ප්‍ර "දෙවෙනි ඉනිමෙ" අනුහස්- සමාධි කියන්නේ පුංචි තිරයේ ප්‍රේක්ෂකයන්ට නම් ගොඩක් හුරුපුරුදු චරිත දෙකක්. මේ දවස්වල සෝෂල් මීඩියාවල ඒ දෙන්නා පෙනී හිටපු වෙඩින් ෆොටෝ ෂුට් එකක් ගැනත් බොහෝ අය කතා වෙනවා. ඉතින් අපි හිතුවා මෙවර සඳැල්ල කතාබහට පුංචි තිරයේ සමාධිගෙ චරිතෙට පණපොවන තත්සරණි පියුමිකාව සම්බන්ධ කරගන්න.

 ප්‍ර  අනුහස් සමාධිව බැන්දා කියන්නේ ඇත්තද? 

නැහැ,  ඒක ඇත්තටම අපි කතාවෙලා කරපු ෂූට් එකක්. Salon Gorgeous එකෙන් කතා කරලා ඇහුවා දෙන්නගෙ ෂූට් එකක් කරමුද කියලා, කතාවෙත් කපල් එක නිසා. ඊට පස්සේ තමයි රවීන් අයියයි මායි ෂූට් එක කළේ.  කතාවෙ හැටියට නම් තාම බැඳලා නැහැ. ඉස්සරහට තමයි ඒකත් ප්‍රේක්ෂකයන්ට බලා ගන්න වෙන්නේ.

 ප්‍ර  ෆොටෝ ෂූට් එකට මොන වගේ ප්‍රේක්ෂක ප්‍රතිචාරද ලැබෙන්නේ?

ඇත්තටම අපි හිතපු නැති තරම් ගොඩක් හොඳ ප්‍රතිචාර ලැබුණා. විශේෂයෙන්ම සමාජ මාධ්‍යයෙන්. ඒකෙන් අනුහස්ටයි සමාධිටයි ආදරේ කරන අය ගොඩක් වැඩි වෙලා තියෙනවා. සමහරු පෞද්ගලිකවත් මැසේජ් දාලා අහනවා ඇත්තටම බැන්දද? නැත්තම් ෂූට් එකක්ද කියලත්, තව සමහරු ෂූට් එක ගැන විස්තර අහනවා. කොහොම වුණත් කතාව ඇතුළේ දැනට ඒ වගේ දර්ශන මොකුත් නැහැ. ෆොටෝ ෂූට් එකට නම් ගොඩක් ආදරණීය ප්‍රතිචාර ලැබෙනවා. ඒ ගැන හරිම සතුටුයි.

 ප්‍ර  අනුහස් සමාධිගෙ ආදරේ ගැන තත්සරණිට  මොකද හිතෙන්නේ?

ඒ බැඳීම ඇතුළේ යාළුකම, ආදරේ කියන හැමදේම තියෙන නිසා දැනට නම් මම අඩුවක් දකින්නේ නැහැ. ඉදිරියේදි මොනවා වෙයිද කියන්න දන්නෙ නැහැ. දැනට නම් ඉතින් සාර්ථකයි කියලා මම හිතනවා. බලමු කතාව ගලා ගෙන යන විදිහට ඉදිරියට මොනවා වෙයිද කියලා.

 ප්‍ර  රංගනයෙදි රවීන්ගෙන් මොන වගේ සහයෝගයක්ද ලැබෙන්නේ?

ඇත්තටම ලොකු සහයෝගයක් ලැබෙනවා, මගේම සහෝදරයෙක් වගේ. ඊට අමතරව අපේ දෙවෙනි ඉනිමෙ සෙට් එකත් ලොකු සහයෝගයක් දෙනවා වැඩේ හොඳට කරගන්න. එක්කෙනෙක් කියලා විශේෂ නැතුව හැමෝම ලොකු සහයෝගයක් දෙනවා.

 ප්‍ර ඇත්ත ජීවිතේ තත්සරණි පියුමිකා කියන්නේ කොයි වගේ කෙනෙක්ද?

ඇත්තටම මම හරිම සරල කෙනෙක්. ඒ වගේම ගොඩක් නිදහසට ආදරේ කරන ගෑණු ළමයෙක්.

 ප්‍ර තත්සරණි මේ වෙනකොට ආදරවන්තියක්ද?

නැහැ. පෞද්ගලිකත්වය අයිතියි කියලා කියනවනේ, ඉතින් මමත් තාම ඒක භුක්ති විඳින කෙනෙක්.

 ප්‍ර මේ දවස්වල මොනවද වැඩකටයුතු?

දෙවෙනි ඉනිමෙ රූගත කිරීම් සහ සිරස නාළිකාවෙ විකාශය වෙන ආලවන්ති ටෙලි නිර්මාණයේ රූගත කිරීම්වලට තමයි මේ දවස්වල ගොඩක්ම සම්බන්ධ වෙන්නේ. ළඟදි රූගත කරලා ඉවර වුණා අවුරුදු ටෙලි ෆිල්ම් එකක් වර්ෂා කියලා. දැනට ඉතින් ඒ ටික තමයි.

