වකුගඩු රෝගය මේවන විටත් ලොව පුරා මිලියන ගණනාවක් ජනතාවට බලපාන දැවැන්ත සෞඛ්‍ය අර්බුදයක් බව අප කවුරුත් දන්නා පුවතක්. නමුත් මෙම රෝගය නිසා ඇතිවෙන දරුණු සංකූලතා සහ  කළ යුතු ප්‍රතිකාරවල මිල අධිකභාවය නිසාම අද වෙන විට බොහෝ රෝගීන් අඛණ්ඩ ප්‍රතිකාරවලට වැයවෙන මූල්‍යමය බර සමඟ පොරබදමින් සිටීම හද කම්පා කරවන කාරණාවක්.  එවැනි පසුබිමක වකුගඩු රෝගීන්ගේ ප්‍රතිකාර සහ සත්කාර වැඩසටහන් සඳහා අරමුදල් සපයාගැනීමේ අරමුණින් තෙවන වරටත් සැලසුම් කරන "සුවසර ගී දැහැන" නමින් පවත්වන සංගීත ප්‍රසංගය පිළිබඳව අපට දැනගන්නට ලැබුණා. ඉතින් මෙවර සඳැල්ලෙන් අපි හිතුවා ඒ පිළිබඳව පාඨක ඔබව දැනුවත් කරන්න.

2025 අප්‍රේල් මස  05වන දින පස්වරු 6ට කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේදී පැවැත්වීමට සැලසුම් කර තිබෙන මෙම "සුවසර ගී දැහැන" ප්‍රසංගයට විශාරද සුනිල් එදිරිසිංහ, එඩ්වඩ් ජයකොඩි, චරිතා ප්‍රියදර්ශනී, දීපිකා ප්‍රියදර්ශනී, ප්‍රදීපා ධර්මදාස,ජගත් වික්‍රමසිංහ, රොඩ්නි වර්ණකුල, උරේෂා රවිහාරි, දයාන් විතාරණ, ෆර්නි රෝෂිනී, ළහිරු  පෙරේරා, මිහිඳු ආරියරත්න, ඉන්ද්‍රචාප ලියනගේ, සමනලී ෆොන්සේකා, කාංචනා අනුරාධි සහ අමන්ද්‍යා උත්පලී යන ගායක ගායිකාවන් රැසක් සහභාගී වී ගායනා ඉදිරිපත් කිරීමට සූදානමින් සිටිනවා. මෙම ප්‍රසංගයේ  වාද්‍ය වෘන්දය සඳහාත් ප්‍රසංගයේ නර්තන කණ්ඩායම සඳහාත්  ශ්‍රී ලංකා යුද්ධ හමුදා වාද්‍ය වෘන්දයත්, එහි නර්තන කණ්ඩායමත් ඉදිරිපත් වීමද සුවිශේෂී කරුණක්. ඊට අමතරව ප්‍රසංගයේ සංගීතය මෙහෙය වීම ජගත් වික්‍රමසිහ සමඟින් මේජර් බුද්ධික වන්නිනායක විසින් සිදු කරන අතර කථනයෙන් දිනුෂ කුඩාගොඩ සහ සඳමාලි හේවානායක ද, වේදිකා පරිපාලනයෙන් ඛණ්ඩාර ඇහැලියගොඩ ද දායක වීමට නියමිතයි. ප්‍රසංගයේ ප්‍රධාන සංවිධායක ලෙස දීප්ති විජේතුංග කටයුතු කරන අතර මෙම කාර්යයට උපදේශකත්වය දීමට කලාකීර්ති සතිශ්චන්ද්‍ර එදිරිසිංහ, විශේෂඥ වෛද්‍ය සංජය හෙයියන්තුඩුව සහ සංගමයේ උපදේශක කමිටුව සූදානමින් සිටිනවා.

සැම විටම මනසට සුවයකුත්, කනට මිහිරි තනුවකුත් නිර්මාණය කරන සංගීතයට, තවත් උතුම් අරමුණක් එක් වූ පසු එය මිනිසුන් සුවපත් කළ හැකි බලයක්, ශක්තියක් බවට පත් වෙනවා නොඅනුමානයි. මෙම උතුම් අරමුණ පිළිබඳව සංගමයේ ප්‍රධාන අනුශාසක වෛද්‍ය සංජය හෙයියන්තුඩුව මහතාගෙන් කළ විමසීමේදි ඔහු පැවසුවේ මෙවැන්නක්.

