අප රට එක් අතකින් කෙතරම් අවාසනාවන්ත දැයි කියතොත්, එක් බරපතළ ප්‍රශ්නයක් නිරාකරණය කරමින් සිටින විට, රට ළඟින් යන නැවක් හෝ ගිනි ගනී. මේ දිනවල ද එබඳු ගින්නක් අප රට තුළ ඇවිළී තිබේ. එම ගින්න නම්, ආගම්වලට පරිභව කිරීමේ ප්‍රවණතාවකි. බහුතරක් ජනයා අතිශයින්ම ශිෂ්ට සම්පන්න වන හෙයින්, එම අකල් ගිනි මහා ගිනි ජාලා බවට පත් නොවේ. සිදු විය යුත්තෙත් එයමය. එහෙත්, කුඩා ගිනි පුපුරකින් මහා ගිනි ජාලාවක් මැවිය හැකි බව අවධාරණය විය යුතුය.
‘‘අන් ජාතියක් පීඩාවට පත් කරන ඕනෑම ජාතියක් තමන්ගේම වූ යදම් තනා ගනී’’ යැයි මාක්ස් ලියා තැබුවේය. එක් ජාතියක් තවත් ජාතියක් පීඩාවට පත් කිරීමේ නියත ප්‍රතිඵලය මාක්ස් විවරණය කළේ එසේය. ඉහත කියමන ආගම් සම්න්ධයෙන් වුව ද මනාව ගළපාගත හැකිය. ආගම් සම්බන්ධ ගැටුම්වලට අදාළ උදාහරණ අප රටෙන් ද අසල්වැසි ඉන්දියාවෙන් ද ලෝකයේ තවත් බොහෝ රටවල්වලින් ද ලබාගත හැකිය. යූටියුබ් අම්බරුවන්ට මේවා තේරුම් ගැනීමට සමත් මොළයක් ඇතැයි අපි නොසිතමු. මංචාඩියක් තරම් මොළයක් මේ අම්බරුවන්ට තිබුණේ වී නම්, ප්‍රසිද්ධියේ මෙසේ ආගම්වලට පරිභව නොකරනු ඇත.
ආගම්වලට පරිභව කළ යූටියුබ් අම්බරුවන් ගැන ඇතැමකු කියා සිටියේ, මොවුන් යූටියුබ් ගණිකාවන් බවය. එහෙත්, එම කියමන සමග අපි එකඟ නොවෙමු. මන්දයත්, ගණිකාවන් තම ශරීරය මිස ආධ්‍යාත්මය නොවිකුණන බැවිනි. මෙම යූටියුබ් අම්බරුවන්ට විකිණීමට හෝ ආධ්‍යාත්මයක් නැත. ‘‘ආධ්‍යාත්මය පැහැරුණු පුද්ගලයාට රැක ගැනීමට කිසිවක් නැතැයි’’ කියමනකි. ජාතිය, ආගම, සභ්‍යත්වයට ගරහමින් මෙම අම්බරුවන් ඩෙඟා නටන්නේ එහෙයිනි.
තිස් වසරක් පුරා පැවැති යුද්ධයේ කටුක අත්දැකීම් අපට තවමත් මතකය. රණවිරුවෝ දහස් ගණනක් ඇස් ඉස්මස් ලේ හා ජීවිත පරිත්‍යාග කරමින් ඒ සැහැසි ග්‍රහණයෙන් අප රට මුදාගත්හ. මේ රට යළිත් එබඳු නරකාදියකට ඇද දැමීමට කිසිවකුට ඉඩ දිය යුතු නැත. එබන්දන් අල්ලා ගස් බැඳිය යුතුය. ජාතික සමගියත්, ආගමික සංහිඳියාවත් අපගේ ශිෂ්ටත්වයේ ප්‍රතිමූර්තිය වේ. එයට එරෙහිව විවිධ මාදිළියෙන් හා විවිධ වර්ණයෙන් කරළිගත වන ඕනෑම කණ්ඩායමකට එරෙහිව තරාතිරම් බේදයකින් තොරව නීතිය ක්‍රියාත්මක කළ යුතුය.
