ඊ-මෝටරින් ව්‍යාපෘතියක් හඳුන්වා දෙමින් මෝටර් රථ දෙපාර්තමේන්තුවේ කාර්යයන් සාර්ථක කර ගැනීමට පිඹුරුපත් සැකසෙන්නේ 2018 වසරේදීය. මෙම ව්‍යාපෘතිය හරහා නව මෘදුකාංගයක් හඳුන්වා දෙමින් නවීන ක්‍රමවේද භාවිත මෝටර් රථ දෙපාර්තමේන්තුවේ කාර්යයන් ආරම්භ කිරීමට නියමිතව තිබුණි.
එහෙත් මෙම ව්‍යාපෘතිය මහා පරිමාණ වංචාවක් සිදුවන බවත් ඒ හරහා රුපියල් බිලියන 12ක් රටට අහිමි වන බවත් අපි 2024 පෙබරවාරි 11 දින ඉරිදා ලංකාදීපය හරහා “ ඊ- මෝටරින් නිසා බිලියන 12ක් නැතිවෙන ලකුණු” යන ලිපියෙන් රටට හෙළිදරව් කළෙමු. ඒ මෙම නව මෘකාංගය හඳුන්වා දීමේ ප්‍රසම්පාදන ක්‍රියාවලිය උල්ලංඝනය කරමින් සිදුවන ක්‍රියාදාමය පෙන්වා දෙමිනි. එම අකටයුතු ක්‍රියාදාමය මේ වන විටද ක්‍රියාත්මකවීමේ පිඹුරුපත් සැකසීමට ප්‍රවාහන අමාත්‍යාංශයේ මෙන්ම මෝටර් රථ දෙපාර්තමේන්තුවේ ඇතැම් නිලධාරිහු කටයුතු කරමින් සිටිති.
මෙම ව්‍යාපෘතිය සඳහා ප්‍රසම්පාදන ක්‍රියාවලිය යටතේ තෝරාගෙන එය ක්‍රියාත්මක කිරීමට ලබා දී තිබුණේ Metropolitan Office Pvt Ltd Metropolitan Office Pvt Ltd සහ Face Technology Pvt Ltd හි ඒකාබද්ධ ව්‍යාපාරයක් වන Advance Technology Pvt Ltd නම් හවුල්කාර සමාගමක් වෙතය. එහෙත් අප කළ හෙළිදරව්වෙන් පසු මෙම ව්‍යාපෘතියට සම්බන්ධ වූ Face Technologies Pvt Ltd ඉවත් වී ඇති බව Metropolitan Office Pvt Ltd නිල වශයෙන් 2024-02-15 දින නිලවශයෙන් දැනුම් දී තිබුණි. ඒ Metropolitan Advance Technologies Pvt Ltd ආයතනයේ සභාපතිවරයා විසින් එවකට ප්‍රවාහන අමාත්‍යාංශයේ ලේකම් ඉංජිනේරු රංජිත් රූපසිංහ වෙත එවා තිබෙන ලිපියක් මගිනි. එහෙත් අප කළ සොයා බැලීමක දී අනාවරණය වූයේ එම ආයතනය ඉවත්වූයේ 2021 වසරේදී බවය. Face Technologies Pvt Ltd ආයතනයේ ඉවත්වීම Metropolitan Office Pvt Ltd ප්‍රවාහන අමාත්‍යංශය වෙත නිල වශයෙන් දැනුම් දී නොතිබුණ බවද දැනගන්නට ලැබුණි. එම ආයතයේ ඉවත්වීම හේතුවෙන් මෙම ව්‍යාපෘතියේ තාක්ෂණික හැකියාව සහිත සහයෝගීතාව අවලංගු වී තිබේ. මේ බව වසර කිහිපයක් යනතුරු නිලවශයෙන් ප්‍රවාහන අමාත්‍යංශය වෙත දන්වා නොතිබීම බරපතළ ගැටලුවකි. ඒ බව ප්‍රවාහන අමාත්‍යාංශයේ මෙන්ම මෝටර් රථ දෙපාර්තමේන්තුවේ ඉහළ නිලධාරින් දැනුවත් වී සිටියද එම කාරණාව සඟවාගෙන සිට ඇති බවටද තොරතුරු වාර්තා වෙයි. ඒ වෙනත් සැලසුමක් ඔවුන් සතුව තිබීම නිසා බවද ප්‍රවාහන අමාත්‍යංශයේ නිලධාරිහු පෙන්වා දෙති.
