අනුරාධපුරයේ වැව් රක්ෂිතයකට මායිම්ව පිහිටි පර්චස් 80ක ඉඩමක් උතුරුමැද පළාත් ආණ්ඩුකාර මහීපාල හේරත් මහතාගේ බිරිඳගේ නමට අත්පත් කර ගැනීමේ සිද්ධියක් පසුගියදා වාර්තා විය. මෙම ඉඩම වැව් රක්ෂිතයට මායිම්ව පිහිටි වටිනා ඉඩමක් බවද එම ඉඩම පවරා ගැනීමේ කටයුත්තේදී මහීපාල හේරත් මහතා තම ආණ්ඩුකාර බලතල අවභාවිත කර ඇති බවද සඳහන් වෙයි. අදාළ ඉඩම පිහිටා ඇත්තේ අනුරාධපුර මධ්‍යම නුවරගම් පළාත් ප්‍රාදේශීය ලේකම් කොට්ඨාසයේ කටුකැලියාව ග්‍රාම නිලධාරී වසමේ බවද කියැවෙයි.
ආණ්ඩුකාර ධූරයක් හොබවන පමණින් රජයේ ඉඩමක් නිත්‍යනුකූල ලෙස තමන්ගේ පරිහරණයට ගැනීමට නීතියෙන් තහනමක් නැත. එහෙත් තම බලතල යොදාගෙන තමන්ටම ඉඩම් පවරා ගැනීම අසික්කිත ක්‍රියාවකි. එවැනි ක්‍රියා හෙළා දැකිය යුතුය. රජයේ ඉඩම් විවිධ ආකාරයෙන් රටේ වැසියන්ට ලබාදෙන අවස්ථා තිබේ. එසේ රජයේ ඉඩම් බලපත්‍ර හරහා හෝ සින්නක්කර ඔප්පු ලෙස හෝ ලබාදීම සෑම ආණ්ඩුවක් විසින්ම වරින් වර සිදු කරන කටයුත්තකි. එය සැබෑ ලෙසම ඉඩම් අහිමි ජනතාවගේ අසරණකම සලකා බලා සිදු කරන ක්‍රියාවක් සේම ඒ තුළ දේශපාලනයද තිබේ. සෑම ආණ්ඩුවක්ම මේ ක්‍රියාව කරන්නේ ජනතා සේවයේ නාමයෙන් වුවද ඒ හරහා තමන්ගේ ඡන්ද ගොඩ වැඩිකර ගැනීම තවත් අරමුණකි. මෙවැනි ඉඩමක් ලබාගැනීමට සියලු සුදුසුකම් සපිරුවද පළාතේ දේශපාලනඥයාගෙන් අනුමැතිය හිමිවිය යුතු වීම හරහා එය දේශපාලනීකරණය වෙයි. ඉඩම් කච්චේරියක් පවත්වා ඉඩම් ලබාදීමේදී පවා දේශපාලනාධිකාරියේ අනුමැතිය අවශ්‍ය බව ප්‍රකට රහසකි.
ඒ අර්ථයෙන් ගත් කල උතුරුමැද ආණ්ඩුකාරවරයා ඇත්තේ තමන්ගේ හැන්දෙන් තමාටම බෙදාගැනීමකි. මෙය නිත්‍යනුකූල ක්‍රමවේදයක් අනුගමනය කර සිදු කරගත් පවරා ගැනීමක් විය හැකි වුවද තමන්ගේ බලය පවතින පළාතේ ඉඩමක් තමන්ගේ බිරිඳගේ නමට පවරා දීමට ආණ්ඩුකාර බලතල අවභාවිත කිරීම කිසිවකුත් අනුමත නොකරන ක්‍රියාවකි. අදාළ ප්‍රදේශයේ සුදුසුකම් සපුරා ඇති, ඉඩමක අයිතිය නොමැති පුද්ගලයකුට හෝ දරු පවුලකට හෝ මේ ඉඩම පවරා දීමට ආණ්ඩුකාරවරයා තම බලතල භාවිත කළා නම් එය මහා ලොකු වැරැද්දක් නොවේ. එහෙත් මේ පවරාදීමේ පැවරුම්ලාභියා තම බිරිඳ නම් එවැනි තීන්දුවක් ගැනීමට පෙර ඔහුට ඒ පිළිබඳව හොඳින් අධ්‍යයනය කර තීන්දුවක් ගැනීමට අවස්ථාව තිබිණි. එම වගකීම පැහැර හැරීමෙන් ඔහු කර ඇත්තේ දැන දැන වැරදි ක්‍රියාවකට අනුබල දීමකි. ඒ සම්බන්ධයෙන් පළාත්වාසීන්ගේ විරෝධය පළවීම බලාපොරොත්තු විය යුතුය.