අප පුවත්පත වාර්තා කළ ප්‍රවෘත්තියකින් කියැවුණේ, ආගමික සංහිඳියාවට බාධා කරන කණ්ඩායම් පිළිබඳව සොයා බලා පියවර ගැනීමට වහාම ක්‍රියාත්මක වන පරිදි විශේෂ පොලිස් ඒකකයක් ස්ථාපිත කිරීමට ජනාධිපති රනිල් වික්‍රමසිංහ මහතා තීරණය කර ඇති බවය.
ස්වයං විනයකින් යුතුව කටයුතු නොකරන්නේ නම්, ඔවුන් නීතියේ රැහැනින් බැඳ දැමිය යුතුය. මෙම යූටියුබ් අම්බරුවන්ට රට, ජාතිය, ආගම දහම ගැන ගෞරවයක් නැත. එමෙන්ම, මෙම අම්බරුවන් සතුව නීතියට භයක් මෙන්ම ගෞරවයක් ද නැත. තමන්ගේ අවිචාරවත් මනස්ගාත වමාරමින් ආගම දහමට පරිභව කරන්නේ එහෙයිනි. ආගමික සංහිඳියාවට බාධා කරන කණ්ඩායම් පිළිබඳව සොයා බලා පියවර ගැනීමට වහාම ක්‍රියාත්මක වන පරිදි පොලිස් ඒකකයක් ස්ථාපිත කිරීමට ජනාධිපති රනිල් වික්‍රමසිංහ මහතා පියවර ගැනීම අතිශයින්ම කාලෝචිත මෙන්ම වැදගත් වන්නේ එහෙයිනි.
ආගමික සංහිඳියාවට බාධා කරන කණ්ඩායම් පසුගිය කාලය පුරා රටේ තැන් තැන්වලින් මතු වූ අතර, ඔවුන්ගේ මෙම ක්‍රියා ආණ්ඩුව අපහසුතාවට පත් කිරීම වෙනුවෙන් සංවිධානාත්මකව කරන ක්‍රියා මිස අහඹු ක්‍රියා නොවේ යැයි කියන ජනාධිපතිවරයා, ලැබුණු බුද්ධි තොරතුරුවලට අනුව අවශ්‍ය කඩිනම් තීරණය ගෙන ඇති බව ද අප ප්‍රවෘත්තියේ සඳහන්ය.
අදාළ බුද්ධි තොරතුරු ලැබීමෙන් පසුව ජනාධිපතිවරයා ජනාධිපති කාර්ය මණ්ඩල ප්‍රධානි හා ජාතික ආරක්ෂාව පිළිබඳව ජ්‍යෙෂ්ඨ උපදේශක සාගල රත්නායක මහතාට උපදෙස් දී තිබෙන්නේ, පොලිස්පතිවරයා සමග සාකච්ඡා කර අවශ්‍ය පියවර කඩිනමින් ගන්නා ලෙසය.
ඉතිහාසයේ නොවූ විරූ අයුරින් රට දරුණු ආර්ථික අස්ථාවර තත්ත්වයකට මුහුණ දී තිබූ අවස්ථාවේ එම තත්ත්වය අසීරුවෙන් ස්ථායීකරණය කරමින් ඉදිරියට ගමන් කරවීම ආරම්භ කර තිබියදී, ආගමික සංහිඳියාව බිඳ දමමින්, ජන කොටස් අතර විරසකයක් ඇති කර, රට යළි කඩා වැට්ටවීමට උත්සාහ කිරීමක් ක්‍රියාත්මක බවට ජනාධිපතිවරයාට ලැබුණු බුද්ධි තොරතුරෙහි සඳහන්ව ඇති බව අප ප්‍රවෘත්තියෙහි වැඩිදුරටත් සඳහන්ය.
මෙම ප්‍රවණතාව රටේ සාමකාමී පැවැත්මට මාරාන්තික බව ඉතා පැහැදිලිය. පිස්සු බල්ලන්ට නිදැල්ලේ හැසිරීමට ඉඩ දීම නොකළ යුතුය. එපරිද්දෙන්ම, මෙම උමතු පිරිස් ගස් බැඳිය යුතුය. එය සාමකාමී හා සහජීවනයෙන් පිරීගත් රටක් සම්බන්ධ අපේක්ෂාවෙන් යුත් සියල්ලන්ගේම ඉල්ලීමය.
(***)