2018 වසරේදී ප්‍රසම්පාදන ක්‍රියාවලියක් මගින් ඊ-මෝටරින් ව්‍යාපෘතිය ක්‍රියාත්මක කිරීමට Metropolitan Advance Technology Pvt Ltd නමැති හවුල්කාර සමාගමක් වෙත පිරිනැමීම සිදු කර තිබුණි. එම ව්‍යාපෘති ගිවිසුම අනුව ඊට ගෙවීමට අනුමත කළ මුදල වෙනුවෙන් මාසිකව අවම වශයෙන් කාර්යයන් 60,000ක් සිදුකළ යුතුව ඇත. එහිදි එම එක් කාර්යයක් සඳහා (Activity) රුපියල් 187.30ක මුදලක් ගෙවිය යුතු අතර එම මුදල වසර පහක් දක්වා ගෙවීමට ක්‍රියාත්මක වීමට නියමිතව තිබුණි. එම කාර්යයන් 60,000 මාසයක් තුළ සම්පූර්ණ කළ ද නොකළද ගිවිසුම් ගත මුදල මුල් කාර්යයන් 60,000 වෙනුවෙන් වසර පහක් යන තුරු ගෙවීම අනිවාර්ය කර තිබුණි. මේ හේතුවෙන් මෝටර් රථ දෙපාර්තමේන්තුවට රුපියල් මිලියන 700ක පමණ මුදලක් අමතරව වැය වන බව ඇස්තමේන්තු කර තිබේ.
එහෙත් මාසිකව කාර්යයන් 60,000ක් නොව 150,000 ඉක්මවා යනු ඇතැයි කියා ද ඇස්තමේන්තු කර ඇත. එහිදී වසර පහ අවසානයේ මෙම ව්‍යාපෘතිය ක්‍රියාත්මක කිරීම වෙනුවෙන් රුපියල් බිලියන 1.5-2.0 ත් අතර මුදලක් අමතරව වැයවෙනු ඇතැයි අනුමාන කොට ඇත. එහෙත් මෙම ව්‍යාපෘතිය මේ වන විට එහි ප්‍රසම්පාදන කොන්දේසි උල්ලංඝනය කරමින් ක්‍රියාත්මක වන බවක් ද පෙනෙන්නට තිබේ. ඊට හොඳම නිදසුන වන්නේ අපගේ හෙළිදරව්වෙන් පසු මෙම ව්‍යාපෘතියේ හවුල්කාර සමාගමක් වූ Metropolitan Advance Technologies Pvt Lt ආයතනය Face Technologies Pvt Ltd මෙම ව්‍යාපෘතියෙන් ඉවත්ව ඇති බවත් වෙනත් වැනි පාර්ශවයත් හරහා ව්‍යාපෘතිය කරන බවට ප්‍රවාහන අමාත්‍යාංශය වෙත දැනුම්දීමත් සමඟය.
