පාර්ලිමේන්තු මන්ත්‍රීවරුන්ට වෙන් කර ඇති ප්‍රතිපාදනවලින් පාසල්වල දැවැන්ත පිවිසුම් දොරටු හැදීමට වඩා ජනතාවට වැදගත් කටයුතුවලට එම මුදල් යොදවන්නැයි වයඹ පළාත් ආණ්ඩුකාර ලක්ෂ්මන් යාපා අබේවර්ධන මහතා පුත්තලම දිස්ත්‍රික් පාර්ලිමේන්තු මන්ත්‍රී අලි සබ්රි රහීම් මහතාට පසුගියදා උපදෙස් දුන්නේය.
එයින් වූයේ මෙරටේ අධ්‍යාපන ක්‍ෂේත්‍රය මුහුණ දී තිබෙන සැබෑ ගැටලු පිළිබඳ රටේම අවධානය යොමු කිරීමකි. පාසල්වල සම්පූර්ණ විය යුතු කෝටියක් වැඩ තිබියදී එක් එක් දේශපාලකයාගේ ප්‍රතිරූපය පුම්බන, තේරුමක් නැති වැඩ අධෛර්යවත් කිරීම සඳහා වයඹ ආණ්ඩුකාරවරයා විසින් ගනු ලැබූ එම පියවර වටිනා ආදර්ශයක් ලබා දී ඇති බව අපගේ පිළිගැනීමය.
මෙරට පාසල් පද්ධතිය වර්තමානයේ මුහුණ දී තිබෙන සැබෑ ගැටලු පිළිබඳ රටේ අවධානය යොමු වූ කාරණා කිහිපයක් අපගේ ‘ලංකාදීප’යේ ප්‍රවෘත්ති හරහා පසුගිය දින කිහිපය තුළදී ජනගත වී තිබිණි. ඒ අතර, ශිෂ්‍යත්ව විභාගයට අකුරක්වත් ඉගැන්වීමට නොහැකි වූ පාසලක් පිළිබඳ පළමු ප්‍රවෘත්තිය ද, පාසල් 160ක පවතින උග්‍ර ගුරු හිඟය මෙන්ම බස්නාහිර පළාතේ වාර විභාග ප්‍රශ්න පත්‍ර විභාගයට කලින්ම සමාජ මාධ්‍ය ඔස්සේ දරුවන්ගේ අතට පත් වීම පිළිබඳ ප්‍රවෘත්ති ද, මේ රටේ අධ්‍යාපන ක්‍ෂේත්‍රය මුහුණ දී තිබෙන සැබෑ ගැටලුවල ස්වභාවය ප්‍රබලව පෙන්වා දී තිබේ. මේ ගැටලු එසේ තිබියදී ඒ පිළිබඳ කිසිදු සංවේදී බවක් නොපෙන්වා රජයේ මුදල් අත දිග හැර පාසල්වල දැවැන්ත පිවිසුම් දොරවල් හැදීම සඳහා යට කිරීමෙන් මේ දේශපාලකයන් රටට පෙන්වා දෙන්නේ තමන්ගේ බඩගෝස්තරවාදී දේශපාලනයට තිත තැබීමට ඔවුන් තුළ කිසිදු සූදානමක් හෝ උනන්දුවක් නොමැති බව මිස වෙන කුමක් ද?
පුත්තලම පාසලකට දැවැන්ත ගේට්ටුවක් තනා දීමට මුදල් වීසි කරන අතරවාරයේ අනුරාධපුර තන්තිරිමලේ තම්බියාව ධර්මපාල ප්‍රාථමික විද්‍යාලයේ පහේ ශිෂ්‍යත්ව විභාගයට පෙනී සිටින දරුවන්ට සිංහල, බුද්ධාගම ඇතුළු විෂයයන් කිහිපයකටම අකුරක්වත් උගන්වා නැතැයි වාර්තා විය. එම විද්‍යාලයේ විදුහල්පතිවරයා මීට මාසයකට පෙර මියගොස් ඇත. එම රාජකාරි ආවරණයට කිසිදු විදුහල්පතිවරයකු පත්කර නැතැයි මවුපියන් චෝදනා කර තිබිණි. ඔවුන්ගේ දරුවන්ට අධ්‍යාපනය ලැබීමට මතුව තිබෙන දුෂ්කරතාවලට තවමත් පිළිතුරු නැතැයි සඳහන් වේ.
