විපක්ෂයට ගිය ආණ්ඩුව යළි ගැනීමේ ඇමති කිරිඇල්ලගේ මෙහෙයුම-4
මහින්ද රාජපක්‍ෂ ඇතුළු කණ්ඩායමට පාර්ලිමේන්තුව තුළ බහුතර බලය නොමැති බව විශ්වාසභංග යෝජනාව අදාළ ඡන්ද විමසීමේදී මනාව පැහැදිලි විය. එහෙත් සාමකාමී ලෙස වේදිකාවෙන් බැසයාමට මහින්ද රාජපක්‍ෂ කණ්ඩායම සූදානම් නොවීය.
මහින්ද රාජපක්‍ෂ කඳවුරේ ඉලක්කය වූයේ පාර්ලිමේන්තුව කල් දැමීමය. තමන්ට අවශ්‍ය බහුතරය හදා ගැනීම සඳහා කාලය ලබාගැනීම එහි අරමුණ විය. එහෙත් සභානායකව සිටි ලක්‍ෂ්මන් කිරිඇල්ල සිටියේ වෙනම ස්ථාවරයකය. ගාලගෝට්ටි මැද විශ්වාසභංග යෝජනාව සම්මතවීමත් සමග නැගී සිටි ලක්‍ෂ්මන් කිරිඇල්ල කතානායක කරු ජයසූරියගෙන් ඉල්ලා සිටියේ ඊට පසුදින දහවල් 10 නැවත පාර්ලිමේන්තුව කැඳවන ලෙසය. ඒ අනුව එම දිනය හා වේලාව සභාවට දැනුම්දුන් කතානායකවරයා එදින සභාව අත්හිටුවීය.
පසුදින පාර්ලිමේන්තුව රැස්විය. එම දිනය ශ්‍රී ලංකා පාර්ලිමේන්තු ඉතිහාසයේ අපකීර්තිමත්ම නින්දා සහගත දිනය වශයෙන් ඉතිහාසයට එක්වනු ඇතැයි කිසිවෙක් හෝ නොසිතූහ. එහෙත් එදින සිදුවූයේ එයමය. කල්වේලාසනින්ම සභාගැබට රැස්වූ මහින්ද කණ්ඩායමේ මන්ත්‍රීවරයෙක් සභාවේ පාලනය සියතට ගත්හ. ඒ අනුව පුත්තලම දිස්ත්‍රික් පාර්ලිමේන්තු මන්ත්‍රී අරුන්දිත ප්‍රනාන්දු කතානායක ආසනයේ වාඩි ගත්තේය. සෙසු මන්ත්‍රීවරු හා මන්ත්‍රීවරියෝ විවිධ සටන් පාඨ කියමින් පාර්ලිමේන්තුව දෙවනත් කළහ.
එජාපයේ මන්ත්‍රීවරුන්ට සන්සුන්ව සිටින ලෙස ලක්‍ෂ්මන් කිරිඇල්ල කල්ඇතිවම දැනුම් දී තිබුණේය.
“මෙතැන අපට ප්‍රශ්නයක් නෑ. පාර්ලිමේන්තුවේ බලය තියෙන්නේ අපිටයි. මේ අය වියරුවෙන් වගේ දඟලන්නේ. මේ සභාව සජීවීව රූපවාහිනියෙන් විකාශය වෙනවා. මේ ගොල්ලන්ගේ හැසිරීම මුළු රටම දකිනවා. ඒ නිසා අපි විනයගරුකව මේ අවස්ථාවට මුහුණ දෙමු.” ලක්‍ෂ්මන් කිරිඇල්ල සිය පාර්ලිමේන්තු සගයන්ට කීවේය. ඒ අනුව එක්සත් ජාතික පෙරමුණට සම්බන්ධ සියලුම මන්ත්‍රීවරු නිශ්ශබ්දව සභාවේ අසුන්ගෙන සිටියහ.
මහින්ද පාර්ශ්වයේ විරෝධතාවේ එක් අරමුණක් වූයේ ඊට පෙර දින පාර්ලිමේන්තු කලබලයේදී එක්සත් ජාතික පක්‍ෂයේ මන්ත්‍රීවරයෙක් පිහියක් රැගෙන සභාවට පැමිණි හෙයින් ඒ සම්බන්ධයෙන් වහාම පරීක්‍ෂණයක් කරන ලෙසය.
මේ සභාවට මන්ත්‍රීවරු පිහියක් අරගෙන එනවා නම් මේ සභාවේ ඉන්න මන්ත්‍රීවරුන්ගේ ආරක්ෂාවට මොකද වෙන්නේ? ඒ නිසා ඒ ගැන වහාම පියවරක් ගත යුතුයි. මහින්ද පාර්ශ්වයේ මන්ත්‍රීවරු කෑ ගසමින් කීහ.
මේ මොහොතේ පොලිස් භටයන් පිරිවරා ගරු කතානායක කරු ජයසූරිය සභාවට පැමිණියේය. කතානායක ආසනය පෙරැළී ගියේය. වතුර බෝතල් හැන්සාඞ් වාර්තා ආණ්ඩුක්‍රම ව්‍යවස්ථා ඉගිලී ගියේය. කතානායක කරු ජයසූරිය “මෙගා කෙන්තියකින්” සභාව ඇමතුවේය. ඒ සමගම කිසියම් දියර වර්ගයක් පාර්ලිමේන්තු මන්ත්‍රීවරුන්ට කතානායකවරයාට හා පොලිස් බළඇණියට එල්ලවිය.