තව ද පසුගිය රජය සමයේ මෙම ව්‍යාපෘතියේ එක් කාර්යයක් සඳහා රුපියල් 1000කට ආසන්න මුදලක් ලබාදීමට ද ප්‍රවාහන අමාත්‍යාංශය බාරව සිටි ඇමැතිවරු සහ හිටපු නිලධාරීහු කටයුතු කළහ. ඒ හරහා රජයට රුපියල් බිලියන 12ක පමණ පාඩුවක් සිදුවන බව අපි 2024 පෙබරවාරි මාසයේ දී පෙන්වා දුන්නෙමු. ඉන්පසු එම මුදල රුපියල් 350 දක්වා අඩු කොට ව්‍යාපෘතිය සිදු කිරීමට පිඹුරුපත් සැකසුණි. ගිවිසුම අනුව මිළගණන් සංශෝධනය කිරීමට හැකියාවක් නොහැකි බැවින් වැඩිකිරීමට දරණ උත්සාහය නිත්‍යනුකූල නොවේ. ඒ සඳහා විවිධ විකල්ප යෝජනා ද මෝටර් රථ දෙපාර්තුමේන්තුව වෙත ප්‍රවාහන අමාත්‍යාංශය ලබා දී තිබු බවට වාර්තාවෙයි. එහෙත් ඒවාට ඇහුම්කන් දීමක් මෙතෙක් සිදුව නැත. හිටපු ඇතැම් නිලධාරින් සහ හිටපු සමහර ඇමැතිවරුන් එක්ව මෙම ව්‍යාපෘතියෙන් රුපියල් බිලියන ගණනක වංචාවක් කිරීමට පිඹුරුපත් සැකසුනු බවට චෝදනා ද එල්ල වෙයි. රජයේ මුදල් අවභාවිත කිරීමට පිඹුරුපත් සැකසුණේ මෙවන් පසුබිමක් තුළ සිටය. මෙම ව්‍යාපෘතිය ක්‍රියාත්මක කිරීම පමණක් නොව ඒ හරහා බැඳුණ ක්‍රියාවලි මගින් මෙම මුදල් වංචා කිරීමට සැලසුම් සකසා තිබුණ බව හෙළිදරව් කර ගැනීමට ප්‍රවාහන අමාත්‍යංශයේ නිලධාරින්ට හැකි වී තිබේ.
මේ වන විටත් මෙම ව්‍යාපෘතිය කිසිම ලෙසකින් ආරම්භ කොට නැත. එසේම මෙම ව්‍යාපෘතිය බාරගත් හවුල්කාර සමාගම්වලින් එක් පාර්ශ්වයක් ඉන් ඉවත් වී ඇත. එසේ නම් ව්‍යපෘතිය වෙනුවෙන් අත්සන් කළ ගිවිසුම අහෝසි විය යුතුය. නැවත ප්‍රසම්පාදන ක්‍රියාවලියකට යා යුතුය. තව ද ප්‍රසම්පාදන ක්‍රියාවලියට අනුව නොයමින් හවුල්කාර සමාගම ද ඉවත්වීමෙන් පසු ඒ සඳහා වන්දි මුදලක් අදාළ සමාගමෙන් අයකර ගැනීමේ හැකියාව ගිවිසුම ප්‍රකාරව තිබේ. එහෙත් ඒ සඳහා මෝටර් රථ ප්‍රවාහන දෙපාර්තමේන්තුව උනන්දු වී කටයුතු කළ යුතුය. එසේ වුවත් මේ වන තෙක් එවැනි ක්‍රියාමාර්ගයකට මෝටර් රථ දෙපාර්තමේන්තුව යොමු වී නැත. අදාළ සමාගම 2021 වසරේ ඉවත් වූවා යැයි කියා මෝටර් රථ දෙපාර්තමේන්තුවේ ඉහළ නිලධාරින් දැන සිටිය බව එම දෙපාර්තමේන්තුවේ සේවකයන්ට නම් නොරහසකි. එසේ නම් එම තොරතුරු වසන් කොට කටයුතු කළේ කුමන ලාබ අපේක්ෂාවක් ලබාගැනීමේ සැළසුමකින් දැයි සොයා බැලිය යුතුය.
