ජනපති - සජිත් එකඟතාවක


ජනමත විචාරණයක් හරහා කැමැත්ත විමසීමෙන් පසුව පාර්ලිමේන්තු මහ මැතිවරණයක් පැවැත්වීමට ජනපති මෛත්‍රීපාල සිරිසේන මහතාට දැන් වුවමනා වී තිබේ. ජනපතිවරයාට සමීප ආරංචි මාර්ගයන් සදහන් කළ පරිදි මේ සම්බන්ධයෙන් නීතිපති දප්පුල ද ලිවේරා මහතාගේ අදහස් විමසීමට ද ජනපතිවරයා කටයුතු කර තිබේ. එසේ කිරීමේ හැකියාවක් තිබෙන බවද නීතිපතිවරයා පෙරළා දැනුම් දී ඇත.

කෙසේ වෙතත් ජනපති සිරිසේන මහතාගේ නීති උපදේශකයින් දරන්නේ එසේ නොකළ යුතුව ඇති බවට මතකයකි. පාර්ලිමේන්තු මැතිවරණයක් පැවැත්වීමට ජනපතිවරයා තීරණය කළ ද, ඒ අරබයා පැනනැගී තිබෙන බාධක ගණනාවක් ජය ගැනීමට ද ඔහුට සිදුවේ. ඒ අතරින් ප්‍රධානම වන්නේ දේශපාලන පක්ෂවල සහාය, විශේෂයෙන් විපක්ෂයේ දේශපාලන පක්ෂවල සහාය, ඒ සදහා ලබාගැනීමයි. ජනපතිවරයා ගන්නා මෙවැනි තීරණයකට ඔවුන්ගේ සහාය නොලැබෙන බවක් පෙනෙන්නට තිබේ.

ගෙවුණු සති කිහිපය පුරාම ජනපති සිරිසේන මහතාගේ සිත අරක් ගෙන තිබුණේ මෙම කාරණයයි. 

එය කොපමණවීද යත්, ඔහු පසුගිය 3 වැනිදා සන්ධ්‍යාවේ දී විපක්ෂ නායක මහින්ද රාජපක්ෂ මහතා පවා හමුවිය. විපක්ෂ නායකවරයා ප්‍රමුඛ විපක්ෂයේ පාර්ලිමෙන්තු මන්ත්‍රීවරුන් තිදෙනෙක් සහ අගමැති රනිල් වික්‍රමසිංහ මහතා අතර විශේෂ හමුවක් පැවැත්වුනේ ද එදිනමය. පීඩාවට පත්ව සිටින ජනතාවට ආර්ථික පැකේජයක් හරහා සහන සැළසීමේ ක්‍රමයක් පවතින්නේ ද පිළිබදව සාකච්ඡා කිරීම අරමුණු කරගෙන එම හමුව පැවැත්වුන ද, පාර්ලිමෙන්තු මැතිවරණයක් පැවැත්වෙන්නේ ද යන්න සම්බන්ධයෙන් අගමැති වික්‍රමසිංහගෙන් විමසා සිටීමට රාජපක්ෂ මහතා එය අවස්ථාවක් කරගත්තේ ය.

“තවම ඒ ගැන තීරණයක් අරගෙන නැහැ” යයි අගමැතිවරයා දුන් පිළිතුර විය.

ජනපතිවරයා සහ විපක්ෂ නායකවරයා අතර හමුවක් පැවැත්වුනේ විශේෂකොටම පශ්චාත් පාස්කු ඉරිදා සංහාර තත්ත්වය සම්බන්ධයෙන් අදහස් හුවමාරු කරගැනීමටය. දැනට පැවැත්වෙමින් තිබෙන විමර්ශන සම්බන්ධයෙන් සහ ආරක්ෂක අංශවල සිදුකරන්නට යන වෙනස්කම් සම්බන්ධයෙන් ජනපතිවරයා, විපක්ෂ නායකවරයාව දැනුම්වත් කළේය. 

