ගණනය කළොත් හැදු ගී තනු සෑහෙනය
සංගීතයෙන් කළෙ සිත් සම්බාහනය
ගීයෙන් ගීය හැමෙකම මන මෝහනය
අප දුටු මියැසි විස්මිතයා රෝහණය

හේවුඩ් එකෙන් වැටුණේ නිසි පාදමය
එය මුල් පියවරයි ගමනක යෝධමය
ඉන්පසු කොතෙක් වැඩ කෙරුවද නාදමය
එනිසයි හිමිවුණේ දිවියක් සාදමය 

ගීයෙන් ගීය කිව නොහැකිය ගී තොගය
කිව යුතු එහැම අතිශය මනරම් වගය
ඔහු දුන් බැවින් ඒ හැමටම නිසි අගය
ඒවා සදාකල් අප දෙසවන් ළඟය 

දිගු ගමනක්ය ඔහු සිනමාවෙත් ආවේ
අද වනතුරුත් නෑ නිමවී එම සේවේ
ඒ හැම වැඩක තිබුණේ නිති රසබාවේ
රඟපෑ අයුරු ස්වර හතකින් සිනමාවේ

රේඛාවලින් අරඹා ටෙලිවල ගමන
සිය ගණනක්ය කළ වැඩ ගැන්නොත් පමණ
ඒ හැමෙකින්ම රෝහණ සුවඳකි හමන
හැකියාවක්ද නොදනිමි මෙය නම් කුමන

නාවත් වේදිකාවට පෙර තරම් අද
අමතක නොවන වැඩ ඇත එහි කරන ලද
රසිකාගාරයට එහිදී ඇසුණු නද
ඉඳහිට අදත් ඇසුණොත් නම් තමයි හොඳ

දැන් ගී ගැයීමට ඔහු ගැහුවත් පස්ස
ඒ හඬ ඇසීමයි අප හැමගෙම රිස්ස
ඇත ගීතයක් හදවත පතුලට බැස්ස
මත'කැති ඔබට මුතුකුඩ ඉහිලන වැස්ස

ගී තනු වගෙම ගැයුමෙත් අමමිහිර පෙරේ
නොදැනිම ඔහුගෙ හඬ වෙත අපෙ සවන හැරේ
නැටුවා බඹරු අඹ මල් වට සැඳෑකරේ
ගීයෙන් දෙකෙන් ගොළු කරගෙන කිමද ස්වරේ

සරිගම පවා අවනත කරගෙන අණට
ස්වර ගැළපුවේ නිතරම ඔහු නිසි තැනට
ඇහුණොත් ඔහුගෙ සංගීතය හෙම කනට
පන්සිළු වුණත් පෙම් කරනව රෝහණට

අද වනතුරා මොහොතේ සිට කන වැකුණ
කිසි දින කිසිවිටෙක ඒ ගී නොම මැකුණ
හැම දා ගලේ කෙටුුවා වාගේ රැකුණ 
අඩසියවසක රෝහණමය ස්වර ලකුණ

ප්‍රියන්ත කොඩිප්පිලි