ප්‍රසම්පාදන ක්‍රියාවලියේදී Face Technologies Pvt Ltd ආයතනයේ තාක්ෂණික හැකියාව මත පදනම්ව අනෙක් හවුල්කාර සමාගමට මෙම ප්‍රසම්පාදනය පිරිනමා ඇති බව පැහැදිලි කරුණකි. එසේම Face Technologies Pvt Ltd ආයතනය අත්දැකීම් බහුල සුදුසුකම් සහ පළපුරුද්ද ඇති ජාත්‍යන්තර සමාගමකි. මෙම ආයතනය ඉවත්වීමෙන් පසු ඒ වෙනුවට අලු‍ත් ප්‍රසම්පාදනයකට යා යුතුව තිබුණි. එහෙත් අලු‍ත් ප්‍රසම්පාදනයකට නොයා පවතින ප්‍රසම්පාදනය ඇතුළේම Millennium L.T.S.P නමැති දේශීය සමාගමකට මෙම ව්‍යාපෘතියේ තාක්ෂණික හැකියාව ලබා දී ඇත. ඒ ප්‍රසම්පාදනයේ දී සම්මත වූ ක්‍රමවේද හා නීතිරීති උල්ලංඝනය කරමින් යැයි ප්‍රවාහන අමාත්‍යංශය ඇතුළෙන්ම චෝදනාවක් එල්ලවෙයි. එවන් පසුබිමක ප්‍රධාන තාක්ෂණික හවුල්කාර සමාගම ඉවත් වූ පසු වෙනත් පාර්ශ්වයක් සමඟ අතුරු ගිවිසුම්ගතවීම ප්‍රවාහන අමාත්‍යාංශය වෙත වාර්තා කර නොතිබීම ද මෙහි ඇති තවත් බරපතළ ගැටලුවකි. ප්‍රවාහන අමාත්‍යාංශයට නොදන්වා ගිවිසුම්ගතවීම මගින් සිදුකර ඇත්තේ මෝටර් රථ දෙපාර්තමේන්තුව සහ අදාළ සමාගම ගිවිසුම්ගත කොන්දේසි අමුඅමුවේම කඩ කිරීමක් බවට ද මේ වන විට එල්ලවෙන තවත් චෝදනාවකි.
Face Technologies Pvt Ltd ආයතනය මෙම ව්‍යාපෘතියට අදාළ පූර්ණ විශේෂාංග සහිත මෘදුකාංග පද්ධතියක් කිසිම විටෙක සකස් කර තිබී නැත. ඒ බව 2021 මාර්තු මස 02 දිනැති ICTA ආයතනය ද මෝටර් රථ දෙපාර්තමේන්තුව වෙත පෙන්වා දී ඇත. එමෙන්ම එම ආයතනය නිර්මාණය කරන ලද මෘදුකාංග පද්ධතියෙහි කොටසක් හෝ එහි Source Coad කිසිදු අයුරකින් හවුල්කාර සමාගම වන Metropolitan Advanced Technologies Pvt Ltd වෙත පවරානැතිබව වාර්තාවෙයි. එසේම අප 2024-02-11 දින පළ කළ හෙළිදරව්වේ දී එම ආයතනය ප්‍රකාශ කළේ තම ආයතනය මෘදුකාංග නිර්මාණයට අලු‍තින් එක්ව ඇති බවය. මෙම දේශීය සමාගම මෙම මෘදුකාංග පද්ධතිය මාස හයක කාලසීමාවක සිට සංවර්ධනය කරන බවට ප්‍රකාශ කර ඇත. ඒ අනුව මෙම මෘදුකාංහ පද්ධතිය එම සමාගම විසින්ම සිදු ෙකෙරන බව ඉන් සනාථ වෙයි.
මෙහි ඇති අනෙක් කාරණාව වන්නේ මෙම ව්‍යාපෘතිය කිරීම සඳහා නීතිපතිවරයාගේ උපදෙස් ලබාගැනීමට යාමය. එහිදී නීතිපතිවරයා වෙත වැරදි තොරතුරු ලබා දී මෙම ව්‍යාපෘතිය සඳහා නිර්දේශ ලබාගැනීමට ප්‍රවාහන අමාත්‍යාංශයේ ඇතැම් නිලධාරින් කටයුතු කර ඇති බවටද චෝදනාවක් එල්ල වෙයි. එම නිලධාරින් නීතිපතිවරයාගේ නිර්දේශ ලබා ගැනීමට ඉදිරිපත් කළ කාරණා ගැන නීතිපති දෙපාර්තමේන්තුව 2024-06-03 දින මාගේ අංක E/130/2023 ප්‍රවාහන අමාත්‍යංශයේ ලේකම් වෙත යවන ලිපියෙන් ද සනාථ වන බව ප්‍රවාහන අමාත්‍යංශයේ අමාත්‍යංශය නිලධාරිහුම පෙන්වා දෙති. එම ක්‍රියාදාමය හමුවේ වැරදි පූර්වාදර්ශයක් සමාජගත වෙන බවත් එය රාජ්‍ය සේවයේ උන්නතියට දැඩි බලපෑමක් බව ද එම නිලධාරිහු පෙන්වා දෙති.
