පොලිස් දෙපාර්තමේන්තුව තුළ අසූපන්දහසකට ආසන්න නිලධාරීහු පිරිසක් සේවය කරති. නිල ඇඳුමෙන් සැරසී සිටින හෙයින් ද පැවරී ඇති රාජකාරියේ ස්වභාවය අනුව ද ඔවුහු වෙසෙසින් කැපී පෙනෙති. නීතිය හා සාමය ආරක්ෂා කිරීම, අපරාධ මර්දනය ඔවුන්ගේ රාජකාරියට යටත්ය. එහෙයින්ම ඔවුහු ජනතාවට අතිශයින්ම සමීප වෙති. ජනතාවගේ ආරක්ෂාව ඇත්තේ ද ඔවුන් අතමය.
මෙතරම් ජනතාවට සමීප පොලිස් නිලධාරීන් සම්බන්ධයෙන් හොඳක් අසන්නට ලැබෙන්නේ ඉඳහිටය.
තම ජීවිත ආරක්ෂාව පසෙකලා සන්නද්ධ මංකොල්ලකරුවන් සමග ගැටී එම මංකොල්ලකරුවන් තම ග්‍රහණයට ගෙන මංකොල්ලය වැළකූ අනුරාධපුර ප්‍රදේශයේ පොලිස් සැරයන්වරයා සම්බන්ධයෙන් මෙන්ම දිවි නසා ගැනීමට ගඟට පැන්න තරුණියකගේ ජීවිතය බේරා ගැනීම සඳහා නිල ඇඳුම පිටින්ම ගඟට පැන එම තරුණිය බේරාගත් පොලිස් කොස්තාපල්වරුන් දෙදෙනා සම්බන්ධ ප්‍රවෘත්තිය ආසන්න මෑත අතීතයේ පොලිස් දෙපාර්තමේන්තුවේ කීර්ති නාමය ඉහළට ඔසොවා තැබීමට සමත්වූ ප්‍රවෘත්තිවේ.
කරුණු කාරණා එපරිදි වුවද දිගින් දිගටම වාර්තාවන්නේ දහසක් නොපනත්කම් කරන පොලිස් නිලධාරින් සම්බන්ධයෙනි. තමන් යටතේ සේවය කරන පොලිස් නිලධාරින්ට අයුතු බලපෑම් කරන එපමණින් නතර නොවී ලිංගික හිංසන සිදු කරන උසස් පොලිස් නිලධාරින් සම්බන්ධ ප්‍රවෘත්ති එකක් පසුපස එකක් වශයෙනි. පාතාලයේ කෙරුමන්ට රැකවරණය සපයන ඒ වෙනුවෙන් මිල මුදල් යාන වාහන ගෙවල් දොරවල් මෙන්ම ප්‍රිය සම්භාෂණ හිරිකිතයකින් තොරව භුක්ති විඳින පොලිස් නිලධාරින් සම්බන්ධයෙන් ද ප්‍රවෘත්ති අපමණය.
පොලිස් නිලධාරින් රංචු පිටින් ගොස් මහ මග රැක මාල කඩන, මුදල් පසුම්බි පැහැරගන්නා පුවත් මෙන්ම පොලිස් ස්ථානයේ වැසිකිළියේ සිට මත්ද්‍රව්‍ය පානය කරන පොලිස් නිලධාරීන් ගැන ද වාර්තාවේ. මෙහි ඇති බරපතළකම වන්නේ මෙම චෝදනා එල්ල වන්නේ ආධුනික පොලිස් නිලධාරීන්ට මෙන්ම පොලිස් සේවයේ දිගු ඉතිහාසයක් ඇති නිලධාරීන්ට ද වීමය.
