තුන්වැනි පන්තියේ සමාජ ව්‍යාපාරයට අනුව ‘ඉල්ලන් කෑම’ හොඳම එක නොවැම්බර් 28 වැනිදා සිදුවිය. ඒ එ.ජ.නි.ස ජාතික ලැයිස්තු මන්ත්‍රී ඒ. එච්. එම් අස්වර් මහතා සිය මන්ත්‍රී ධූරයෙන් ඉල්ලා අස්වූ අතර එම මන්ත්‍රී ධූරය රිෂාඞ් බදියුදීන්ගේ නායකත්වයෙන් යුත් සමස්ත ලංකා මහජන කොංග්‍රසය නියෝජනය කළ නැගෙනහිර පළාත් සභා මන්ත්‍රී අමීර් අලී වෙත පිරිනමන ලදී.
මෙම මන්ත්‍රී ගනුදෙනුව හුදෙක්ම ජනාධිපතිවරණය ඉලක්ක කර ගනිමින් ඒ වන විට ආණ්ඩුවෙන් ගිලිහෙමින් තිබුණ මුස්ලිම් ජන බලවේගය නැවත ආණ්ඩුව දෙසට හරවා ගැනීම සමඟ රිෂාඞ් බදියුදීන් සතුටට පත් කොට සන්ධානය තුළ රඳවා ගැනීම මූලීක උපක්‍රමය වූවාට සැක නැත. මේ අනුව අමීර් අලිහට මන්ත්‍රී ධූරය ලබාදුන් අතර දෙසැම්බර් 13 වැනි දින ඔහු පාර්ලිම්න්තුවේ දී දිවුරුම් දෙන ලදී. ඉන් අනතුරුව ඔහුට නියෝජ්‍ය අමාත්‍ය ධූරයක් ද පිරිනැමීය. එහෙත් ඒ සියලු තනතුරුද සමඟ ඉන් දින කිහිපයකට පසුව ඔහු රිෂාඞ් සමඟ පොදු අපේක්‍ෂකයාට සහයෝගය දැක්වීය. සැබවින්ම එය හාස්‍යොත්පාදක දේශපාලන ප්‍රහසනයක් බඳුය.
එවැනිම හාස්‍ය උත්පාදක ප්‍රහසනයක ආරම්භයක් ලෙස ‘මා ළඟ ඔය කාගෙ කාගෙත් ෆයිල් තියෙනවා’ යනුවෙන් මහින්ද රාජපක්‍ෂ ජනාධිපතිතුමා විසින් කරන ලද ප්‍රකාශය ද සැලකිය හැකිය. ජනාධිපතිතුමාගේ එම ප්‍රකාශයට ‘කට කහනවට මෙන්’ පිළිතුරක් දුන් රෙජිනෝල්ඞ් කුරේ ඇමතිතුමා ‘ජනාධිපතිතුමා හොරකම් කරපු එවැනි ඇමතිවරුන්ගේ ෆයිල් එතුමාගේ අතේ තබාගෙන හංගගෙන එම මැති ඇමැතිවරුන් බයකරනවා නම් ඒකත් වැරදි. එමඟින් කියවෙන්නේ ජනාධිපතිතුමා හොරුන් රකින බවයි’ යනුවෙන් ප්‍රකාශ කළේය. සැබවින්ම ජනාධිපතිවරණ ප්‍රචාරක කටයුතු අතර පළ වූ රෙජිනෝල්ඞ් කුරේ මහතාගේ මෙම අදහසට ජනතාවගෙන් ලැබුණේ ඉහළ ප්‍රතිචාරයකි.