මෝටර් රථ දෙපාර්තමේන්තුව සහ අදාළ හවුල්කාර සමාගම සමඟ ඇති කර ගත් ගිවිසුම ප්‍රකාරව මිල ගණන් සංශෝධනය කළ නොහැකි බවද ප්‍රවාහන අමාත්‍යංශයේ නිලධාරීහු පෙන්වාදෙති නමුත් ගිවිසුමට බාහිරව එම කටයුත්ත කරගෙන ඇති බවට චෝදනා එල්ල වෙයි.
මේ අතර දැනට මෙම කාර්යය වසර ගණනක සිට සිදුකරන වර්තමාන සේවා සැපයුම්කරු වන informatics ආයතනයද මෙම ව්‍යාපෘතිය තමන්ට කළ හැකි බවට යෝජනා ඉදිරිපත් කොට ඇත. ඒ යෝජනාවට අනුව මුළු ව්‍යාපෘතියම රුපියල් මිලියන දෙසීයකට කිරීමට හැකි බව පෙන්වා දී ඇත. ඒ අනුව මුළු පද්ධතියම යාවත්කාලීන කිරීමට හැකි බවට එම ආයතනය සිය යෝජනාවලියෙන් ඉදිරිපත් කර ඇත. එම යෝජනාවලියට අනුව එය සාර්ථක නම් දැනට ව්‍යපෘතියේ ප්‍රසම්පාදනයේ භාරව සිටින සමාගම ඉල්ලා ඇති මුදලට වඩා එය ඉතාම අඩු මුදලකි. එසේම දැනට එම සමාගම මෙම පද්ධතිය යාවත්කාලීන කොට ඇත්දැකීම් ඇති ආයතනයකි. එසේ නම් එම සමාගමේ යෝජනාවලිය ගැන සලකා බැලීමට මෝටර් රථ දෙපාර්තමේන්තුවේ සහ ප්‍රවාහන අමාත්‍යාංශයේ අවධානය යොමු විය යුතු කරුණකි.
එහෙත් එම සමාගම දැනට කරන සේවාව යාවත්කාලීන කිරීමට යෝජනා ඉදිරිපත් කළද මෝටර් රථ දෙපාර්තමේන්තුව මෙතෙක් පියවර ගෙන නැති බවද දැන ගන්නට තිබේ. එහෙයින් එම සමාගම පවසන්නේ තම යෝජනා ගැන සාධනිය පිළිතුරක් නොමැතිව වසර 25ක් පැරණි සිස්ටම් එකක් සමඟ තව දුරටත් වැඩ කිරීමට නොහැකි බව කියාය.ඒ අනුව ඉදිරි වර්ෂයේ සිට මෘදුකාංග සේවා ලබාදීමේ හැකියාවක් නැති බවද එම සමාගම පෙන්වා දී ඇත. එසේම නව මෘදුකාංග ව්‍යාපෘතියද තවම ආරම්භ වී නැත. එසේ වුවහොත් දැනට සේවාව සපයන සමාගම ද එම කටයුතු වලින් ඉවත් වන බව පවසා ඇත. එසේ වුවහොත් රියදුරු බලපත්‍ර වාහන බලපත්‍ර ලබාදීමේ මෘදුකාංග ක්‍රියාදාමයම ලබන වසරේ සිට ඇණ හිටින බවට ප්‍රවාහන අමාත්‍යංශයේ නිලධාරිහු පෙන්වා දෙති.