“මිරිස් කුඩු ගහනවෝ” මන්ත්‍රීවරු කෑගසන්නට වූහ.
පැයකට ආසන්න කාලයක් මෙම කලබැගෑනිය පැවැත්විණි. එම දිනය සම්බන්ධයෙන් හැන්සාඞ් වාර්තාවේ සඳහන් වන්නේ මෙසේය..
ගරු කථානායකතුමා : Order, Please (ඝෝෂා කිරීම්) කථානායකවරයාගේ නිවේදන. පවතින නොසන්සුන්කාරී තත්ත්වය තුළ සභා ගර්භය තුළට පොලිසිය කැඳවීමට මම අවසර දුන් බව සභාවට දන්වා සිටිමි. අද දවසේ වැඩකටයුතු කරගෙන යාම සඳහා ස්ථාවරව නියෝග පිළිබඳ යෝජනාව ඉදිරිපත් කිරීම, ගරු සුමන්තිරන් මන්ත්‍රීතුමා (ඝෝෂා කිරීම්) ගරු සුමන්තිරන් මන්ත්‍රීතුමා (ඝෝෂා කිරීම්) ගරු සුමන්තිරන් මන්ත්‍රීතුමා.
ගරු එම්. ඒ. සුමන්තිරන් මහතා :( "In terms of standing order No. 135 that standing Order No. 27 be suspended for the day in order in order to move the No- confidence Motion" (Uproar)
ගරු කථානායකතුමා : එම යෝජනාව ස්ථිර කිරීම (ඝෝෂා කිරීම්)
ගරු අජිත් පී. පෙරේරා මහතා : ස්ථිර කරනවා.
ගරු කථානායකතුමා : ඊයේ අතිගරු ජනාධිපතිතුමා එකඟ වූ පරිදි විශ්වාසභංග යෝජනාවේ පළමු වගන්තිය ඉවත් කර, එම යෝජනාව සභාවට ඉදිරිපත් කිරීම, ස්ථිර කිරීම (ඝෝෂා කිරීම) ගරු අනුර දිසානායක මන්ත්‍රීතුමා.
ගරු අනුර දිසානායක මහතා : ගරු කථානායකතුමනි, මා පහත සඳහන් යෝජනාව ඉදිරිපත් කරනවා.
“ගරු කථානායකවරයා විසින් නිකුත් කරන ලද 2018 නොවැම්බර් මස 15 වන දින දරන නිවේදනය ප්‍රකාරව 2018 නොවැම්බර් මස 14 දින ආණ්ඩුව කෙරෙහි විශ්වාසභංග යෝජනාවේ අංක 02 දරන යෝජනාව සම්මත වූ හෙයින්, ආණ්ඩුක්‍රම ව්‍යවස්ථාවේ 48 (2) ව්‍යවස්ථාව යටතේ අමාත්‍ය මණ්ඩලය විසිරුණු බවට වන නිල ප්‍රකාශය මෙම ගරු සභාව පිළිගන්නා අතර,
මෙම ගරු සභාව 2018 ඔක්තෝම්බර් මස 26 වෙනි දින සිට ආණ්ඩුක්‍රම ව්‍යවස්ථාවේ 48 (2) ව්‍යවස්ථාවේ සඳහන් පරිදි ගරු මහින්ද රාජපක්‍ෂ මහතා ඇතුළු ආණ්ඩුව කෙරෙහි කිසිදු විශ්වාසයක් නොමැති බව යෝජනා කර සිටියි.”
ගරු කථානායකතුමා : ස්ථිර කිරීම (ඝෝෂා කිරීම්)
ගරු කථානායකතුමා : මෙම යෝජනාවට පක්ෂව (ඝෝෂා කිරීම්)
ගරු මන්ත්‍රීවරු : එකඟයි
ගරු කථානායකතුමා : එම යෝජනාවට විරුද්ධව. (සෝෂා කිරීම්) හරි. මේ අවස්ථාවේදී මම කැමැතියි, නම්වලින් ඡන්දය ගන්න. නම් වලින් ඡන්දය ගන්න බැරි නිසා I am ordering that "Ayes" will have
අවසානයේදී කතානායකවරයා ප්‍රකාශයට පත් කළේ ජනතා විමුක්ති පෙරමුණේ අනුර කුමාර දිසානායක ආණ්ඩුවට එරෙහිව සංශෝධන සහිතව ඉදිරිපත් කළ විශ්වාසභංග යෝජනාව “කට හඬින්” සම්මත වූ බවය. එමෙන්ම පාර්ලිමේන්තුව නැවත නොවැම්බර් 19 දින තෙක් කල් තබන බවය.
එජාපයේ මන්ත්‍රීවරුන්ට අතින් සංඥාවක් කළ ලක්‍ෂ්මන් කිරිඇල්ල සභාවෙන් එළියට ගියේය.
සකස් කළේ : ප්‍රසන්න සංජීව තෙන්නකෝන්
ඡායාරූපය අන්තර්ජාලයෙනි