ජාතික බුද්ධි ප්‍රධානී ලෙස කටයුතු කරමින් සිටි අපරාධ පරීක්ෂණ දෙපාර්තමෙන්තුවේ හිටපු අධ්‍යක්ෂවරයකු සහ විශ්‍රාමික නියෝජ්‍ය පොලිස්පතිවරයකු වන සිසිර මෙන්ඩිස් මහතාව එම තනතුරින් ඉවත් කිරීමට දැනටමත් පියවර ගෙන තිබෙන බව ජනපතිවරයා පැවසුවේය. මෙන්ඩිස්ට ප්‍රථම මෙම තනතුර හෙබවූයේ ශ්‍රී ලංකා යුද හමුදාවේ නිලධරයන්ය. 

බුද්ධි අංශයේ නිලධාරියකු ලෙස කටයුතු කර දීර්ඝ කාලීන අත්දැකීම් ඇති මේජර් ජෙනරාල් චූලා සෙනෙවිරත්න මහතා ජාතික බුද්ධි ප්‍රධානියා ලෙස පත්වූ පළමු නිලධරයා වේ. ඔහු අද වන විට විශ්‍රාමිකය. ඔහුගෙන් පසුව එම තනතුරට පත්වූයේ හමුදා බුද්ධි අංශයේ අධ්‍යක්ෂ ජනරාල් ලෙස කටයුතු කළ මේජර් ජනරාල් කපිල හෙන්දවිතාරණ මහතාය. ජනපති සිරිසේන මහතා දැන් ජාතික බුද්ධි ප්‍රධානියා ලෙස අභිනවයෙන් පත්කර තිබෙන්නේ මේජර් ජනරාල් රුවන් කුලතුංග මහතාය. බුද්ධි කටයුතු සම්බන්ධයෙන් පුහුණුව ලබා තිබෙන හෙතෙම ශ්‍රී ලංකා යුද හමුදා සැහැල්ලු අවි රෙජිමෙන්තුවේ අණදෙන නිලධාරියා ද වේ.

සිය පූර්වතමයා සමග පැවැති සාකච්ඡාවේදී වසරාවසානයේ පැවැත්වීමට නියමිත ජනපතිවරණයට ප්‍රථමයෙන් පාර්ලිමේන්තු මැතිවරණයක් පැවැත්වීමට තිබෙන අවස්ථාව සම්බන්ධයෙන් ජනපති සිරිසේන මහතා අවධානය යොමු කළේය. මේ සම්බන්ධයෙන් තමා නීතිපති අදහස් ද විමසූ බව ඔහු කීවේය.

රාජපක්ෂ මහතා මේ සම්බන්ධයෙන් කිසිදු ප්‍රතිචාරයක් නොදැක්වූ අතර, ඒ වෙනුවට ඔහු ජනපතිවරයාට වෙනත් ප්‍රශ්න රාශියක් යොමු කළේය. රටේ සිදුවෙමින් පවතින දේ සැළකිල්ලට ගැනීමේ දී පාර්ලිමේන්තු මැතිවරණයක් පැවැත්වීම දැන් අත්‍යාවශ්‍ය කාරණයක් වී තිබෙන බවත්, අපේක්ෂා ඉටුකරන රජයක් බලයට පත්කර ගැනීම සදහා ජනතාවට අවස්ථාවක් සළසාදිය යුතුව තිබෙන බවත්, ජනපතිවරයා පැවසුවේය. 

කෘතහස්ථ දේශපාලඥයකු වන රාජපක්ෂ මහතා මෙම අවස්ථාවේ දී සිය දේශපාලන විඥානය අනුව යමින්, මේ සම්බන්ධයෙන් තමාට විපක්ෂයේ දේශපාලන පක්ෂවල නායකයින්ගේ අදහස් විමසීමට සිදුවන බව කීවේය. වසරාවසානයේ පැවැත්වීමට නියමිත ජනපතිවරණය, ඒ අයුරින්ම පැවැත්විය යුතුව තිබෙන බව විපක්ෂයේ ප්‍රධාන දේශපාලන පක්ෂය වන ශ්‍රී ලංකා පොදු ජන පෙරමුණේ දැඩි ස්ථාවරයයි.