අප පුවත්පත ඉකුත් දා වාර්තා කළ ප්‍රවෘත්තියකින් කිවැයුණේ ගංජා අඩංගු පාර්සල් තොගයක් සිය නිල නිවසේ සිවිලිම අස්සේ සඟවා ගෙන ජාවාරම් කිරීමේ චෝදනා සම්බන්ධයෙන් පොලිස් විශේෂ කාර්ය බළකායේ නිලධාරින් විසින් අත්අඩංගුවට ගනු ලැබූ මොනරාගල ජ්‍යෙෂ්ඨ පොලිස් අධිකාරි බී.එස්. සිසිර කුමාර ලබන 13 වැනිදා දක්වා රඳවාගෙන, ප්‍රශ්න කිරීමට මොනරාගල දිසා විනිසුරු හා මහේස්ත්‍රාත් ඒ.එල්. සජිනි අමරවික්‍රම මහත්මිය අපරාධ පරික්ෂණ දෙපාර්තමේන්තුවට අවසර දුන් බවය.
මොනරාගල ජ්‍යෙෂ්ඨ පොලිස් අධිකාරිවරයා යටතේ එම දිස්ත්‍රික්කයේ සියලුම පොලිස් ස්ථාන පාලනය වෙයි. එබඳු වැදගත් හා බරසාර වගකීමක් ඇති ඉහළම පොලිස් නිලධාරියාට එරෙහිව චෝදනා එල්ලවන්නේ ගංජා ජාවාරමේ නියැලෙන බවටය.
පොලිස් විශේෂ කාර්ය බළකායට ලද තොරතුරකට අනුව මාර්ගයේ රැක සිට සිදු කරන ලද මෙහෙයුමක දී මෙම පොලිස් නිලධාරියා අත්අඩංගුවට ගැනීමට හැකිවී තිබේ. ඒ ඔහුගේ රියැදුරා හා තවත් පස් දෙනකු සමගින්ය. එසේ අත්අඩංගුවට ගත් එක් පුද්ගලයකු ප්‍රදේශයේ නමගිය මත්ද්‍රවය ජාවාරම්කරුවකු බවත්, ජ්‍යෙෂ්ඨ පොලිස් අධිකාරිවරයා ගමන් කරමින් සිටි අධි සුඛෝපභෝගී වාහනය මත්ද්‍රව්‍ය ජාවාරම්කරුවකුට අයත් බවත් මාධ්‍ය වාර්තාවල සඳහන්ය.
අප පුවත්පත වාර්තාකළ තවත් ප්‍රවෘත්තියකින් කියැවුණේ දකුණු පළාතේ රාජ්‍ය බැංකු තුනක ඒ.ටී.එම්. යන්ත්‍රවලින් රුපියල් කෝටියකට අධික මුදලක් සූක්ෂම අන්දමින් සොරා ගැනීමේ සිද්ධියට සම්බන්ධ බව කියන මීගහතැන්න පොලිසියේ පාලන අංශයේ ස්ථානාධිපති, විදේශිකයන් දෙදෙනකු ඇතුළු පස් දෙනකු අත්අඩංගුවට ගත් බව පරිගණක අපරාධ කොට්ඨාසය පවසන බවය. මාධ්‍ය වාර්තාවට අනුව ඒ.ටී.එම්. සොරුන්ට ප්‍රවාහන සේවාව සපයා තිබෙන්නේ ඉහත පොලිස් නිලධාරියාය. පොලිස් නිල ඇඳුම් හා පොලිස් දෙපාර්තමේන්තුවේ හැඳුනුම්පත ඔහුට ඒ සඳහා සෑහෙන වශයෙන් උපකාර වන්නට ඇතුවාට සැක නැත.
දේශපාලනඥයන්ගේ රෙකමදාරුවට උසස්වීම් ලබාදීමේ ක්‍රමවේදය තිබෙනතුරු මෙවැනි පල් හොරුන්ට පොලිසියේ ඉහළ තනතුරු ලබාගැනීමට විශේෂ බාධාවක් නැත. පොලිසිය සම්බන්ධ මහජන විශ්වාසය බිඳවැටීම තරම් අපරාධයක් රටකට නොමැති බව ද විශේෂයෙන් අවධාරණය කළ යුතුය.
(***)
