශපාලනික කතාවක් මේ කතාව ඇතුලේ තියෙන නිසා. ඒක ඒත්තු ගන්වන්න. මොකද ’රට වැටුනත් කුළුන කෙලින්’නේ.

කොහාම වුණත් විවේචනත් මම බොහෝම ආදරයෙන් බාරගන්නවා. නිර්මාණයක් සාර්ථක වෙන්න විවේචන අවශ්‍යයි.

අපි අනුන්ට හිනාවෙනවා  , අපි අපටම හිනාවෙනවා .නෙළුම් කුළුණ බැලුවොත් මේ හිනාවල් දෙකම ඔබට නවත්ත ගන්න බැරි වෙයි. මම හිතනවා ඔබ ඒ හිනාව විදිය යුතුමයි කියලා.

නදිශා අතුකෝරළ