රූප රාජිනියක ලෙස අභිෂේක ලබා නැතත් කිරුළු පළඳා නැතත් ඇය සැබැවින්ම ලස්සන පියකරු යුවතියක වන්නීය.
නෙත් සිත් වසඟ කරන නව යොවුන් වියේ පසුවන යුවතියක වන ඇයගේ හද මඬලේ ද සුන්දර ආදරයේ කුසුම් විකසිත වූවාය.
සුදෝසුදුවන් පෙණ පිඬු නඟන වෙරළ තීරයේ පෙම්වතා සමග අතැඟිලි පටලවාගෙන පෙම්බස් තෙපළමින් පියමං කරන්න ලස්සන මල් ගොමු අතරින් පෙම්බස් දොඩවමින් පියමං කරන්න වාසනාවක් ඇයට නොලැබුණේ වෙන කිසිවක් නිසා නොව පෙම්වතා දුරු රටක සිටින නිසාය.
ඇය සිය පෙම්වතා හැඳින ගත්තේ වයිබර් තාක්‍ෂණය ඔස්සේය.
ඒ නිසාම ඇය කිසිම දවසක සැබැවින්ම ඔහු හමුවී කතා බහ කර නැත. සැබැවින්ම දැක නොමැත. එහෙත් ඇය ඔහුට මුළු හදින්ම පෙම් කළාය. ඔහුගෙන් තොර ලෝකයක් ඇය සිහිනෙකින්වත් නොපැතුවාය. ඇයගේ ලෝකයේ සිහින කුමාරයා ඔහු විය.
ගව් ගණනක් ඈත දුරු රටක පෙම්වතා සිටියත් ඇය ඔහු හා හදවතින්ම සමීප වූයේ වයිබර් තාක්‍ෂණය ඔස්සේය. මෙය නවීන තාක්‍ෂණය ඔස්සේ කරන ආදර අන්දරයකි.
නමුත් ආදර අන්දරය ඒ ආදර වසන්තය ගිනිගත්තේ ඇයගේ වයිබර් පෙම්වතා ඇය මගහරින්නට පටන් ගත් නිසාය. මාස තුනක් තිස්සේ පැවැති වයිබර් ආදර අන්දරය අවසන් වූයේ මහා ශෝකාන්තයකින්ය.
මේ සොඳුරු යුවතිය සිය වටිනා ජීවිතය කිසිදා දැක කතාබහ කර නැති පෙම්වතා වෙනුවෙන් පූජා කරන්නට තීරණය කළාය.
ආදරයේ පූජාසනය මත සිය යොවුන් දිවිය පූජා කිරීමට ඇය ගත්තේ හිතුවක්කාර තීරණයකි.
එය කිසිසේත් නිවැරදි යැයි කිව නොහැකි බුද්ධිය යටපත්කර හැඟීම්වලට වහල් වී ගත් තීරණයක් වූවාය.
මේ හිතුවක්කාරී තීරණය නිසා වඩාත් අසරණ වූයේ වේදනාවට පත්වූයේ වෙන කිසිවෙක් නොව දස මසක් කුස හොවා ලෝකයේ තිබෙන ලොකුම වේදනාව විඳ ඇය මෙලොවට බිහිකළ මව වූවාය.
ඇයගේ නැගණිය හා සහෝදරයාද සිය සහෝදරියගේ අකල් වියෝවෙන් කම්පාවට වේදනාවට පත්ව සිටියෝය.
මරණයේ වේදනාව මියගිය අයට නොව ජීවත්වන්නවුන්ටය කියා කියන්නේ ඒ නිසාය.
වයිබර් ප්‍රේමය වෙනුවෙන් නිස්කාරණයේ දිවි පිදුවේ හලාවත, මාදම්පේ, ජයරත්නගම පදිංචිව සිටි ඒකනායක මුදියන්සේලාගේ රුවිනි මේඛලා ඒකනායක (25) නම් වන්නීය.
“මට අයියා කෙනෙක් ඉන්නවා. එයා පාසල් ගුරුවරයෙක්. සියදිවි නසා ගත්තේ මගේ අක්කා. ඇය හලාවත පෞද්ගලික රසායනාගාරයක රසායනාගාර සහායිකාවක් ලෙස රැකියාව කරනවා. තාත්තාගෙන් අපි තුන්දෙනා වෙන්වෙලා අවුරුදු අටක් විතර වෙනවා. තාත්තා මත්පැන් පානය කරනවා. අපට සලකන්නේ නැහැ. ඒ නිසයි අපි තාත්තාගෙන් වෙන් වුණේ.