මෙම ඉඩම් පවරා දීම සම්බන්ධයෙන් ‘අපි පුරවැසියෝ’ සංවිධානයේ කැඳවුම්කරු ප්‍රියන්ත ප්‍රනාන්දු මහතා කර තිබූ ප්‍රකාශය මෙහිදී වැදගත් වෙයි. ආණ්ඩුකාරවරයා මෙම වටිනා ඉඩම පවරාගෙන ඇත්තේ සැලසුම් සහගත ආකාරයකට බවටත් ඒ ආසන්නයේ ඇති අක්කර තුනක වැව් රක්ෂිතය අත්පත් කර ගැනීම ඔහුගේ මීළඟ ඉලක්කය විය හැකි බවටත් ඔහු තම ප්‍රකාශයෙන් චෝදනා කර තිබිණි. එය නීතිවිරෝධී ඉඩම් ගනුදෙනුවක් බැවින් ඊට එරෙහිව නඩු පවරන බවද ඔහුගේ ප්‍රකාශයේ සඳහන් විය.
මෙම පරිසර සංවිධානය නගන චෝදනාවලට ආණ්ඩුකාරවරයා පිළිතුරු ලබාදීම සුදුසු යැයි අපි විශ්වාස කරමු. ඉඩම් අඟලක හෝ අයිතිය අහිමි පුද්ගලයන් කොතෙකුත් සිටියදී දේශපාලනඥයන් විසින් කූඨ ලෙස ඉඩම් අත්පත් කර ගැනීම් ඕනෑ තරම් වාර්තා වී තිබේ. උතුරුමැද ආණ්ඩුකාරවරයා තමාගේ ක්‍රියාවෙන් තම ධූරයේ බලතල අවභාවිත කර නොමැති බව ඔප්පු කළ හැක්කේ එසේ පිළිතුරු ලබාදීමකින් පමණි.
අනුරාධපුරය මධ්‍යම නුවරගම් පළාත් ප්‍රාදේශීය ලේකම් ආර්.එම්.ජී. සේනාරත්න මහතා සඳහන් කර තිබුණේ තුන්සියයකට අධික පිරිසක් සහභාගි වූ ඉඩම් කච්චේරියකට අදාළ ඉඩමට බලපත්‍රයක් ලබා දෙන්නැයි කාන්තාවක් ඉල්ලීමක් කර තිබූ බවත් එම ඉල්ලු‍ම්කාරිය ආණ්ඩුකාරවරයාගේ බිරිඳ බව හඳුනා ගත්තේ පසුව බවත්ය. කිසියම් පුද්ගලයකු මෙම ඉඩම් කොටස් දෙක නීත්‍යානුකූල නොවන ආකාරයට ආණ්ඩුකාරතුමන්ගේ බිරියට විකුණා ඇති බවත් බලපත්‍රය ඉල්ලා තිබුණේ ඒ සඳහා බවත් ඔහු සඳහන් කර තිබිණි. ආණ්ඩුකාරවරයකුට රජයේ ඉඩමක් බදු දිය නොහැකි බවට තමන් දන්නා තරමින් නීතියක් නැති බවද ප්‍රාදේශීය ලේකම්වරයාගේ ප්‍රකාශයේ සඳහන් විය.
ප්‍රාදේශීය ලේකම්වරයා කුමක් කීවත් ආණ්ඩුකාරවරයා මෙහිදී තම බලතල අවභාවිත කර ඇති බව පෙනී යයි. එම වැරැද්ද හැකි ඉක්මනින් නිවැරදි කළ යුතු යැයි අපි අදහස් කරමු. මේ වැඩවලට දැන්ම තිත නොතැබුවහොත් රටේ වටිනා ඉඩම් සියල්ල අවසානයේ නතරවනු ඇත්තේ දේශපාලකයන්ගේ පාමුල බවට අනතුරු ඇඟවීමට කැමැත්තෙමු.
(***)