සිරිසේනගේ කොස්ඇට බාලා දෙන්න මෙතනට ඇවිල්ලා නැහැ, එම පක්ෂයේ ජේ්‍යෂ්ඨ නායකයෙක් පැවසුවේ ය.
පාර්ලිමේන්තු මැතිවරණයකින් එක්සත් ජාතික පක්ෂය පරාජයට පත්වනු ඇතැයි තිබෙන විශ්වාසය, පළමුව පාර්ලිමේන්තු මැතිවරණයක් පැවැත්වීමට ජනපති සිරිසේන මහතා මුල් කරගෙන සිටින ප්‍රධාන සාධකයයි. එවැන්නක් හමුවේ එක්සත් ජාතික පක්ෂ නායක රනිල් වික්‍රමසිංහ මහතාට එම පක්ෂයේ ජනපති අපේක්ෂකයා ලෙස ඉදිරිපත්වීමට අවස්ථාවක් නොලැබෙනු ඇතැයි ද, එය පක්ෂයේ දැඩි අර්බුදයක් ඇතිවීමට මගපාදනු ඇතැයි ද, ජනපතිවරයා විශ්වාස කරයි. කොටින්ම කියතොත්, අගමැතිවරයාට එදිරිව ඔහු දියත් කර තිබෙන සටනට දැන් හිමිව තිබෙන්නේ ජාතික මට්ටමේ ප්‍රමුඛතාවයකි. 

පක්ෂ නායකත්වය වික්‍රමසිංහ මහතාගෙන් වෙනකෙකුට පවරා දී, එම නව නායකයා පක්ෂයේ ජනපති අපේක්ෂකයා ලෙස ඉදිරිපත්කිරීමේ වුවමනාව තිබෙන පිරිසක් ද එක්සත් ජාතික පක්ෂයේ සිටින බව රහසක් නොවේ. මේ අරබයා අවධානයට ලක්ව තිබෙන එක්සත් ජාතික පක්ෂ සාමාජිකයන් දෙදෙනෙකි. 

පළමුවැන්නා සජිත් ප්‍රේමදාස මහතාය. ඔහුට සහාය දැක්වීමට ජනපතිවරයා විවෘතවම ඉදිරිපත්ව සිටින අතර, එසේ වුවත් එවැනි සහායක් ලබාගැනීම ප්‍රේමදාස මහතාට දේශපාලන හංස ගීතයක් වනු ඇත. 

කතානායක කරූ ජයසූරිය මහතා දෙවැන්නාය. ඔහු මේ වන විට දිගින් දිගටම සිවිල් සමාජ සංවිධාන මෙන්ම කොළඹ රාජ්‍යතාන්ත්‍රික ප්‍රජාව පවා හමුවෙමින් සිටී. එමෙන්ම, පක්ෂයට වුවමනාවක් තිබේ නම්, එක්සත් ජාතික පක්ෂයේ ජනපති අපේක්ෂකයා ලෙස ඉදිරිපත්වීමට තමා සූදානම් බව ද, ජයසූරිය මහතා ප්‍රසිද්ධියේම ප්‍රකාශ කර තිබේ.

වචනය හා ක්‍රියාව අතර බොහෝ අඩුලුහුඬුකම් පවතින බැව් ප්‍රත්‍යක්ෂ කරමින්, ජනපති සිරිසේන මහතා ගෙන එන්නට යන අලුත්ම තුරුම්පුවට තිබෙන්නේ සාර්ථකවීමට වඩා අසාර්ථකවීමේ ලකුණුය. එහි ලා වඩාත්ම වැදගත් වන්නේ දේශපාලන පක්ෂවල සහාය ලබාගැනීමය. විපක්ෂයට නායකත්වය දෙන ශ්‍රී ලංකා නිදහස් පක්ෂයට මෙයට එකහෙළාම විරුද්ධත්වය දක්වනු ඇති අතර, එක්සත් ජාතික පක්ෂය ප්‍රමුඛ එක්සත් ජාතික පෙරමුණේ හැසිරීමද නොකිවමනාය. 