අක්කා මාස තුනක විතර ඉඳලා ඩිෂාන් ප්‍රනාන්දු කියා නොදුටු තරුණයෙක් එක්ක සම්බන්ධයක් පවත්වාගෙන ගියා. ඒ ඩිෂාන් කියන අයියා ජපානයේ රස්සාවක් කරන කෙනෙක් බව මට අක්කා කියා තිබුණා. අක්කා ඒ අයියා එක්ක සම්බන්ධය පවත්වාගෙන ගියේ ජංගම දුරකථනයෙන්. ඒ අයියයි අපේ අක්කයි දෙන්නා නිතරම කතාබහ කරනවා. මේ සම්බන්ධයට ඒ අයියාගේ අම්මා කැමති නැති බව මාත් එක්ක අක්කා කියා තිබෙනවා. මේ ප්‍රශ්නය ගැන නිතරම අක්කා ජපානයේ ඉන්න අයියත් එක්ක කතා කළා කියා මා දන්නවා. ජපානයේ ඉන්න අයියාට අක්කා පණිවිඩයක් යවා තිබුණා අක්කා මැරෙනවා කියා. ඒත් ජපානයේ ඉන්න අයියාගෙන් ඒ පණිවිඩයට නිසි පිළිතුරක් ලැබුණේ නැහැ.
දැනට දවස් දෙක තුනකට විතර කලින් ඉඳලා අක්කා මේ ගැනම කිය කියා හිටියා. ඒ දවස් ටිකේ අක්කා වැඩට ගියේ නැහැ. මේ සිද්ධිය වෙච්ච දවසේ උදේ 10.00 ට විතර අක්කා ස්කූටරයේ නැගලා ගෙදරින් පිටව ගියා. එහෙම ගිය අක්කා ආයෙත් විනාඩි 10 කින් විතර ගෙදර ආවා.”
මියගිය මේඛලාගේ නැඟණිය එසේ පැවසුවේ මාදම්පේ කොට්ඨාසයේ හදිසි මරණ පරීක්‍ෂක ඒ.එම්.ටී. අබේකෝන් මහතා හමුවේ සාක්කි දෙමිනි.
මේ හදිසි මරණ පරීක්‍ෂණය පවත්වනු ලැබුවේ හලාවත දිස්ත්‍රික් මහ රෝහලේ දී ය.
හදිසි මරණ පරීක්‍ෂක අබේකෝන් මහතා හමුවේ සාක්කි දුන් මේඛලාගේ නැගණිය මෙසේ ද කීවාය
“අක්කා ස්කූටරයෙන් ගෙදර ආවාට පස්සේ එයාගේ කාමරයට ගියා. ටික වේලාවකින් අක්කා හිටිය කාමරයෙන් ශබ්දයක් ඇසුණා. මම ඒ ශබ්දය මොකක්ද කියා සෝදිසි කර බලන්න කාමරයට ගියා. එතකොට අක්කා අල්මාරිය උඩ නැගලා හිටියා මම දැක්කා. මා ඇයි කියා ඇසුවා. සර්පයෙක් දඟලන ශබ්දයක් වාගේ ඇසුණා. ඒක බලන්නයි අල්මාරියේ උඩට නැග්ගේ. ඒත් සර්පයෙක් පේන්න නැහැ. ඒ නිසා මම අල්මාරියෙන් බිමට බහින්නයි හදන්නේ කියා ඇය කිව්වා. මට යන්න කිව්ව නිසා මම කාමරයෙන් එළියට ආවා. පැයකට විතර පස්සේ මම ආයෙත් අක්කා ගැන සොයා බලන්න එයා හිටිය කාමරයට ගියා. එතකොට තමා මම දැක්කේ අක්කා ගෙල වැල දමාගෙන එල්ලී ඉන්නවා. මා කෑගැසුවා. පස්සේ මම අල්ලපු ගෙදරට දුවලා විස්තරේ කිව්වා. අක්කාගේ මරණය ගැන මට සැකයක් නැහැ. අක්කා සිය දිවි නසා ගත්තා.”
මියගිය තරුණියගේ සහෝදරයා මරණ පරීක්‍ෂකවරයා හමුවේ සාක්කි දෙමින් කියා සිටියේ මෙවැනි කතාවකි.
“මියගොස් සිටින්නේ මගේ ලොකු නංගී. නංගී ජපානයේ ඉන්න අපේ රටේ තරුණයෙක් එක්ක සම්බන්ධකමක් තිබෙන බව මම දැන සිටියා. ඒත් ඇය ඒ ළමයා දැකලා නැහැ. ජංගම දුරකථනයෙන් තමා නංගී මේ සම්බන්ධය පවත්වාගෙන ගියේ. ඇය පසුගිය කාලය පුරාම ගත කළේ ජංගම දුරකථනය එක්කමයි.
