පාර්ලිමේන්තුව මුළු රටම නියෝජනය කරන මැතිවරණ කොට්ඨාසයක් බවට ඊයේ පත්විය. ඊයේ පැවැති ඒ ජනපතිවරණයෙන් ජයග්‍රහණය කරනු ලැබුවේ එක්සත් ජාතික පක්ෂයේ නායක පාර්ලිමේන්තු මන්ත්‍රී රනිල් වික්‍රමසිංහ මහතා ය. කෘතහස්ත පරිණත, අත්දැකීම් බහුල දේශපාලනඥයකු වන අභිනව ජනාධිපති රනිල් වික්‍රමසිංහ මහතාට ‘ලංකාදීප’යේ උණුසුම් සුබපැතුම් පළමුව පිරිනමමු.
මෙරට දේශපාලන ඉතිහාසයට ඊයේ අලුත් අත්දැකීමක් එක්විය. ඒ ඉතිහාසයේ පළමු වතාවට පාර්ලිමේන්තුව තුළින් ජනාධිපතිවරයා තෝරා පත්කර ගැනීමේ අවස්ථාව හිමි වූ හෙයිනි. එබඳු අවස්ථාවක් හිමි වූයේ හිටපු ජනාධිපතිවරයාට ඉල්ලා අස්වීමට සිදුවූ හෙයිනි. සමාජයේ පතුල බිඳගෙන ප්‍රකාශයට පත් වූ ජන විරෝධය හමුවේ ඉල්ලා අස්වීම හැර වෙනත් විකල්පයක් ගෝඨාභය රාජපක්ෂ මහතාට නොවීය.
එම ජන විරෝධය කොතරම් ප්‍රබලව මහෝඝයක් සේ රළ ගසා පෙරට ආවේද යත් ජනාධිපති ධුරයෙන් ඉල්ලා අස්වීමෙන් පසු ගෝඨාභය රාජපක්ෂ මහතාට රටෙන් ද පිටවීමට සිදුවිය. එබඳු දුක්ඛිත ඉරණමකට මුහුණ දුන් මෙරට ඉතිහාසයේ පළමු ජනාධිපතිවරයා ලෙස ද ඔහු ඉතිහාසයේ ඉඩක් වෙන්කර ගත්තේය. එකී සිදුවීම් මාලාව එයට හිමි නිසි ගැඹුරින් අධ්‍යයනය කිරීම අභිනව ජනාධිපතිවරයා ඉදිරිපිට ඇති පැහැර හැරිය නොහැකි පළමු වගකීම වේ.
ගුවන් නියමුවන්ට පුහුණුවේදී දෙන පළමු උපදේශය වන්නේ ‘ඔබට අත්වැරැද්දකට ඉඩක් නැත’ යන්නය. ගුවන් නියමුවන්ට පමණක් නොව රටක නියමුවා වන ජනාධිපතිවරයාට ද එම උපදේශය වලංගු වේ. ‘මේ ඛේදවාචකය මා කැන්දූ එකක් නොවේ.
මා ගත් ඇතැම් තීරණ වැරැදියි.’ ආදී ලෙස පැවැසීම ජනාධිපතිවරයාට පමණක් නොව සාමාන්‍ය පුරවැසියකුට වුවද නොහොබී. රට වෙනුවෙන් තීන්දු තීරණ ගත යුත්තේ තුන් කල් දක්නා ඉසිවර නුවණින්ය. මග නොමග කලින් දැකීමටත් ඒ අනුව කෙළින් තීරණ ගැනීමටත් ජනාධිපතිවරයකු සමත් විය යුතුය. අභිනව ජනාධිපතිවරයා තුළ එම හැකියාව නොඅඩුව ඇතැයි අපි විශ්වාස කරමු.
අප මේ ගෙවා දමමින් සිටින්නේ ඉතිහාසයේ මෙතෙක් හමු නොවූ දවස්ය. ආර්ථිකය මෙතරම් බංකොලොත් වූ යුගයක් ඉතිහාසයේ නැත. බඩු මිල මෙතරම් ගුවන්ගත වී ජනයාට දිවංගත වීමට සිදුවූ ශාපලත් යුගයක් ද ඉතිහාසයේ නොවීය. අතේ ඇති මුදලට ඉන්ධන ලබා ගැනීමට දවස් හතර පහ සාපිපාසිතව පෝලිම්වල නිරා දුක් විඳීමට අපේ පැරැන්නන්ට සිදුනොවීය. ගෑස් ලබා ගැනීමට දින ගණන් පෝලිම්වල රස්තියාදු වීමක් ද නොවීය. නව ජනාධිපතිවරයාගේ දෙවැනි වගකීම වන්නේ මේ මල පුඩුවෙන් රට නිදහස් කර ගැනීමය.