සියල්ලට ඉහළින් තිබෙන ප්‍රධානම පැනය වන්නේ ජනපති සිරිසේන මහතාගේ නායකත්වය යටතේ වන ශ්‍රී ලංකා නිදහස් පක්ෂය, ඔහුගේ මෙම නව සැළසුමට සහයෝගය දක්වනු ඇති ද යන්නය. යන්තම් පසුගිය සතියේ එම පක්ෂයේ පාර්ලිමෙන්තු මන්ත්‍රීවරුන් 23 දෙනෙක්, එළැඹෙන ජනපතිවරණයේ පක්ෂයේ ජනපති අපේක්ෂකයා විය යුත්තේ ජනපති මෛත්‍රීපාල සිරිසේන මහතාම යැයි සදහන් කර, ඔවුන්ගේ අත්සනින් යුත් ලිපියක් ජනපතිවරයාට භාරදීමට කටයුතු කිරීමට එයට හේතුවය. එයින් අනතුරුව තමා ශ්‍රී ලංකා නිදහස් පක්ෂයේ ජනපති අපේක්ෂකයා ලෙස ඉදිරිපත් වන බවට ජනපතිවරයා ප්‍රසිද්ධ ප්‍රකාශයක් සිදුකිරීමට නියමිතව තිබිණ. නමුත් එය සිදුවූයේ නැත. පාර්ලිමේන්තු මන්ත්‍රී පිරිස දැන් සිටින්නේ අතිශය කෝපයට පත්වය.

මෙසේ ලිපියක් සම්පාදනය කිරීමට තුඩු දුන්නේ පසුගිය මස 28 වැනිදා පැවැති කැබිනට් රැස්වීමේ දී, එක්සත් ජාතික පක්ෂයෙක් ජයග්‍රහණය කළ හැකි අපේක්ෂකයකු ඉදිරි ජනපතිවරණයට ඉදිරිපත් කරන්නේ නම් එම අපේක්ෂකයාට තම සහාය හිමිවන බවට ජනපතිවරයා ප්‍රකාශයක් සිදුකර ඇතැයි රාවයක් පළවීමය. 

මෙය ශ්‍රී ලංකා නිදහස් පක්ෂයේ පාර්ලිමේන්තු මන්ත්‍රීවරුන් අතිශය කෝපගැන්වීමට හේතුවක් වූ අතර, වහාම ජනපතිවරයා හමුවූ ඔවුහු කියා සිටියේ සිය දේශපාලන අනාගතය ගැන තීරණයක් ගැනීමේ අයිතිය හරි නම් ඔවුන්ටම ලබාදිය යුතුව තිබෙන බවය. එවැනි ප්‍රකාශයක් සැබැවින්ම සිදුකර තිබුණත්, ජනපතිවරයා සිය පාර්ලිමේන්තු මන්ත්‍රී කණ්ඩායම හමුවේ එසේ සිදුනොකළ බව තරයේම කියා සිටි අතර, එය ඉහත සදහන් කළ ලිපිය සම්පාදනය කිරීමට මග පෑදීය. 

පක්ෂයේ ජනපති අපේක්ෂකයා ලෙස මෛත්‍රීපාල සිරිසේන මහතාට අවස්ථාව ලබා දීමට කැමැත්ත පළකරන බව දන්වා එම ලිපියට අත්සන් යෙදූ ඔවුහු, පක්ෂයේ ජනපති අපේක්ෂකයා ලෙස ඉදිරිපත් වන බවට ප්‍රසිද්ධ ප්‍රකාශයක් කරන ලෙසද ජනපතිවරයාට බල කර සිටියහ. නමුත් මේ දක්වාම එවැන්නක් සිදුව නොමැත. දැන් අපේක්ෂිත ජනමත විචාරණයට දේශපාලන පක්ෂ බහුතරයක් විරෝධයක් දක්වනු ඇති වාතාවරණයක, ජනපතිවරයා තවදුරටත් හුදකලාවීමේ අවදානමක් පැන නැග තිබේ. 

