හැඩ වෙන්න, ලස්සන වෙන්න අපි හැමෝම කැමතියිනේ. ඒකටම හරියන්න රූපලාවන්‍ය ක්ෂේත්‍රයත් දවසින් දවස දියුණු වෙන්නේ හරි ඉක්මනට. මෙවර සඳැල්ලට එකතු වෙන අමිල රාජපක්ෂත් රූපලාවණ්‍ය ක්ෂේත්‍රයෙන් තම හැකියාව, දක්ෂතාවය දියුණු කරගෙන අද වෙන කොට සම්මානයට පත් වුණ චරිතයක් කිව්වොත් හරි. මේ කතාබහ ඔහු සමඟ.

 ප්‍ර   මුලින්ම අපි අමිල ගැන විස්තර ටිකක් කියමු.

මගේ නම අමිල රාජපක්ෂ. මම විවාහකයි, පවුලේ අම්මයි තාත්තයි සහෝදරයො දෙන්නයි. මම මුලින්ම ගියේ ගමේ පාසලට. ඊට පස්සේ වාණිජ අංශයෙන් ඒලෙවල් කරන්න මතුගම මිරිස්ස සෙන්ට්‍රල් එකට ගියා.මේ වෙනකොට මම සැලොන් ක්ෂේත්‍රයට ඇවිත් අවුරුදු 18 ක් විතර වෙනවා. 

 ප්‍ර  වාණිජ අංශයෙන් ඉගෙන ගත්ත අමිල කොහොමද මේ රූපලාවණ්‍ය ක්ෂේත්‍රයට සම්බන්ධ වෙන්නේ?

වාණිජ අංශයෙන් ඒලෙවල් කරත්, ඒලෙවල්වලින් පස්සේ මම මුලින්ම එන්නේ හොටෙල් ෆීල්ඩ් එකට. ඒ ඇවිත් අවුරුදු දෙකක වගේ කාලයක් හිටියා. රැකියා කීපයකුත් කළා. ඊට පස්සේ මම සිංගප්පූරුවට යනවා කළමනාකරණ පාඨමාලාවක් කරන්න හොටෙල්වලට. ඒ රටේදි මගේ කොණ්ඩෙ කපන්න ගිය සැලොන් එකක් දැකලා තමා මුලින්ම මේ ක්ෂේත්‍රය ගැන මට ආසාවක්  එන්නේ. ඒ රටේ සැලොන් කියන්නේ  වෙනම සංකල්පයක්. ඒ සැලොන් හරිම ලස්සනයි. අපි පොඩි කාලේ ගියපු පොඩි සැලොන් වගේ නෙවෙයි ඒවා. ඉතින් ඒක දැක්ක ගමන් මට ආසා හිතුණා. ඊට පස්සේ මම ලංකාවට ඇව්ත් NVQ 4  කරනවා. ඒක මාස 6 පූර්ණ කාලීන පාඨමාලාවක්. ඒක අවසන් කළාට පස්සෙ මම අවුරුදු හයක් සැලොන් එකක වැඩ කරලා ඊට පස්සේ තමයි මගේම සැලොන් එකක් පටන් ගත්තේ. ඒ  විදිහට මගේම කොණ්ඩෙ කපන්න ගිහින් ඇති වුණ ආසාව නිසා තමයි මම  මේ  ක්ෂේත්‍රය ඇතුළෙ ඉන්නේ. 

 ප්‍ර   ඒ ආපු දුර ගැනත් මතක් කළොත්?

මුලින්ම මම hair cut විතරයි කළේ. එතනින් පටන් ගෙන මේ වෙන කොට රූපලාවන්‍ය පැත්තෙන් කරන Tattoo, Microblading, Lip Blush, Hair Extensions, Hair Color, Bridle කියන හැම අංශයක්ම වගේ ඉගෙන ගෙන වැඩ කරන් යනවා. අද වෙනකොට මගේ බොරලැස්ගමුවෙ salon hairz studio එකට අමතරව නුවර සහ කුරුණෑගලත් ශාඛා දෙකක් තියෙනවා.

