මේ දවස් වල වෙළෙඳාම කොහොමදැයි සොයාගෙන අපි පස්වැනි හරස් වීදියට ගියෙමු. හාල්, කුළුබඩු, අල, ලූනු, පරිප්පු, කරවල මේ ආදී මෙකී නොකී අත්‍යවශ්‍ය ආහාර ද්‍රව්‍ය අලෙවි කරනු ලබන තොග වෙළෙඳුන් කීපදෙනුකු පසු කරමින් අප ගොඩවූයේ හිමාල් ප්‍රේමචන්ද්‍ර මහතාගේ තොග වෙළෙඳසැල වෙතයි.
Q: මේ දිනවල බිස්නස් කොහොමද?
වෙළෙඳාමේ සරුවක් නම් නෑ මේදා පාර. පහුගිය දවස් වල උත්සව සමය කියලත් අපිට වැඩි වෙළෙඳාමක් තිබ්බෙත් නෑ. උත්සව සමය විතරක් නෙමෙයි 2024 අවුරුද්ද පුරාවටම වෙළෙඳාමේ අඩුවක් තිබ්බා. මේ අවුරුද්දේවත් වෙළෙඳාම සරු වුණොත් හොදයි. තාම අවුරුද්ද පටන් ගත්තා විතරයි. ඒ නිසා ඉස්සරහට මොනවා වෙයිද කියලා දැන්ම කියන්නත් බෑ. වෙළෙදාම අඩුයි කිව්වට වෙළෙඳාම නෑ කියලා නෙමෙයි අපි කියන්නේ. සාමාන්‍ය පරිදි වෙළෙඳාම් වෙනවා. හැබැයි කලින් අවුරුදුවලට සාපේක්ෂව අඩුයි. සමහරු කියනවා වෙළෙඳාම අඩු වෙන්න බඩු හිගය බලපානවා කියලා. ඒවුණාට වෙළෙදාම අඩු වුණාට බඩුවල නම් ගිඟයක් නෑ. බඩු ඕන තරම් තියනවා.
Q: අඩුවීමට බලපෑ හේතු මොනවාද?
මිනිස්සු අතේ සල්ලි නැති නිසා තමයි අපිට වෙළෙඳාම අඩු වෙලා තියෙන්නේ. මිනිස්සුන්ගේ ආදායම් වලට වඩා දැන් වියදම් වැඩී. ලයිට් බිල්, වතුර බිල්, ගෙවල් කුලී ගෙව්වාම මිනිස්සුන්ගේ අතේ සල්ලි ඉතුරු වෙන්නේ නෑ. වියදම් වැඩිනිසා මිනිස්සු ළග සල්ලි නෑ. ඒ නිසා අපිට වෙළෙඳාම් නෑ. ඕක තමයි සරලම හේතුව වෙළෙදාම අඩු වෙන්න. ඊට අමතරව තොග වෙළොන්ඳෝ වෙන අපිට බලපාන්නේ මිල ඉහළ පහළ යාම. අද තියන මිල නෙමෙයි හෙට වෙද්දි. එක්කෝ වැඩි වෙලා නැත්තම් අඩු වෙලා. ඒකත් රුපියලයකින් දෙකකින් නෙමෙයි. ලොකු ගණන් වලින් වෙනස් වෙනවා. ඒ නිසා සිල්ලර වෙළෙන්ඳෝ ඉස්සර වගේ ගොඩක් බඩු ගන්නේ නෑ. අරන් ගිහින් තියාගන්න බෑනේ මිල වෙනස් වෙන නිසා. ඒ නිසා කලින් ගන්න බඩු ටිකෙන් බාගයයි දැන් ගන්නේ. සිල්ලර වෙළෙන්ඳෝ විතරක් නෙමෙයි අපි වුණත් බඩු තොග පිටින් ගන්නකොට දෙපාරක් හිතනවා මිල ගැන. මිල වැඩි වුණොත් අපිට ලාබයි. හැබැයි මිල අඩු වුණොත් අපිට පාඩු විදින්න වෙනවා.
ශෂිකා අබේරත්න
ඡායාරූපය - ඉසුරු පෙරේරා
