රටේ දිළිඳු පවුල්වලට සහනාධාර වශයෙන් ආණ්ඩුව මගින් හඳුන්වා දුන් අස්වැසුම සුබසාධන ව්‍යාපෘතියට එරෙහිව රට පුරා බලවත් විරෝධයක් ගොඩ නැංවෙමින් තිබේ. අස්වැසුම හේතුවෙන් තමන්ට ලැබෙමින් තිබූ සමෘද්ධි සහනාධාර නොලැබී ගිය පිරිස් මේ විරෝධතා පවත්වන බව වාර්තා වෙයි.
ආණ්ඩුව ප්‍රකාශ කරන්නේ එවැනි අසාධාරණ කැපීයාම්වලට ලක් වූවන් වෙතින් ලැබෙන අභියාචනා සලකා බලා අවශ්‍ය සහන සලසා දෙන බවයි.
ජූලි මාසයේ 10 වැනිදාට පෙර නම් කැපී ගිය පිරිස අභියාචනා ඉදිරිපත් කළ යුතු බව ද ඒ අනුව අස්වැසුම ලාභීන්ගේ අවසන් ලැයිස්තුව ප්‍රකාශයට පත් කරන බව ද මුදල් රාජ්‍ය අමාත්‍ය ෂෙහාන් සේමසිංහ මහතා ප්‍රකාශ කරයි.
මේ රටේ සමෘද්ධි ව්‍යාපාරය ඇතුළු දිළිඳු ජනතාවට සහනාධාර ලබාදීමේ සුබසාධන ව්‍යාපාර සියල්ලම මුළුමනින්ම පාහේ දේශපාලනීකරණය වෙමින් ක්‍රියාත්මක වීම මේ තත්ත්වයට හේතු වී තිබේ. සහනාධාර ලැබිය යුතුම පිරිස් ලැයිස්තුවලින් කැපී ගොස් නුසුදුස්සන් ලැයිස්තුගත වීම සිදුවන්නේ ඒ හේතුවෙනි.
මීට අමතරව විවිධ අක්‍රමිකතා සහ ඉහවහා ගොස් තිබෙන දූෂණ ක්‍රියා හේතුවෙන් මෙරට සමාජ සුබසාධන වැඩපිළිවෙළ අයත් වන්නේ ද බොහොමයක් රාජ්‍ය ව්‍යාපාර අයත් වන අසමත් කාණ්ඩයටය. මේ අසමත් වීම අවසානයේ දේශපාලකයන්ගේ වාසිය පිණිස හේතු වෙයි. තමන්ගේ ඡන්ද ගොඩ වැඩිකර ගැනීමේ කප්පමක් වශයෙන් සහනාධාර වැඩපිළිවෙළ ක්‍රියාත්මක වන්නේ එහි ප්‍රතිඵලයක් වශයෙනි. දිළිඳු සහන වැඩපිළිවෙළවල් අසමත් කිරීමේ යතුර මේ දේශපාලකයන් සතුය.
සමෘද්ධිය වෙනුවට අස්වැසුම ස්ථාපිත කිරීමෙන් ආණ්ඩුව බලාපොරොත්තු වූයේ එම කප්පම් ක්‍රමය අහෝසි කර අවශ්‍යම පුද්ගලයාට සහනාධාර ලබාදීමේ ක්‍රමයක් හඳුන්වා දීම බව රජයේ පැත්තෙන් සිදු කෙරෙන ප්‍රකාශවලින් පැහැදිලි වෙයි. එය යහපත් අරමුණක් වශයෙන් අපි දකිමු. සමෘද්ධිය ලබා ගනිමින් නිකම්ම කමින් බොමින් සිටීමේ ආකල්පය ජනතාව අතුරින් තුරන් විය යුතු කාලය එළඹී තිබෙන බවට රට ආර්ථික වශයෙන් ඇද වැටී තිබෙන තත්ත්වය මගින් පැහැදිලි සංඥාවක් ලබා දී තිබේ. අප මේ සඳහන් කරන්නේ සහනාධාර අවශ්‍යම පුද්ගලයන් සම්බන්ධයෙන් නොවේ.
