ජ්‍යෙෂ්‍ඨ මහාචාර්ය අර්ජුන ද සිල්වා මහතා ශ්‍රී ලංකා තහනම් උත්තේජක මර්දන නියෝජ්‍යායතනයේ (SLADA) සේවයෙන් ඉකුත්දා සමු ගත්තේය. වෛද්‍ය වෘත්තිකයෙකු ලෙස මෙරට පතළ නමක් දිනා සිටින අර්ජුන ද සිල්වා මෙරට ක්‍රීඩා කේෂ්ත්‍රයේද පතළ චරිතයක් වූයේ ශ්‍රී ලංකා තහනම් උත්තේජක මර්දන නියෝජ්‍යායතනයේ සභාපතිවරයා ලෙස වසර 13 ක කාලයක් පුරා ඉටු කළ සංකීර්ණ මෙහෙවර නිසාය.

slada හෙවත් තහනම් උත්තේජක නියෝජ්‍යායතනයේ සේවයෙන් ඉල්ලා අස්වීම පිළිබඳව මාධ්‍ය හමුවක් කැඳවමින් 59 හැවිරිදි ජ්‍යෙෂ්ඨ මහාචාර්යවරයා පැවැසුවේ පළපුරුද්ද ඇති තවත් අයෙකුට අවස්ථාව සලසාදීම සඳහා තමන් මෙම තීරණයට පැමිණි බවයි.

“එය කාගෙවත් බලපෑමකට නොවේ. හරි වෙලාවට තනතුරුවලින් යායුතුයි. කෙනෙක් තනතුරකින් ඇයි යන්නේ නැත්තේ? කියලා අහනවාට වඩා ඇයි යන්නේ කියලා මගෙන් අහනවාට මම කැමැතියි.”‍ මාධ්‍යවේදීයෙකු ඇසූ පැනයකට මහාචාර්යවරයා එසේ පිළිතුරු දුන්නේ අද කාලයට වටිනා අරුතක්ද එක් කරමිණි. 

2010 පොදු රාජ්‍ය මණ්ඩලීය ක්‍රීඩා උලෙළේදී රන් පදක්කමක් දිනා ගත් ශ්‍රී ලංකා බොක්සිං ක්‍රීඩක මංජු වන්නිආරච්චි තහනම් උත්තේජක චෝදනා ලබා තහවුරුවීමෙන් ඔහුගේ රන් පදක්කම අහෝසි කෙරුණි. එහිදී ශ්‍රී ලංකාවට ඇතිවූ අපකීර්තිය සැළකිල්ලට ගනිමින් තහනම් උත්තේජකවලින් තොර මෙරට ක්‍රීඩා කේෂ්ත්‍රයක් සැකසීම සඳහා 2013 අංක 33 දරන ක්‍රීඩාවල යෙදීමේදී උත්තේජක ද්‍රව්‍ය ගැනීමට එරෙහි සම්මුති පනත ප්‍රකාරව ශ්‍රී ලංකා තහනම් උත්තේජක නියෝජ්‍යාතනය ස්ථාපිත කෙරුණි.

පසුගිය සැප්තැම්බර් 18 වැනිදා ජ්‍යෙෂ්ඨ මහාචාර්ය අර්ජුන ද සිල්වා සේවය නිල වශයෙන් හැර යනවිට එහි සභාපති ධූරය වසර 13 ක් දැරීය. ඊට පෙර ඔහු වසර 2011 දී ක්‍රීඩා වෛද්‍ය සහ තහනම් උත්තේජක මර්දන අංශයේ අධ්‍යක්ෂ ජනරාල් ධූරයේ පත්වීම් ලබමින් කටයුතු කරමින් සිටියේය.

ඔහුගේ ගෙවී ගිය සේවා කාලය තුළදී මෙරට ක්‍රීඩා කේෂ්ත්‍රයෙන් තහනම් උත්තේජක හෙවත් ක්‍රීඩක ක්‍රීඩිකාවන් කට වචනයට කියන ඩ්‍රග්ස් මුලිනුපුටා දැමිම සඳහා සිය කාර්ය මණ්ඩලය ඔස්සේ විනයගරුක ප්‍රශංසනීය මෙහෙවරක යෙදී තිබේ.

ඔහුගේ පුළුල් මෙහෙවර මෙසේ ඔහු ප්‍රකාශ කර සිටියේය.

“ජනාධිපතිවරුන් තිදෙනෙකු හා ක්‍රීඩා ඇමැතිවරුන් අට දෙනෙකු යටතේ මම තනතුරේ කටයුතු කළා. එතනදී ඒ කාගෙන්වත් මට බලපෑමක් එල්ල වුණේ නෑ.”‍ 

තහනම් උත්තේජක නියෝජ්‍යායතනය එම විෂයේ කටයුතු කරන ආසියාවේ හොඳම රටවල් දහය අතර හය වැනි ස්ථානය දක්වා ගෙන ඒමට මහාචාර්යවරයාගේ නායකත්වය සමත්ව තිබේ.

ඔහුගේ සේවයේදී ශ්‍රී ලංකාව ලබාගත් ඉහළ ප්‍රතිලාභ කීපයක් මෙසේය.