ඉකුත් දෙතුන් මස තුළදී තරම් ජනයාගේ ඇත්ත අධ්‍යාත්මය මෙතරම් විවෘත ලෙස පිටතට නිරාවරණය වූයේ නැත. හැත්තෑහතර වසරක මහලු, මජර, අශිෂ්ට, අනීතික දේශපාලන සංස්කෘතියට එරෙහිව ජනතා විරෝධය පුපුරා ගියේය. ‘අප තවදුරටත් ඉවසන්නේ නෑ’ යන පණිවිඩය ගම් නියම්ගම් නගර ජනපද සිසාරා පැතිර ගියේ ගංවතුරක් මෙනි.
අපට පෝලිම්වල දිවා රෑ දෙකෙහි දුක් විඳ මිය යාමට සිදුව තිබෙන්නේ මේ මජර දේශපාලන පාදඩයන් නිසා යැයි ජනතාව සිතති. එහෙයින් අභිනව ජනාධිපතිවරයාට මග හැර යා නොහැකි වගකීමක් වන්නේ ඒ ජනයාගේ කඳුළ සිනාවකටත් වෛරය බලාපොරොත්තුවක් බවටත් පත් කිරීමය.
කප්පිත්තෙකු නැති නෞකාවක් මෙන් අප රට ඉකුත් සමයේ පැවතුණි. ඒ තුළ ජනයාගේ බලාපොරොත්තු බිඳ වැටුණි. අපේක්ෂාභංගත්වය රජ විය. ජීවිතය කසාය මෙන් තිත්ත විය. මානව සබඳතා බිඳවැටුණු අරාජිකත්වයෙන් පිරි රටක් නිර්මාණය විය. එබඳු පරිසරයක අලුත් බලාපොරොත්තු දලුලන්නේ නැත. එහෙයින්ම එබඳු රටකට ඉදිරියට යා නොහැකිය. ඒ රට කරා නොවැළැක්විය හැකි පරිදිම උරුම වන්නේ පරාජය හා විනාශය පමණි. අභිනව ජනාධිපතිවරයාගේ වගකීම අතිශයින්ම බරපතළ හා සුවිශාල වන්නේ එහෙයිනි.
රනිල් වික්‍රමසිංහ අභිනව ජනාධිපතිවරයාට, අගමැතිවරයාට කැබිනෙට්ටුවට හා පක්ෂ විපක්ෂ මහජන නියෝජිතයන්ට අලුතෙන් ඉගෙන ගැනීමට යමක් නැත. ඉකුත් සමයේ මහජනයා සියල්ලම සියල්ලන්ටම උගන්වා තිබේ. එහෙයින් කොයි කවුරුත් පැරැණි මාවතෙන් බැහැර විය යුතුය. මජර පක්ෂ දේශපාලනයෙන් මිදිය යුතුය. බඩ රස්සාවක් බවට පත්කර ගත් දේශපාලනය සැබෑ මහජන සේවයක් බවට පත්කළ යුතුය. ඒ වෙනුවෙන් අව්‍යාජව කැපවිය යුතුය.
මහා දේශපාලන සුළි කුණාටුවකින් පසු දේශපාලනය ඊයේ සිට අලුත් ගමනක් ආරම්භ කළේය. රට යන්නේ අලුත් හා වෙනස් ගමනක්ද යන්න අද තීරණය කළ නොහැකිය. ඒ සඳහා සාධාරණ කාලයක් දිය යුතුය.
අභිනව ජනාධිපති මහතා තේරුම් ගත යුතු වන්නේ මෙම වගකීම් තමන්ට අන්තර් කාලයකට බවය. එම කෙටි කාලය තුළ සියල්ලන්ගේම සහාය ලබා ගනිමින් ඇදවැටුණු රට කෙළින් කරවීමට ඔබට ශක්තිය ලැබේවා යන්න ‘ලංකාදීප’යේ ප්‍රාර්ථනාවය.
(***)