 ප්‍ර   ලබපු ජයග්‍රහණ මොනවද?

ඒ ගැන මෙහෙම කියන්නම්. සමහර ගැහැනු ළමයින්ගෙ ඇහිබැම ගොඩක් අඩුයිනේ. ඒ වගේම සමහරුන්ගේ ඇහිබැම විවිධාකාර හැඩවලට තියෙන්නේ. සාමාන්‍යයෙන් මුහුණෙ හැඩේ, ලස්සන කරන මූලිකම දෙයක් තමයි ඇහිබැම කියන්නේ. Microblading වලින්  මම කරන්නේ ඒක ස්වභාවික විදිහටම නැවත හදන එක. 

මගේ හැකියාව ගැන පාරිභෝගිකයන්ටත් විශ්වාස නිසා මම බොරලැස්ගමුවෙ හිටියත් මේ වෙන කොට ගාල්ලේ, මාතර, කුරුණෑගල, වව්නියා, යාපනේ කියන විවිධ පැතිවල අය මාව හොයා ගෙන එනවා. ඒ නිසා මට 2025 ජනවාරි මාසෙ 08 වෙනිදා කොළඹ BMICH එකේදී Best microbleding ,lipblush and tatoo artist in sri lanka ( icon of elegance award ) කියන සම්මානය ලැබුණා. ඒක මම ලබපු ලොකු ජයග්‍රහණයක්. ඒ වගේම කලින් කිව්ව විදිහට

මගේ සැලොන් එකේ විවිධ සේවා තියෙනවා, Tattoo, Microblading, Lip Blush, Hair Extensions, Hair Color, Bridle, nail වගේ සෑම අංශයක්ම තියෙන නිසා අවුරුද්දකට සැරයක් හොඳම සැලොන් එක තෝරන කොට මගේ සැලොන් එක Golden feather awards for best salon in sri lanka කියන තැනට තේරෙනවා. ඒ හැමදේමත් එක්ක මගේ පාරිභෝගිකයො කොහෙ හිටියත් මගේ සැලොන් එකට, මාව හොයන් එනවා. ඒ තමයි මම දකින විදිහට මේ ෆීල්ඩ් එකේ මම ලබපු ලොකුම ජයග්‍රහණය.

 ප්‍ර  අද ගොඩක් දෙනා හිතනවා රූපලාවණ්‍ය ක්ෂේත්‍රය තුළින් විශාල වශයෙන් මුදල් හම්බ කරන්න පුළුවන් කියලා. ඒ ගැන අමිලගෙ මතය මොකක්ද?

ඔව්, මේ ක්ෂේත්‍රයෙන් සල්ලි හම්බ කරන්න පුළුවන්. ඒ වගේම තමයි හරියට වැඩේ කළේ නැත්තම් මේ ක්ෂේත්‍රය තුළ ඒක එකකට එකක්  බලපානවා. ඒ කියන්නේ එක සැලොන් එකක වැරැද්දක් අනිත් සැලොන්වලටත් බලපානවා. කොණ්ඩ කැඩිලා, මුහුණු පිච්චිලා වගේ දේවල් අපිට සමහර තැන්වලින් අහන්න ලැබෙනවනේ. යම්කිසි කෙනෙක් අත්දැකීම් හරියට නොගෙන, නිවැරදි දැනුමක් නැතුව වැඩ කළාම තමයි ඒ වගේ වැරදි වෙන්නේ. නමුත් නිවැරදිව ඉගෙන ගෙන හරි ප්‍රමිතියකට මේ දේ කළොත් අපිට මුදල් හම්බ කරන්න පුළුවන්.

 ප්‍ර  මේ ක්ෂේත්‍රයේ රැඳිමෙන් අමිල බලාපොරොත්තු වෙන්නේ මොනවද?