කෙසේවුවත් ජනමත විචාරණයක් පැවැත්වීමට ජනපතිවරයා අතිශයින් උනන්දු අතර, එයට හේතුව වෙනත් කාරණයකි. එය නම් පාස්කු ඉරිදා සංහාරය සම්බන්ධයෙන් විමර්ශන පැවැත්වීමට පාර්ලිමෙන්තු තේරීම් කාරකසභාවක් පත්කිරීමට එක්සත් ජාතික පෙරමුණු රජය පියවර ගැනීමත්, එම තේරීම් කාරකසභාව හමුවේ අනාවරණය වෙමින් තිබෙන කාරණා හමුවේ තමා දිනෙන් දිනම අපහසුතාවට පත්වෙමින් සිටීමත් සැළකිල්ලට ගෙන, ජනමත විචාරණයක් හරහා එක්සත් ජාතික පෙරමුණු රජයට එකට - එක කිරීමට දැන් එළැඹ තිබෙන්නේ තම වාරයයැයි හැගීමක් ඔහුට තිබීමය. 

පසුගිය 7 වැනිදා පැවැති හදිසි කැබිනට් මණ්ඩල රැස්වීමේ දී, මෙම පාර්ලිමෙන්තු තේරීම් කාරකසභාව පත්කර තිබෙන්නේ පාස්කු ඉරිදා සංහාරයේ දුෂ්ඨයා තමා බව පෙන්වීමටයැයි ඔහු චෝදනා කළේය. මේ පසුපස සිටින්නේ අගමැති වික්‍රමසිංහ බව ද ඔහු කීවේ ය.

එය රාජ්‍ය නායකයා ලෙස තමාව අපහසුතාවයට පත්කිරීමට ගන්නා උත්සාහයක් ලෙස ද ජනපති සිරිසේන මහතා හඳුන්වාදුන්නේය. 

මෙම පාර්ලිමේන්තු තේරීම් කාරකසභාව ඔහුට එරෙහිව දෝශාභියෝගයක් ගෙන ඒම අරබයා තැබුනු  මුල් පියවරක් ලෙස ද සැළකිය හැකි බවද ජනපතිවරයාට සමීප වෙනත් ආරංචි මාර්ගයන් සදහන් කළ අතර, අවැසි තරම් කාලයක් පැවතුනද, නුදුරේදීම ජනපතිවරණයක් පැවැත්වීමට නියමිත නිසා, ජනපතිවරයාට එරෙහි දෝශාභියෝගයක් ඉදිරිපත් කිරීම දුෂ්කර විය හැකි බවද, එම ආරංචි මාර්ගයන් වැඩිදුරටත් පැවසුවේය. මෙවන් වාර්තාවලට තවත් තටු ලැබුණේ වැඩබලන අමාත්‍යවරුන් පත්කිරීම ව්‍යවස්ථාවිරෝධී බව සදහන් කර අගමැතිවරයා, ජනපතිවරයා වෙත ලිපියක් යොමු කිරීමත් සමගය.

ඔබ සියලුදෙනා 2015 ජනපතිවරණයේ දී මට සහාය දුන්නා. දැන් ඔබ සියලුදෙනා මට ද්‍රෝහීවෙමින් සිටිනවා, ඔහු පැවසුවේ ය.

“මාව ඉවර කරලා තියෙන්නේ. දැනටමත් මම ඉවරයි” ජනපතිවරයා කීවේ ය.

අගමැතිවරයා අදහස් දක්වමින්, පාර්ලිමේන්තු තේරීම් කාරකසභාව අහෝසි කිරීම අපහසු විය හැකි වුවත්, ජනපතිවරයාගේ අදහස් එහි සාමාජිකයන් වෙත දන්වා, යම් යම් ක්‍රමවේදයන් ගොඩනඟා ගැනීමට අවස්ථාව තිබෙන බව පෙන්වා දුන්නේය. 

එක්සත් ජාතික පක්ෂ නියෝජ්‍ය නායක සජිත් ප්‍රේමදාස මහතාද ජනපති සිරිසේන මහතා හා එකඟ වෙමින්, පාර්ලිමේන්තු තේරීම් කාරකසභාව මේ ආකාරයට ක්‍රියාත්මක වෙමින් තිබීම අසාධාරණ බව පැවසුවේ ය.

‘ද සන්ඬේ ටයිම්ස්’ දේශපාලන තීරුව ඇසුරිනි
පරිවර්තනය : කෝවිද ගුණසේකර