ශ්‍රී ලංකා තහනම් උත්තේජක නියෝජ්‍යායතනයට කොළඹ සුගතදාස ක්‍රීඩා සංකීර්ණයට යාබදව අති නවීන පහසුකම්වලින් සමන්විත අංග සම්පූර්ණ ගොඩනැගිලි සංකීර්ණයක් ලැබීම, එහි අතිනවීන විද්‍යාගාරයක් ස්ථාපිත කිරීම, ඒ තුළ විශ්ව විද්‍යාල සිසුන්ට පර්‌යේෂණ කටයුතු සඳහා පහසුකම් සලසාදීම, රාජ්‍ය විශ්ව විද්‍යාල සමග අවබෝධතා ගිවිසුම්වලට එළඹීම, නව පර්‌යේෂණ පත්‍රිකා ඉදිරිපත් කරමින් සමාජ ප්‍රගමනයට දායකවීම, කොවිඩ් සමයේදී ආසියානු හා ශාන්තිකර අමාත්‍ය මණ්ඩල 15 වැනි හා 18 වැනි යන රැස්වීම් දෙකක් පැවැත්වීමෙන් ශ්‍රී ලංකාවේ සාර්ථකත්වය ජාත්‍යන්තරයට ගෙනයාම.

ලෝක ජනගහනය ආසන්න වශයෙන් 60% ක් හා ගෝලීය තරුණ ජනගහනය 80% ක් පමණ ආසියාව නියෝජනය කරන බැවින් උත්තේජක ද්‍රව්‍ය භාවිතයට එරෙහි ගෝලීය සටනේදී දකුණු ආසියානු ශාන්තිකර කලාපයේ මැදිහත්වීම වැදගත් වේ. එම රැස්වීම් පැවැත්වීමේ වැදගත්කම ගැන මහාචාර්යා දැක්වූයේ එවන් අදහසකි.

ලෝක තහනම් උත්තේජක නිවාරණ ආයතනය (WADA) මෙන්ම ICC ය හෙවත් අන්තර් ජාතික ක්‍රිකට් සභාවේත් ඉහළ ප්‍රසාදයක් පසුගිය කාලය පුරා මෙරට තහනම් උත්තේජක නියෝජ්‍යායතනයට හිමිවූයේ ජ්‍යෙෂ්ඨ මහාචාර්ය අර්ජුන ද සිල්වා මහතාගේ කැපවීම තුළ බව කේෂ්ත්‍රයේ අති බහුතරයකගේ අදහසයි.

ආමාශ අන්ත්‍ර රෝග පිළිබඳ විශේෂඥයෙකු වූ අර්ජුන ද සිල්වා කැලණිය විශ්ව විද්‍යාලයේ වෛද්‍ය පීඨයේ වෛද්‍ය අංශයේ ප්‍රධානියා ලෙසත් මේ වන විට කටයුතු කරයි. ජාතික ක්‍රීඩා සභාවේ සාමාජිකයෙකු ලෙසත් ඔහු මෙරට ක්‍රීඩාවේ ප්‍රවර්ධනයට ලබාදී තිබෙන දායකත්වය තවදුරටත් පුළුල් බවක් පෙන්වයි.

ධූරයෙන් සමු ගත් මාධ්‍ය හමුවේදී මාධ්‍යවේදීහු ඔහුගෙන් ප්‍රශ්න රැසක් විමසූහ.

“මෑතකදී ශ්‍රී ලංකා ක්‍රිකට් කණ්ඩායමේ ක්‍රීඩකයෙකු වගේම දැල්පන්දු ක්‍රීඩිකාවකුත් තහනම් උත්තේජක චෝදනා ලැබුවා. එය ඉතා අවාසනාවන්ත තත්ත්වයක්. ක්‍රීඩකයෙක් වගේම ක්‍රීඩිකාවක් කිසියම් වෛද්‍යවරයෙකු ළඟට ප්‍රතිකාර පිණිස යනවා නම් තමන් ක්‍රීඩකයෙකු බව අනිවාර්යයෙන්ම ඔහුව දැනුවත් කළ යුතුයි.

මොකද වෛද්‍යවරයා ඖෂධ නිකුත් කිරීමේදී එම දැනුවත්වීම ඉතාම වැදගත් වෙනවා. වෛද්‍යවරයා නිකුත් කරන ඖෂධවල ඇතැම් විට තහනම් උත්තේජක සංඝටක අඩංගු විය හැකියි. එහෙම වුණු අවස්ථාත් තිබෙනවා.

හොදම දේ තමයි චෝදනා නොලබන්න පරෙස්සම්වවීම හා දැනුවත්වී සිටීම. පසුගිය කාලයේදී බර ඉසිලීම්, මලල ක්‍රීඩා, රග්බි, පාපැදි ආදී රටේ ක්‍රීඩා ඉසව් කීපයකම ක්‍රීඩක ක්‍රීඩිකාවන්ට තහනම් උත්තේජක චෝදනා ලැබීමේ ප්‍රවණතාවයක් දැක්කා.

කායවර්ධන (බොඩි බිල්ඩින්) ක්‍රීඩා ඉසව්ව ගැන ප්‍රශ්නයක් තිබෙනවා. ක්‍රීඩා ඉසව්වක් ලෙස එහි තහනම් උත්තේජක විමර්ශන සිදු කළ හැකිදැයි කියලා. ඒ නිසා මම යෝජනා කළා ජතික මහ ක්‍රීඩා උලෙළෙන් කායවර්ධන ක්‍රීඩාව ඉවත් කරන්න කියලා.

මහාචාර්යවරයා මාධ්‍යවේදීන්ට එසේ උත්තර බදිමින් කතා කළේය. අර්ජුන ද සිල්වා මාධ්‍යවේදීන් සමීපව ඇසුරු කළ ඔවුන්ගේ සමීපතම මිතුරෙකි. කෙතරම් කාර්යබහුල වූවත් ඔහු මාධ්‍යවේදීන්ගෙන් ලැබෙන දුරකථන ඇමැතුම් මග හැර සිටීමට උනන්දු නොවීය.

මහාචාර්ය අර්ජුන ද සිල්වා ගල්කිස්ස ශාන්ත තෝමස් විදුහලේ ආදි සිසුවෙකි.

නාමල් පතිරගේ