 ප්‍ර  මුලදි සහය නිළියක් විදිහට ප්‍රේක්ෂකයන් ඉදිරියට ආපු තත්සරණි, මේ වෙනකොට ප්‍රධාන චරිතවලට රංගනයෙන් සහභාගී වෙනවා. ඒ ගැන මොකද හිතෙන්නේ?

ඒ ගැන නිහතමානීව මම ගොඩක් සතුටු වෙනවා. මම ක්ෂේත්‍රයට ඇවිත් මේ වෙන කොට අවුරුදු තුන, හතරක් වෙනවා. මගෙ පළවෙනි නිර්මාණය "පාරදිගේ" ටෙලි නාට්‍ය. ඒ නිර්මාණයෙන් ප්‍රේක්ෂකයන් ඉදිරියට මම එන්නේ සහය චරිතයක් විදිහට. එතන ඉඳලා මගෙ තියෙන අඩුපාඩුත් හදාගෙන, ප්‍රවීණ රංගන ශිල්පීන්ගෙන් දේවල් අහලා, බලාගෙන, ඉගෙන ගෙන තමයි අද මම මේ ඉන්න තැනට ආවේ. ඉතින් මට මේ ආපු දුර ගැන ලොකු සතුටක් තියෙනවා.

 ප්‍ර  මොන වගේ ප්‍රේක්ෂක ප්‍රතිචාරද ලැබෙන්නේ?

ගොඩක් ප්‍රේක්ෂක ප්‍රතිචාර ලැබෙනවා. ඒවා හොඳ ප්‍රතිචාරද, නැද්ද කියලා තීරණේ වෙන්නේ අපි රංගනයෙන් දායක වෙන චරිතත් එක්ක. ඒ නිසා සමහර වෙලාවට කාලෙන් කාලෙට ප්‍රතිචාර වෙනස් වෙනවා.  මේ දවස්වල නම් ගොඩක් හොඳ ප්‍රතිචාර ලැබෙනවා.

 ප්‍ර  අලුත් නිර්මාණවලට ආරාධනා ලැබෙනවද?

ඔව්, ලබන මාසේ අලුත් චිත්‍රපටයක වැඩ පටන් ගන්න තියෙනවා. ඒක තමයි මෑතකදි කරන්න තියෙන්නේ. ඊට අමතරව මගේ වෙලාව කලමනාකරණය කර ගන්න විදිහට මම වැඩ භාර ගන්නවා.

 ප්‍ර  රංගනයට අමතරව තත්සරණි මොනවද කරන්නේ ඇහුවොත්? 

කලින් නම් මම රැකියාවක් කළා. හැබැයි දැන් නම් මගේ සම්පූර්ණ කාලෙම මම යොදවන්නේ රංගන කටයුතුවලට. 

 ප්‍ර  තත්සරණිට හින්දි කතා කරන්න පුළුවන් කියන්නේ ඇත්තද?

ඔව්, මම පාසලේදි සාමාන්‍ය පෙළට සහ උසස් පෙළට හින්දි භාෂාව ඉගෙන ගත්තා. ඊට අමතරව මම පාඨමාලාවක් කළා. මම මගේ රැකියාව විදිහට මුලින්ම වැඩ කළෙත් ඉන්දියන් කෝල් සෙන්ටර් එකක. ඉතින් යම්තාක් දුරකට හින්දි භාෂාව පුළුවන්.

 ප්‍ර  හින්දි සිනමාවට යන්නත් බලාපොරොත්තුවක් තියෙනවද?

ක්ෂේත්‍රය ඇතුළේ ඉගෙන ගන්න තව ගොඩක් දේවල් මට තියෙනවා. ඒ දේවල් ඉගෙන ගෙන එතනින් එහාට යන්න පුළුවන් වුණොත් මම හිතනවා කවුරුත් ඒකට අකැමැති වෙන්නෙ නැහැ කියලා. බලමු ඉතින්.

 ප්‍ර  මේ ආපු දුර ගැන මොකද හිතෙන්නේ?

ජීවිතේ හැමදේම ළඟා කරගන්න එක නෙවෙයි මම සාර්ථකත්වය විදිහට දකින්නේ, අපේ මානසික සතුටත් ළඟා කර ගන්න ගමන් අපිට ගමනක් යන්න පුළුවන් නම් එතන තමයි සාර්ථකත්වය තියෙන්නේ. ක්ෂේත්‍රයට ආපු මුල් කාලෙදි විවිධ බාධකවලට මුහුණ දීලා තිබ්බත් මේ වෙනකොට සාමකාමී විදිහට මගෙ ගමන මම යනවා. ඒ ගැන සතුටුයි.

කෞශල්‍යා ලක්ෂානි