කැබිනට් අනුමැතිය ලැබුණ පසු තීන්දුවක් ගන්නවා
මෝටර් රථ ප්‍රවාහන දෙපාර්තමේන්තුවේ කොමසාරිස් ජනරාල්
අප මේ ගැන මෝටර් රථ දෙපාර්තමේන්තුවේ කොමසාරිස් ජනරාල් නිශාන්ත අනුරුද්ධ වීරසිංහ මහතාගෙන් කළ විමසීමක දී පැවසුවේ මේ සම්බන්ධව තීන්දුවක් ගැනීමට කැබිනට් අනුමැතිය අපේක්ෂාවෙන් සිටින බවය. දැනට ප්‍රසම්පාදන යෝජනා ඉදිරිපත් කර ඇති ආයතනය සහ දැනට සේවාව සපයන ආයතනයේ යෝජනාද කැබිනට් එකට ඉදිරිපත් කරලා තියෙනවා. එම අනුමැතිය ලැබුණ පසු ඉදිරි වැඩ කටයුතු සිදු කරන බවද මෝටර් රථ ප්‍රවාහන කොමසාරිස් ජනරාල්වරයා කීය.
අපට සිස්ටම් එක කරන්න පළපුරුද්ද හා තාක්ෂණය තියෙනවා
දැනට තියෙන සිස්ටම් එක පරණයි. අක්‍රමිකතා කරන අවස්ථාව වැඩියි
ඉන්ෆොමැටික්ස් ආයතනයේ සභාපති
මේ සම්බන්ධව අදහස් දක්වන දැනට මෘදුකාංග සේවාව සපයන informatics ආයතනයේ සභාපති නිර්මාල් ද කොස්තා පැවසුවේ මෙවැන්නකි.
දැනට තියෙන සිස්ටම් එක වසර 25කට වඩා පැරණියි. එදා තිබුණ සිස්ටම් එක සහ මෘදුකාංග සහ උපකරණ නෙමෙයි අද තියෙන්නේ. ඒනිසා සිදු කළ හැකි අක්‍රමිකතා වැඩියි. ඊට අවස්ථාව වැඩියි. වසර 25ක් තාක්ෂණ සිස්ටම් එකක් දුවන්න බෑ. වසර පහෙන් පහට ඒවා අලු‍ත් වෙන්න ඕන. ඒක අපටත් ප්‍රශ්නයක්. රජයටත් ප්‍රශ්නයක්. අපට මේ සිස්ටම් එක දුන්නොත් වඩාත් ලාබදායි විදියට මේ වැඩේ කරන්න පුළුවන්. අපේ සමාගම වසර 40ක් තිස්සේ තොරතුරු තාක්ෂණය සමඟ ඉන්න සමාගමක්. අපි ලංකාවෙන් මෘදුකාංග හදලා විදේශ රටවල් 20කට වඩා විකුණන සමාගමක්. ඒ වගේම වසර 25ක් තිස්සේ අපි මෝටර් රථ දෙපාර්තමේන්තුවේ සිස්ටම් එක කරන සමාගම. මේ නිසා අපට විදේශ සමාගමක් හෝ තවත් සමාගම් සමඟ ඒකාබද්ධව මේ වැඩේ කරන්න ඕන නෑ. අපට තනි සමාගමක් විදියට මේ වැඩේ කරන්න පුළුවන් යැයි නිර්මාල් ද කොස්තා මහතා කීය.
