ඒ ආත්ම ශක්තියෙන් පරිපූර්ණව සිටි ප්‍රබල එක්සත් ජාතික පක්ෂ සාමාජිකයෙක් වූ අත්තනගල්ලේ ඒ. ඩබ්ලිව්. ජී. සෙනවිරත්න මහතාය. 

 

1952 මහා මැතිවරණයට ඒ. ඩබ්ලිව්. ජී. සෙනෙවිරත්න මහතා එජාප අපේක්ෂකයා වශයෙන් ප්‍රබල සටනක යෙදුණේ ශ්‍රීලනි පක්ෂයේ නායක ඇස්. ඩබ්ලිව්. ආර්. ඩී. බණ්ඩාරනායක  මහතා සමගය. 

 

1931 පටන් රාජ්‍ය මන්ත්‍රණ සභාවට නිතරගයෙන් පත්වූ 1936 දී ද ජයග්‍රහණය දෑතට ගත් බණ්ඩාරනායක මහතා 1947 මහා මැතිවරණයෙන් ද අත්තනගල්ල විජයග්‍රහණයක් ලැබීය. 1947 බණ්ඩාරනායක මහතාට ලැබුණු මුළු ඡන්ද සංඛ්‍යාව 31,463කි. ප්‍රතිවාදියා ලසසපයේ පළමු වැනි අපේක්ෂක චන්ද්‍රා ගුණසේකර ලැබූ ඡන්ද ප්‍රමාණය 4609කි. වැඩි ඡන්ද 26,854 කින් පරාජය විය.

 

1952 මහා මැතිවරණයට බණ්ඩාරනායක මහතා තරග කළේ ශ්‍රී ලංකා නිදහස් පක්ෂයෙනි. එජා පක්ෂයේ අපේක්ෂකයා ලෙස තරග වැදුණේ තරුණ ඒ. ඩබ්ලිව්. ජී. සෙනවිරත්න මහතාය. ඒ මහතා ප්‍රදේශයේ විශාල පොල් ඉඩම් හිමි අලි ඇතුන් ගව මහීෂ සහිත සම්පත් අයිති සියනෑ කෝරළේ චිර ප්‍රසිද්ධ ධනවතෙකි. 

 

බණ්ඩාරනායක මහතා ඡන්ද තිස්අටදහස් හැත්තෑපහක් ගනිද්දී සෙනෙවිරත්න මහතා ඡන්ද 5934ක් ලබා ගත්තේය. 

 

1956 දී බණ්ඩාරනායක මහතා අගමැති ධුරයට පත්වන බැව් යම්තම් දන්නා වැඩිහිටියෙක් පවා දැන ගෙන සිටියේය. බණ්ඩාරනායක මහතා ඡන්ද 45,016 ලබද්දී සෙනවිරත්න මහතා ඡන්ද 3019ක් ලබා ගත්තේය. 1960 මාර්තු මැතිවරණයට දිවංගත බණ්ඩාරනායක මහතා වෙනුවෙන් ඉදිරිපත් වූයේ ඔබේසේකර පවුලේ ජේ. පී. ඔබේසේකරය.

ඡන්ද ප්‍රතිඵල මෙසේය. 

 

ජේ. පී. ඔබේසේකර මහතා 20,985

ජේ. ඩබ්ලිව්. ජී. සෙනවිරත්න 5668

ගැමුණු කුලසේන ල.ස.ස.ප 1559

මහානාම වික්‍රමසිංහ 254 

වැඩි ඡන්ද 14,617 

 

1960 ජූලි මැතිවරණයෙන් ද ජේ. පී. ඔබේසේකර මහතා අත්තනගල්ල ජය ගත්තේය. සෙනෙවිරත්න මහතා පරාජය පිළිගත්තේය. 

 