"අපේ රටේ වර්තමානයේ වකුගඩු රෝගයට ගොදුරු වෙන පිරිස ශීඝ්‍රයෙන් වැඩි වෙනවා. ඒ නිසා වාර්ෂිකව රෝගීන් විශාල පිරිසක් මිය යනවා. ඒ වගේම  මේ රෝගීන්ට ප්‍රතිකාර කරන්න රජයට විශාල බරපැනක් දරන්නත් සිද්ධ වෙනවා. අපේ  සමස්ත ලංකා වකුගඩු රෝගීන්ගේ සංගමය තමයි මේ වෙන විට ලංකාවේ තියෙන පැරණිතම  වකුගඩු රෝගීන්ගේ සංගමය. ඒක රජයේ ලියාපදිංචි පුණ්‍ය ආයතනයක්. මේ සංගමයේ ව්‍යවස්ථාවට අනුව සංගමයේ අරමුණ තමයි වකුගඩු රෝගීන්ගේ සහ එම පවුල්වල අවශ්‍යතා, ප්‍රධාන වශයෙන් වකුගඩු රෝගීන්ගේ ප්‍රතිකාර සඳහා උදව් උපකාර කිරීම, ඒවගේම වකුගඩු රෝගීන්ගේ දුවා දරුවන් අසරණ වෙලා ඉන්න කොට එවැනි  දරුවන්ට අපි පාසල් පොත් ශිෂ්‍යත්ව සපයනවා. 

ඒවගේම අපි රටේ ජනතාවත් අමතක කරලා නැහැ. අපි සෑම විටම රටේ ජනතාවගේ වකුගඩු රෝග පිළිබඳ දැනුම, දියුණු කරන්න කටයුතු කරනවා. ඒ සඳහා මේ වෙන විට අප සංගමයෙන් පොත් පහළොවක් පමණ නිකුත් කර තියෙනවා,ඒ වගේම  ශ්‍රී ලංකාවේ පළවන එකම ත්‍රෛමාසික වෛද්‍ය විද්‍යා පුවත්පත වන " වකුගඩු" පුවත්පත, බිහි වෙන්නෙත් අපේ සංගමයෙන්. ඊට අමතරව  සෞඛ්‍ය අධ්‍යාපනය සඳහා www.slkidney.com නමින් සිංහල වෙබ් අඩවියක් පවත්වාගෙන යනවා. තව " Samastha Lanka Kidney Patients' Association " නමින් අපි යූ ටියුබ් චැනලයක්  පවත්වාගෙන යනවා. එමගිනුත් සිදු කරන්නේ වකුගඩු රෝග පිළිබඳ දැනුම  වර්ධනය කිරීමට උදව් උපකාර කිරීම. 

මේ කර්තව්‍යයන් සියල්ල සාර්ථකව කරන්න අපට  විශාල මුදලක් අවශ්‍ය වෙනවා. වකුගඩු රෝගීන්ට සාමාන්‍යයෙන් වසරකට රුපියල් කෝටියකට ආසන්න මුදලක්, මේ dialysis ප්‍රතිකර්මයට පමණක් වියදම් කරනවා.  ඒවගේම ඔවුන්ගේ බෙහෙත් හේත් ආදියට, පරීක්‍ෂණ කටයුතු සඳහාත් විශාල මුදලක් වැය වෙනවා.  ඒ සඳහා තමයි මේ "සුවසර ගී දැහැන" ප්‍රසංගය අපි වකුගඩු රෝගීන්ගේ රෝග සත්කාර වෙනුවෙන් හැම වර්ෂයේම සමස්ත ලංකා වකුගඩු රෝගීන්ගේ සංගමය මගින් සංවිධානය කරන්නේ. මෙවර තුන්වෙනි වතාවට තමයි පවත්වන්නේ. මෙහි විශේෂතාවයක් වෙන්නේ මේ ප්‍රසංගයට ප්‍රවීණ, යුග තුනක ගායක ගායිකාවන් රැසක් ස්වේච්ඡාවෙන්ම කිසිදු අය කිරීමකින් තොරව ගීත ගායනා කිරීම. ගායක ගායිකාවන් පහළොස් දෙනෙක් පමණ ගීත ගායනා කරනවා.  තමන්ගේ ගායන හැකියාවන්, ශිල්පීය හැකියාවන් රෝගීන්ගේ සුවසෙත අරබයා දායක කරන අවස්ථාවක් තමයි මේ,  "සුවසර ගී දැහැන" ප්‍රසංගය. යුද හමුදා නර්තන කණ්ඩායමත්, යුද හමුදා වාද්‍ය වෘන්දයත් නැවතත් තුන්වෙනි වතාවටත් නොමිලේ ඔවුන්ගේ ශිල්පීය දායකත්වයන් දක්වනවා. මේ සියලු දෙනාගේම ස්වේච්ඡා දායකත්වයෙන්  සහ සංකලනයෙන් තමයි  මේ වැඩසටහන BMICHහීදී පවත්වන්නේ. එහිදී