කිසියම් හෝ ආදායමක් තිබෙන, ස්වයං රැකියාවක් කර ජීවත් වීමට හැකියාවක් තිබෙන, එසේත් නැත්නම් වෙනත් ආදායම් මාර්ග තිබෙන පුද්ගලයන් පවා දේශපාලන පන්දමේ අනුග්‍රහයෙන් සමෘද්ධිලාභීන් වී සිටින බව ප්‍රසිද්ධ රහසකි. මේ පුද්ගලයන් ඉවත් කර සහනාධාර අවශ්‍යම ඉතා දිළිඳු මට්ටමේ පුද්ගලයන්ට ජීවිතය ගොඩනංවා ගැනීම සඳහා ආධාර ලබාදීම අස්වැසුම වැඩපිළිවෙළේ මූලික අරමුණ විය යුතුය. එසේ නොමැතිව සහනාධාර අවශ්‍යම පුද්ගලයන් කපා දමා දේශපාලන හිතවත්කම් මත අනවශ්‍ය පුද්ගලයන් අස්වැසුම තුළ ලැයිස්තුගතව සිටී නම් ඔවුන් ඉවත් කිරීමට රජය පියවර ගත යුතුය.
අස්වැසුම වැඩපිළිවෙළට එරෙහිව රට පුරා ගොඩනැගී ඇති විරෝධතා ව්‍යාපාර සම්බන්ධයෙන් රජයේ අවධානය නොපමාව යොමුවිය යුතුය. මේ විරෝධතාකරුවන් හඬ ගා කියන්නේ තමන් අස්වැසුම ලැයිස්තුවෙන් කපා දමන අතර සහනාධාර නොලැබිය යුතු ආදායම් සහිත පිරිස්වල නම් එම ලැයිස්තුවලට ඇතුළත් කර ඇති බවය.
මේ ඇතැම් විරෝධතා සඳහා ජනතාව මෙහෙයවන්නේ දේශපාලකයන් බවට කෙරෙන චෝදනාවල පදනමක් තිබිය හැකිය. එහෙත් නුසුදුසු පුද්ගලයන් සමෘද්ධි ලැයිස්තුලට ඇතුළු කරන්නෝද මේ දේශපාලකයෝමය. අස්වැසුම ලැයිස්තුවල නුසුදුසු පුද්ගලයන් සිටී නම් ඔවුන්ගේ නම් ගම් ඇතුළු කිරීම පිටුපස සිටින්නෝද දේශපාලකයෝ හෝ ඔවුන්ගේ අනුග්‍රහය ලබන නිලධාරීහුය.
කෙසේ වුවද එම ලැයිස්තු සකස් කිරීමේදී අවශ්‍යයෙන්ම සිදුවිය යුතුව තිබූ නිවැරදි දත්ත සහ සංඛ්‍යාලේඛන පදනම් කර ගනිමින් කළ යුතු සමීක්ෂණ ඒ ආකාරයෙන් සිදුවී නොමැති බවද පෙනෙන්නට තිබේ.
සමෘද්ධිලාභීන් සියලු දෙනාම අස්වැසුම තුළ ලැයිස්තුගතව සිටිය යුතු නැත. මෙතෙක් කාලයක් දේශපාලන හිතවත්කම් මත ලැයිස්තුගතව සිටි නුසුදුසු පුද්ගලයන් ඉවත් කිරීමට පෙරමුණ ගත යුත්තේද දේශපාලකයෝ මිස වෙනත් කවුරුත් නොවෙති. මෙහිදී ලැයිස්තු සකසන නිලධාරීන්ටද ලොකු වගකීමක් පැවරෙන බවත් පැවසිය යුතුය.
(***)