මහින්ද රාජපක්‍ෂ ජනාධිපතිතුමා නෙළුම් පොකුණ රඟහලෙහි පැවති පූජා භුමි සන්නස් පත්‍ර ප්‍රදානය කිරීමේ උත්සවයකට නොවැම්බර් මස 28 වැනි දින සහභාගි වූයේය. මේ වන විට විධායක ජනාධිපති ධූරය අහෝසි කිරීම යන විපක්‍ෂයේ සටන් පාඨය එතුමාට දැඩි දේශපාලන අතුල් පහරක් බවට පත්ව තිබුණි. ඊට ප්‍රතිචාර දැක්වූ ජනාධිපතිතුමා ප්‍රකාශ කළේ විධායක ජනාධිපති ධූරය අහෝසි කළ හැක්කේ පාර්ලිමේන්තුවේ තුනෙන් දෙකක බලය හිමි තමන්ට පමණක් බවයි. එහෙත් එය අහෝසි කිරීමට තමා ද ඉදිරියේ දී කටයුතු කරන බවක් එතුමා තුළින් ප්‍රකාශ නොවීය.
තවද, එදිනම ජනාධිපතිවරණ උණුසුම තීව්‍ර කරන මට්ටමේ දානමය පින්කමකට මුල පිරිණි. ඒ ඊට වසරකට පමණ පෙර මියගිය ආර්. අයි. ටී. අලස් මහතාගේ දානමය පින්කමයි. එම දාන ගෙදරට පැමිණි පිරිස අතර මහින්ද රාජපක්‍ෂ මැතිතුමා, ගෝඨාභය රාජපක්‍ෂ, චම්පික රණවක, සජිත් ප්‍රේමදාස හා උදය ගම්මන්පිල එකම කාමරයක් තුළ හිඳ සුහදව කථාබහක නිරත වූහ. මේ අතරින් වඩාත්ම දේශපාලනමය වටිනාකමක් සහිත ද්විපාර්ශ්වික කථාව බවට පත් වන්නේ උදය ගම්මන්පිල මහතාගේ බිරිඳ හා ටිරාන් අලස් මහතා අතර වූ කථාබහ වන්නට ඇත.
මේ අතර බොහෝ දෙනකු අපේක්‍ෂාවෙන් සිටි දේශපාලනමය පුවත නොවැම්බර් 29 වැනිදා අසන්නට ලැබුණි. ඒ නුවරඑළිය දිස්ත්‍රික් එ.ජ.නි.ස මන්ත්‍රී නවීන් දිසානායක මහතා යළි එ.ජා.පයට එක්වීමය. ඔහු සන්ධානයෙන් ඉවත් වීමෙන් පසුව විපක්‍ෂ නායක කාර්යාලයේ දී මාධ්‍ය සාකච්ඡාවකට ද සහභාගි වූ අතර එහිදී තමාට සිදුවූ දේශපාලන අසාධාරණය පිළිබඳ දිර්ඝ විස්තරයක් කළේය. තවද, තමා සන්ධාන මන්ත්‍රීවරයකු හා ඇමතිවරයකු ලෙස කටයුතු කළ ද නුවර එළිය ජනතාවට කිසිදු වැදගත් සේවයක් ඉටු කිරීමට අවස්ථාව නොලැබුණු බවද ඔහු පැවසීය. පොදු මාධ්‍ය සාකච්ඡාවේ දී නවීන් දිසානායක මහතා හෙළිකළ ආකාරයට ඔහුට මෙම තීරණය නොගෙන සිටීම වෙනුවෙන් ආණ්ඩුව මිලියන සියයක් ලබාදීමට උත්සහ කළ බව ද පැවසීය. කෙසේ වෙතත් නවීන්ගේ මෙම ප්‍රකාශය පිළිබඳ රහස් පොලීසිය විසින් පරීක්‍ෂණයක් ද ආරම්භ කරන ලදී.
මෛත්‍රී ඇමතිතුමාගේ පළමු ප්‍රචාරක රැස්වීම පොළොන්නරුවේ දී පැවැත්වූයේ නොවැම්බර් 30 වැනිදාය. පොළොන්නරුවේ පොදු අපේක්‍ෂක මැතිවරණ ව්‍යාපාරය බාරව සිටියේ පේෂල ජයරත්න හා ඩඞ්ලි සිරිසේනය, ඒ වන විට පොළොන්නරුව දිස්ත්‍රික්කය නියෝජනය කළ කිසිදු එ.ජා.ප. මන්ත්‍රීවරයකු නොවීය.
සකස් කළේ :
ප්‍රසන්න සංජීව තෙන්නකෝන්