බණ්ඩාරනායක  අනුස්මරණ සම්මන්ත්‍රණ ශාලාවත් අපිට ඉතා පහසු මිලකට  ලබාදීමට හිටපු ජනාධිපතිනි චන්ද්‍රිකා බණ්ඩාරනායක මහත්මිය සහයෝගය දැක්වූවා. ඉතින් මේ සියලුම දෙනාගේ  එකමුතුවෙන් සහ සමස්ත ලංකා වකුගඩු රෝගීන්ගේ සංගමයේ සාමාජිකත්වය හා නිලධාරී  මණ්ඩලයේ දැඩි කැපවීමෙන් තමයි මේ "සුවසර ගී දැහැන" ප්‍රසංගය  පවත්වන්නේ. එයින් ලැබෙන සියලුම ආදායම් අපි හැමදාමත් වගේම මේ පාරත් වකුගඩු රෝගීන්ගේ ප්‍රතිකාරවලට  සපයනවා. ඉතින් මේ ප්‍රසංගයට සහභාගි වීමෙන් ඉතාමත්ම උසස් රසවින්දනයක් ලබා ගන්නවා වගේම විශාල පුණ්‍යකර්මයක් සඳහාත් ඔබට දායකත්වයක් ලබාදීමට හැකියාව ලැබෙනවා. ඒ නිසා ජනතාවට  ආරාධනා කරනවා ප්‍රවේශ පත්‍රයක් මිලදී ගෙන ප්‍රසංගයට සහභාගී වෙන්න කියලා"

ප්‍රසංගය සඳහා ගායක ගායිකාවන් ද රැසක් සම්බන්ධ වීමට නියමිත බැවින් ඉන් කිහිපදෙනෙකුගෙන්ද ප්‍රසංගය පිළිබඳව අපි අදහස් විමසුවෙමු. 

ඒ අනුව ජගත් වික්‍රමසිංහ මහතා "සුවසර ගී දැහැන වැඩසටහන මම මේ කරන්නේ තුන්වෙනි වතාවට. මේ වැඩසටහන ඇත්තටම ශ්‍රී ලාංකීය සංගීත ක්ෂේත්‍රයේ කලාකරුවන් සම්බන්ධ වෙන  පුණ්‍ය කටයුත්තක් කියන්නත් පුළුවන්. සහභාගී වෙන ශිල්පීන් හැමකෙනෙක්ම නොමිලේ සම්බන්ධ වෙන්නේ. මෙවරත් ලොකු ගායන පිරිසක් සම්බන්ධ වෙනවා. ප්‍රසංගය ගැන කිව්වොත් මේක ඉතාමත් මියුරු ගී ප්‍රසංගයක්. සෞන්දර්‍යාත්මක ගායනා, වාදන සහ නර්තන දැකගත හැකි විවිධත්වය පදනම් කරගත් වැඩසටහනක්. විවිධ ගීත රිද්ම, රසවින්දන එකම වේදිකාවක විශාල ගායක පිරිසකගෙන් ඔබට දැකගන්නට පුළුවන්. මේ සඳහා සම්බන්ද වෙමින් ආශීර්වාද කරන පිරිස අතර රංගන ශිල්පීනුත් විශාල ප්‍රමාණයක් ඉන්නවා. විශේෂයෙන්ම මාලනී ෆොන්සේකා මහත්මිය, ඒවගේම සතිස්චන්ද්‍ර එදිරිසිංහ මහත්මා, රවින්ද්‍ර රන්දෙණිය මහත්මා. 