1965 මහ මැතිවරණයට සිරිමාවෝ බණ්ඩාරනායක සමග ඒ. ඩබ්ලිව්. ජී. සෙනවිරත්න එජාපයෙන් ඉදිරිපත් වූයේ පක්‍ෂ හතක සහයෝගය ලබමිනි. ප්‍රතිවාදියාගේ වැඩි ඡන්ද 16,535න් සෙනවිරත්න මහතා පරාජයට පත්වූයේය. ලෝකයේ පළමුවන අගමැතිනියගෙන් ද සෙනවිරත්න මහතා පරාජයට පත්විය. රාජ්‍ය බලය හත් හවුලට ලැබුණි. පරාජිත එජාප අපේක්ෂකයන්ට සංස්ථා ධුර පදවි තාන්න මාන්න හිමිවිණි. 1970 මහා මැතිවරණයට සෙනෙවිරත්න මහතා ඉදිරිපත් නොවීය. අත්තනගල්ලේ පොල් වතු අධිරාජ්‍ය බිමට සමතලා කරමින් වහසි බස් දෙඩූ කථිකාචාර්ය ප්‍රවීණ දේශක ජේ. ආර්. පී. සූරියප්පෙරුම මහතා එජාපයෙන් තරග කළේය. සෙනෙවිරත්න මහතා 1965 දී ගත් ප්‍රමාණයට වඩා ඡන්ද 274ක් ලබා හතර ගාතෙන් වැටුණේය. 

 

1977 මහා මැතිවරණය ජුලි 22 වැනිදා පැවැත්විණි. මුළු මහත් ශ්‍රී ලංකාව තුළ තිබුණු ජන බලවේගය අනුව අත්තනගල්ලෙන්  සිරිමාවෝ ආර්. ඩී. බණ්ඩාරනායක පවා ජන රල පහරට හසුවනු ඇතැයි මැද පිලේ අපි ද විශ්වාස කළෙමු. මහා මැතිවරණ පහක දී අන්ත පරාජයට පත්ව සිටි එජාප අපේක්ෂක ඒ. ඩබ්ලිව්. ජී. සෙනවිරත්න මහතා ද 1977 දී ජයග්‍රහණය හිමිකර ගන්නා බැව් තරයේම විශ්වාස කළේය. 

 

ලංකා සමසමාජ පක්ෂය නියෝජනය කළ ප්‍රබල වමේ නායකයකු වූ චන්ද්‍රා ගුණසේකර තරගයට ඉදිරිපත්ව සිටි හෙයින් ඡන්ද බෙදීයාමේ පදනම මත අත්තනගල්ලෙන් සුපුරුදු එජා පක්ෂ අපේක්ෂකයා ජයග්‍රහණය කරනු ඇතැයි මධ්‍යස්ථ පාක්ෂිකයෝ ද විශ්වාස කළහ. ඡන්ද දූෂණ හොර මගඩිකම් ද නොතිබුණා නොවේ. මැතිවරණ ඉතිහාසයේ පළමුවරට පරාජය භාර ගන්නට සම්ප්‍රදායික ශ්‍රීලනි පාක්ෂිකයෝ ද තැතිගෙන සිටියහ. අවසානයේ ජුලි 23 වැනිදා දහවල් 12.00ට පමණ ඡන්ද ප්‍රතිඵල නිකුත් විය. 

 

සිරිමාවෝ බණ්ඩාරනායක මැතිනිය 30,226 

ඒ. ඩබ්ලිව්. ජී. සෙනවිරත්න 19,563 

චන්ද්‍රා ගුණසේකර (ලසසප) 1067

ටී. ඒ. ඩී. කේ. තාඹුගල ස්වාධීන 335

 

වැඩි ඡන්ද 10,663න් සෙනෙවිරත්න මහතා පරාජයට පත්වූයේ සියලු බලාපොරොත්තු සුන්කර දමමිනි. එහෙත් සෙනවිරත්න මහතා සිය මැතිවරණ ඉතිහාසය තුළ දී ලබාගත් ඡන්ද ප්‍රමාණය ඉහළ නංවා ගෙන තිබුණි. 

 

1977 පරාජයෙන් පසු එජා පක්ෂයේ ශක්තිමත් සංවිධායකවරයකු වූ කශේරුකාවක් සහිත ප්‍රතිපත්තිගරුක ප්‍රජාතන්ත්‍රවාදියෙකු වූ සෙනෙවිරත්න මහතා දේශපාලන තිරයේ එහාට එහාට එහාටම ගියේය. අලි ඇතුන් ගව මහීෂාදියෙන් ඉඩම් වතුපිටි ආදියෙන් පරිපූර්ණව සිටි සෙනෙවිරත්න මහතා නිහඬවම පරාජය පිළිගෙන ක්‍රම ක්‍රමයෙන් පරාජයේ යහ ගී ගයන්නට පසුබිම සකස් කර ගත්තේය. 

 

 

තරු පහේ ප්‍රජාතන්ත්‍රවාදයේ බල මහිමයෙන් අපේ දෙවියන්ගේ පිහිටෙන් අපිත් ශේප් න්‍යායෙන් සෙනවිරත්නලා සමග නිහඬ වෙමු.