මට ඕනෙ මගෙ ළඟට එන පාරිභෝගිකයව ලස්සන කරලා, ඒ අයගෙ සතුට බලන්න. ඒ තුළින් සාධාරණ මුදලක් හම්බ කරන ගමන් මේ ක්ෂේත්‍රයේ තවත් දේවල් දියුණු කරගන්න ගමන් ඉදිරියට යන එක තමයි මගේ බලාපොරොත්තුව.

 ප්‍ර   අද ඉන්න තැනට එන්න මුහුණ දුන්න බාධකත් ජීවිතේ ඇති.

ඔව් බාධක නම් තිබ්බා. ඒ කාලේ පාඨමාලාව කරද්දි බස් එකටවත් අතේ සල්ලි නැහැ. සීසන් එකක් හදන් තමයි ගියේ. ප්‍රයිවට් බස් යද්දි ඉතින් අපි සීසන් එකෙන් යන්න පුළුවන් බස් එකක් එනකල් පාරෙ පැය ගණන් හිටන් ඉඳලා තියෙනවා. ඒ වගේ මුල් කාලේ ලොකු කට්ට්ක් කෑවා. කොහොම වුණත් අද වෙන කොට ඒ අමාරු දවස් පහු කරලා සාර්ථක තැනක ඉන්න ලැබීම ගැන සතුටුයි.

 ප්‍ර   කවුද මේ ගමනට ශක්තියක් වුණේ?

මගේ ආදරණීය බිරිඳව මේ වෙලාවෙ මතක් කරන්න ඕනේ. ඇය තමයි මට ඉදිරියට යන්න විශාල ශක්තියක් වෙලා මේ වෙනකල්ම හැම දේකදිම මාත් එක්ක ඉන්නේ.

ඒ වගේම මගේ පවුලෙ අයත්. අද මම මේ ඉන්න තැනට එන්න මට උගන්නපු ගුරුවරුන්වත්  මතක් කරන්න කැමතියි. විශේෂයෙන් Microblading පැත්තෙන් සහ NVQ පාඨමාලාවේදි උදව් කරපු හැම ගුරුවරයෙක්ටමත් ස්තූති වන්න වෙනවා.

 ප්‍ර   ඉදිරියේදී මේ ක්ෂේත්‍රයට එන්න හිතන අයට මොන වගේ උපදෙසක්ද දෙන්නේ?

මේ ක්ෂේත්‍රයට එන සමහර අය මුල් කාලේ ගොඩක් වෙලාවට පුහුණුවීම්වලට යද්දි ලොකු සැලොන් හොයන් යනවා. මම කියන්නේ මුලින්ම ඕනේම ක්ෂේත්‍රයක ලොකු තැනකට යන්න කලින් පොඩි තැනකින් පටන් ගන්න. මොකද පොඩි තැනකින් ඔයාට මුල ඉඳන් අගටම හරියට වැඩ ඉගෙන ගන්න වගේම ලොකු අත්දැකීම් ප්‍රමාණයකුත් ගන්න පුළුවන්. එහෙම ඉගෙන ගෙන එන්න. සමහරු කෝස් එකක් කරපු ගමන් සැලොන් දානවා, ඊට පස්සෙ ඒ ක්ෂණිකව වැහෙනවා. එතකොට පාරිභෝගිකයනුත් අසරණ වෙනවා. ඒ නිසා අවුරුදු තුනකවත් අත්දැකීම් අරන් සැලොන් එකක් දාගෙන මේ ක්ෂේත්‍රයේ රැඳී ඉන්න කියලා කියනවා.

 ප්‍ර   අමිලගේ සාර්ථකත්වයේ රහස මොකක්ද ඇහුවොත්?

මම හැම වෙලාවෙම බලන්නේ පාරිභෝගිකයට මගෙන් වෙන්න පුළුවන් උපරිම සේවය ගුණාත්මකව ලබා දෙන්න. සුහදශීලීව ගනුදෙනු කරන්න. ඉතින් මගේ ළඟට එන අයත් කොහේ හිටියත් ආයෙත් මගේ සැලොන් එකම හොයන් එනවා. ඒක වෙන්න ඇති රහස.

කෞශල්‍යා ලක්ෂානි