මේ සිද්ධිය වෙන්න දවස් තුනකට විතර කලින් ඒ කියන්නේ පසුගිය 29 වැනිදා සවස ලොකු නංගිත් එක්ක ඇයගේ මේ සම්බන්ධය ගැන මම කතා කළා. මට එදා එහෙම කතා කරන්න හේතුව වුණේ එයා දවස් ගණනාවක්ම ජංගම දුරකථනයෙන් හඬමින් කතා කළ නිසයි. නංගී කිව්වා අපේ සම්බන්ධයට එයාගේ අම්මා කැමති නැති බව. ඔහු මේ අවුරුද්දේ අන්තිමට ලංකාවට එන බවත් නංගී මාත් එක්ක කිව්වා. මම නංගිට කිව්වා ඔහු ජපානයේ සිට එනතෙක් ඉවසාගෙන ඉන්න කියා. ඔහු ලංකාවට ආවාට පස්සේ ඔහුගේ මව්පියන් එක්ක මේ ගැන කතා කරමු කියාත් මා නංගීට පැවසුවා. දෙමව්පියන් එක්ක මේ ගැන සාකච්ඡා කරලා තීරණයක් ගනිමු කියාත් නංගීත් එක්ක කිව්වා. “මට එහෙම ඉවසන්න බැහැ” කියා එතකොට නංගි මාත් එක්ක පැවසුවා. මා ඇයගෙන් ආයෙත් ඉල්ලා සිටියේ ඔයා එයා ජපානයේ ඉඳලා එනකම් ඉවසන්න කියලයි. නංගිගේ මරණය ගැන මට සැකයක් නැහැ. ඇය සිය දිවි නසා ගත්තා කියා මට විශ්වාසයි.
හලාවත දිසා මහ රෝහලේ වැඩබලන අධිකරණ වෛද්‍ය නිලධාරි වෛද්‍ය කේ.ජේ.එච්. සාරංග පෙරේරා මහතා පශ්චාත් මරණ පරීක්‍ෂණය පවත්වා වෛද්‍ය වාර්තාව ඉදිරිපත් කර තිබිණි.
ඉදිරිපත්වූ සාක්කි සහ පශ්චාත් මරණ පරීක්‍ෂණ වාර්තාව සැලකිල්ලට ගත් හදිසි මරණ පරීක්‍ෂකවරයා මෙය සිය දිවි නසා ගැනීමක් බවට තීන්දු කළේය.
මාදම්පේ පොලිස් ස්ථානාධිපති පොලිස් පරීක්‍ෂක ප්‍රසන්න ජයලත් මහතාගේ උපදෙස් මත මෙම මරණ පරීක්‍ෂණයේ සාක්කි මෙහෙයවනු ලැබුවේ පොලිස් කොස්තාපල් එන්.එම්.ඒ.කේ. නරසිංහ මහතා (35832) විසිනි.
මේඛලා කාලයක් වෛද්‍යවරයකු ළඟ සේවය කර ඇති අතර ඇය සිය දිවි නසා ගැනීමට කලින් ඒ වෛද්‍යවරයා මුණ ගැසීමට ගොස් ඔහුගේ දුක සැප බලා පැමිණ ඇති බව ද කියති.
සිය වැඩිමල් දියණියගේ වියෝ වේදනාව දරා ගැනීමට නොහැකිවීම නිසා ඇයගේ මව කම්පනයට පත්ව රෝහල් ගත කර සිටි නිසා හදිසි මරණ පරීක්‍ෂකවරයාට ඇයගේ ප්‍රකාශයක් ලබාගැනීමට නොහැකි විය.
“වයිබර් තාක්‍ෂණය ඔස්සේ කිසිදා නොදුටු තරුණයෙක් එක්ක ප්‍රේම සම්බන්ධතාවයක් පවත්වාගෙන ගිය තරුණියක් මෙසේ සිය දිවි නසා ගැනීම ඇත්තෙන්ම ඉතා අවාසනාවන්ත තත්ත්වයක්. මේ දරුවන් තිදෙනාට පිය සෙනෙහස අහිමිවී ගොස් තිබෙනවා. බිරිඳ හා දරුවන් නොසලකා හැර තිබෙනවා. මේ දරුවාගේ පියා බීමට ඇබ්බැහිවූ අයෙක්. පියාගේ බීමත්කම නිසා ලස්සන පවුලක් විනාශවී ගොස් තිබෙනවා. කෙසේ වෙතත් ප්‍රශ්නවලට විසඳුම සිය දිවි හානිකර ගැනීම නොවේ කියන එක අවධාරණය කළ යුතුයි. සෑම ප්‍රශ්නයකටම විසඳුමක් තියෙනවා. විසඳුමක් නැති ප්‍රශ්නයක් නැහැ. ඉක්මන් හදිසි තීරණ ගන්න හොඳ නැහැ. ජීවිතයක ඇති වටිනාකම තේරුම් ගත යුතුයි. ඉවසීම කියන එක ප්‍රගුණ කළ යුතුයි. හැඟීම්වලට වහල් නොවී බුද්ධියට ඉඩ දිය යුතු වෙනවා” යැයි හදිසි මරණ පරීක්‍ෂක අබේකෝන් මහතා ඉරිඳා ලංකාදීපයට අදහස් දක්වමින් කීය.
මළ හිරු බැස යන මොහොතේ මේඛලා මිහිකත සයනයේ සැතපුණේ ඇයගේ මවට, සහෝදරයාට, සහෝදරියට හා ඥාතීන්ට සදාකාලික කඳුළක් උරුමකර දෙමින්ය.
ආදරය මෙතරම් බොළඳ ද? නැත, කිසිසේත්ම ආදරය බොළඳ නොවේ. බොළඳ, ආදරය කරන්නෝ ය.