ගිවිසුමට පටහැණිව කිසිම දෙයක් කර නෑ
- Metropoliton Advanced Technologies Pvt Ltd අධ්‍යක්‍ෂ චන්දන රවීන්‍ද්‍ර
මේ ගැන විමසීමට Metropoliton Advanced Technologies Pvt Ltd ආයතනයේ අධ්‍යක්‍ෂවරයකු වන චන්දන රවීන්‍ද්‍ර මහතාගෙන් කළ විමසීමකදී පැවසුවේ ඊ-මෝටරින් ව්‍යාපෘතියේ කිසිදු වැඩක් ගිවිසුමට පටහැණිව කර නැති බවය. මෙම ව්‍යාපෘතිය පටන් ගැනීමට තිබුණේ 2018 වසරේ මෝටර් රථ දෙපාර්තමේන්තුවේ අය සමග ගිවිසුම් අත්සන් කළාට පසු මේ වැඩේ පටන් ගන්න තැනක් දුන්නේ නෑ. මේ සඳහා හිටපු සමාගම ඉවත් වුණාට පසු මිලේනියම් සමාගම සමග අපි වැඩ කන්න පටන් ගත්තා. එම සමාගම ලෝකය පුරාම ප්‍රසිද්ධ සමාගමක්. ඒ වගේම මෘදුකාංග නිෂ්පාදනයේ ඉදිරියෙන්ම ඉන්න සමාගමක්. මේ සමාගම තමයි ලංකාවට අවශ්‍ය QR COAD එක හඳුන්වලා හදලා නොමිලේ දුන්නේ මිලේනයිම් එක. ඒ සමාගම සමග එකතුව අපි මෘදුකාංග හදලා ඉවරයි. මේක විතරක් නෙමෙයි අපි වැඩ ගොඩක් කරලා මෘදුකාංග හදලා ඉවරයි. මේක විතරක් නෙමෙයි අපි වැඩ ගොඩක් කරලා තියෙනව. මේක ලංකාවේ සමාගම් දෙකක් එකතු වෙලා කරන්නේ.
Face Technologies Pvt Ltd සමාගම මෙම ව්‍යාපෘතියෙන් ඉවත් වෙලා ගියා. ඒ නමින් දැන් සමාගමකුත් නෑ. ඒ නිසා අපි අපේ මිල ගණන් සංශෝධනයක් දීලා තියෙනවා. එම මිල ගණන් අනුමත කර ගැනීමට කැබිනට් මණ්ඩලය වෙත යොමු කර අවසන්. කැබිනට් මණ්ඩලයේ අනුමැතිය ලැබුන පසු මෙම ව්‍යාපෘතිය ආරම්භ කරනවා. ඊට අදාළ මෘදුකාංගත් දැන් හදලා ඉවරයි. මම ඉන්නේ විදේශගතවයි. Face Technologies Pvt Ltd සමාගම ඉවත් වුණ එක ගැන ඒ බව ප්‍රවාහන අමාත්‍යාංශය වෙත යවපු ලිපිය ගැන මට උත්තර දෙන්න බෑ. මම ලංකාවට ආවට පස්සේ ඒ ගැන පැහැදිලි ප්‍රකාශයක් කරන්නම් යැයි චන්දන රවීන්‍්‍ද්‍ර මහතා කීය. ප්‍රවාහන අමාත්‍යංශයේ ලේකම් ජ්‍යෙෂ්ඨ මහචාර්ය කපිල සී. පෙරේරා මහතා සම්බන්ධ කර ගැනීම උත්සාහ කළද ඒ මහතා සිටියේ වරාය අමාත්‍යාංශයේ අයවැය පිළිබඳ රැස්වීමකය. එනිසා ලේකම්වරයා සම්බන්ධ කර ගැනීමට නොහැකි විය.
මෙම ලිපියේ අඩංගු කාරණා සම්බන්ධයෙන් ඒ ඒ පාර්ශ්ව වෙතින් කරුණු විමසුව ද ඊට සමහර පාර්ශ්ව වෙතින් පිළිතුරු ලැබුණේ නැත. එම නිසා එම පාර්ශ්වලට මෙන්ම මේ කාරණාව ගැන පුළුල්ව කතා කිරීමට අනෙකුත් පාර්ශ්වවලට අවස්ථාව තවමත් විවෘතව පවතියි.
(***)
ප්‍රගීත් සම්පත් කරුණාතිලක
සුධාරිකා ගුරුසිංහ