මේ අතර, මිනුවන්ගොඩ අධ්‍යාපන කලාපයේ පාසල් 160ක ගුරු පුරප්පාඩු 722ක් පවතින බව ගුරු සංගම් ප්‍රකාශ කර සිටියේය. මිනුවන්ගොඩ, ගම්පහ දිස්ත්‍රික්කයේ අධ්‍යාපන කොට්ඨාස තුනක් ආවරණය කරයි. බස්නාහිර පළාතේ බොහෝ සම්පත් තිබෙන දිස්ත්‍රික්කයක මෙතරම් පාසල් සංඛ්‍යාවක උග්‍ර ගුරු හිඟයක් පවතින බව එක වරම විශ්වාස කිරීමට පවා නොහැක. මිනුවන්ගොඩ කලාප අධ්‍යාපන අධ්‍යක්ෂ වජිර රණරාජා පෙරේරා මහතා ප්‍රකාශ කර තිබුණේ, අධිකරණ නියෝගයක් මත ඇනහිට ඇති ගුරුවරුන් බඳවා ගැනීමේ කටයුතු සිදු වීමෙන් පසු මේ තත්වය වළක්වාගත හැකි වනු ඇති බවයි. අධිකරණ කටයුතු අවසන් වනතුරු මේ පාසල් 160ක අධ්‍යාපනය ලබන දරුවන්ට දෙයියන්ගේ පිහිට පතනු හැර වෙන යමක් කළ හැකි බවක් දැනට පෙනෙන්නේ නැත. ගම්පහ දිස්ත්‍රික්කයේ දේශපාලන බල කණුවලට හෝ මේ අවනඩුව නොඇසෙන්නේ මන්දැයි තේරුම් ගැනීම ද දුෂ්කරය.
ඉංග්‍රීසි සහ ගණිතය ප්‍රශ්නපත්‍ර, විභාගය පැවැත්වීමට පෙර සමාජ මාධ්‍ය ඔස්සේ පිට වීම හේතුවෙන් බස්නාහිර පළාතේ රජයේ පාසල්වල වාර විභාගය අත්හිටු වීමට බස්නාහිර පළාත් අධ්‍යාපන දෙපාර්තමේන්තුව පසුගියදා පියවර ගෙන තිබිණි. මේ සිද්ධිය මේ වන විට සී.අයි.ඩී.ය දක්වා ඇදී ගොස් තිබේ. පසුගියදා අවසන් වූ උසස් පෙළ විභාගයේ කෘෂිකර්මය ප්‍රශ්නපත්‍රය පිට වීම හේතුවෙන් එම විෂයයට අදාළ විභාගය යළිත් වරක් පැවැත්වීමට ද සිදු විය. මෙවැනි සිදුවීම් යළි යළිත් වාර්තා වීම අධ්‍යාපන ක්‍ෂේත්‍රයට කළු පැල්ලමක් ද එක්කර තිබේ.
මේ අනුව පෙනී යන්නේ, මන්ත්‍රීවරයා ක්‍රියා කර ඇත්තේ අනවශ්‍ය වියදමක් දරා, තමන්ගේ ප්‍රතිරූපය පුම්බා ගැනීමට උත්සාහ දැරීම බවයි. එම වියදමින් අඩුම තරමින් පුත්තලම දිස්ත්‍රික්කයේ පාසල්වල වැසිකිළි පහසුකම් හෝ දුන්නා නම් වැදගත් වනු ඇත.
(***)