ඒ වගේ අපේ ප්‍රවීණ කලාකරුවන්, ඔවුන් පසුබිමේ සිට ලොකු ශක්තියක් සපයනවා. කලාකරුවෝ විශාල සංඛ්‍යාවක් සිටින නිසා මෙවැනි කටයුතු සඳහා තෝරාගත් කලාකරුවන් පිරිසකට පමණයි සහභාගී වීමට අවස්ථාව ලැබෙන්නේ. ඒ වගේම  මුලින් මේ සඳහා සහභාගී වුණ කීපදෙනෙක් මේ වන විටත් අප අතර නැහැ. නමුත් මේකට දායකවෙන්න ඉදිරියේදීත් අපේ කලාකරුවො අත පොවයි. මේක වසර ගණනක සිට අප සහභාගී වෙන වැඩසටහන් මාලාවක්. 

මුලින් මෙතරම් ලොකු ප්‍රසංගයක් ලෙස තිබුණේ නැහැ. වෛද්‍ය සංජය හෙයියන්තුඩුව කියන්නේ මේ විෂයේ නිපුණත්වයක් ලැබූ විශේෂඥ වෛද්‍යවරයෙක්. ඉතින් දක්ෂ වෛද්‍යවරුන් පිරිසක් වගේම තවත් හිතෛෂී පිරිසක් එකතු කරගෙන යන සමාජශීලී වැඩසටහනක් විදිහට තමයි මම මේ ප්‍රසංගය දකින්නේ. 

මේ වගේ ප්‍රසංගයක් නරඹන්න එන ප්‍රේක්ෂකයන්ට කියන්නේ ඔබ වින්දනයක් ලබන අතරේ  ඔබ ගන්න ටිකට් පතෙන් ලැබෙන මුදල වෙන්වන්නේ වකුගඩු රෝගීන්ගේ ප්‍රතිකාරවලට. ඉතින් ඒක සමාජසේවයක්, යුතුකමක්, වගකීමක්. ඒ නිසා නරඹන්න එන්න, නරඹන්න එන්න නොහැකි වුණත් ප්‍රවේශ පත්‍රයක් ලබා ගෙන අප වැනිම අහිංසක ජීවිතයක් සුවපත් කරන්න එකතු වෙන්න කියලා ආදරෙන් ආරාධනා කරනවා. සමාජය සුවපත් කරන්න මෙවැනි පරාර්ථකාමී වැඩසටහන් තව ඇති වේවා කියලා ප්‍රාර්ථනා කරනවා"

දීපිකා ප්‍රියදර්ශනී දැක්වූයේ මෙවැනි අදහසක් "සුවසර ගී දැහැන කියන්නේ අවුරුදු ගණනක් තිස්සේ ලංකාවේ වකුගඩු රෝගයෙන් පීඩා විඳින ජනතාව වෙනුවෙන් කරන්නා වූ ඉතාම වටිනා ප්‍රසංගයක්. මම හිතන්නේ ඒ වගේ ප්‍රසංගයක් ලංකාවේ තිබිලම නැහැ.  එක දිගට එකම ආකාරයකින්  වසර ගණනක්  සියලු දෙනා එකතුවෙලා කරන ප්‍රසංගයක් මේක. ඉතින් ඒ හැම දේකින්ම වකුගඩු රෝගීන්ට මුළු අවුරුද්දක් පුරා dialysis කරන්න විශාල මුදලක් එකතු කරගන්න පුළුවන් වෙනවා. වකුගඩු රෝගය කියන්නේ ඉතාම ඛේදනීය තත්ත්වයක්. විශාල මුදලක් අවශ්‍ය වෙනවා ලේ මාරු කරන්න. සංජය හෙයියන්තුඩව වෛද්‍යවරයාගේ අප්‍රතිහත ධෛර්‍ය සහ මිනිසුන් සමඟ පවතින ගනුදෙනුව නිසා තමයි මෙවැනි කාර්යයක් කිරීමට හැකියාව ලැබෙන්නේ.

ඉතින් අපිට ආදරේ කරන රසික හිතවතුන් සියලුම දෙනාට මම ආරාධනා කරනවා මෙවරත් මේ සත්කාරයට එන්න. මොකද මේක ලොකු පිංකමක්, ඔබ අපි සියලු දෙනාම කරගන්න. ඔබලාට පුළුවන් ජනතාව විදිහට දුවා දරුවන් සමඟ මේ ප්‍රසංගය නරඹන්න එන්න."

කෞශල්‍යා ලක්ෂානි