විරෝධතා රටපුරා නැගෙමින් පැවතිණ. ආර්ථික අර්බුදය පුපුරා යමින් තිබිණ. එවන් පසුබිමක, පසුගිය මැයි මාසයේ දී පර්සි මහින්ද රාජපක්ෂ මහතා ඔහු එතෙක් දරමින් සිටි අගමැතිධූරයෙන් ඉල්ලා අස්විය.
ඔහු එසේ ඉල්ලා අස්වූයේ එවක ජනපති, ඔහුගේ සොයුරු ගෝඨාභය රාජපක්ෂ මහතා කළ ඉල්ලීමකට අනුවය. දෙදෙනටම එරෙහිව චෝදනා නැගුණත් ගෝඨාභය රාජපක්ෂ දිගටම ජනපති පුටුවේ රැඳී සිටියේය. ඒ වෙනුවෙන් ඔහු, මුදල් අමාත්‍යවරයා ලෙස කටයුතු කරමින් සිටි බැසිල් රාජපක්ෂ මහතා වැන්නවුන් බිල්ලට දුන්නේය.
විරෝධතා ආරම්භ වන තෙක්ම, හිටපු අගමැති මහින්ද රාජපක්ෂ ශ්‍රී ලංකාවේ ජනප්‍රියතම දේශපාලඥයින් අතරින් අයෙක් විය. විරෝධතාවලින් පසුව හුදෙකලාවේ, ජනප්‍රියත්වයෙන් ඈත් වූ දිවියක් ගෙවන තැනට ඔහුව තල්ලුවුණු අතර, හුදෙකලාවේ කාලය ගෙවීම තරම් අකමැති දෙයක් ඔහුට වෙන නැත.
කරදර, ගැහැට අඩු කාලවල අමුත්තන්, මිතුරන්, දේශපාලන ආධාරකරුවන් සහ විවිධ ආධාර පතා පැමිණෙන්නන් මහින්ද රාජපක්ෂ හමුවට පැමිණියේ පොකුරු පිටිනි. එසේ පැමිණෙන බොහෝ දෙනෙක් දෑත් වැඳගෙන ඔහු පාමුල දණින් වැටෙණ අයුරු ලියුම්කරු සිය දෑසින් දැක තිබේ. එහෙත් මේ දවස්වල නම්, හුදෙකලාවේ, තනිකමින් ගෙවන දිවිය ඔහුට යම් තරමකට බලපා තිබෙණ බව පැහැදිලිව පෙනෙන්නට ඇත.
සත්‍ය තත්ත්වය එසේ වුවත්, හාස්‍ය දැනවෙන පරිදි පරිදි අදහස් නැගීමේ ඔහුගේ පුරුද්ද තවමත් එසේමය. ඔහුගේ මතකය එදා මෙන්ම තියුණුය.
නිහැඬියාව බිඳිමින්
ශ්‍රී ලංකාවේ දෙවරක් ජනපතිවරයා වූ, දෙවරක් අගමැතිවරයා ද, වූ මහින්ද රාජපක්ෂ අද නිකම් පාර්ලිමේන්තු මන්ත්‍රීවරයෙක් පමණකි. පුරා මාස 4කට ආසන්න කාලයක් රැකගෙන පැමිණි නිහැඩියාව සන්ඩේ ටයිම්ස් කළ ආරාධනයක් ඉදිරියේ ඔහු බිඳ දැම්මේය. ස්ටැන්මෝර් චන්ද්‍රවංකයේ පිහිටා තිබෙණ ඔහුගේ නිවස වෙත ළගාවීම වෙනුවෙන් ආරක්ෂක කපොලු සහ මුරකාවල් ගණනාවක් පසුකිරීමට ලියුම්කරුට සිදුවිය.
හිටපු අගමැතිවරයා රැඳී සිටින නිවස පිහිටා තිබෙන්නේ එක් පසෙකින් ගුවන් හමුදාපතිවරයාගේත්, අනෙක් පසින් ආරක්ෂක මාණ්ඩලික ප්‍රධානියාගේත් නිවෙස්වලට මැදිවය. සිවිල් ඇඳුමින් සැරසුණු ගුවන් හමුදා, නාවික හමුදා සහ යුද හමුදා සාමාජිකයෝ නිවස වටා අනුයුක්ත කර සිටිති. ඔවුහු හැසිරීමෙන් ඉතාම ආචාර සම්පන්න වෙති.
වරක් වීභූතිමත්ව තිබූ මෙම රජයේ බංගලාව වර්තමානය වන විට තරමක් ගරාවැටී තිබෙණ සෙයක් දැකගත හැකි වූ අතර මහින්ද රාජපක්ෂට පෙර හිටපු විදේශ කටයුතු අමාත්‍යවරුන් දෙපළක් වන ජී.එල්.පීරිස් සහ නැසීගිය මංගල සමරවීර යන මහත්වරු මෙම නිවසේ රැඳී සිට ඇත. පිහිණුම් තටාකයක් තිබුණ ද එය භාවිතා කෙරෙන්නේ අල්ප වශයෙනි. පීරිස් මහතා මෙම නිවසේ රැඳී සිටි කාලයේ ආලින්දය වීදුරුවලින් ආවරණය කිරීමට කටයුතු කර තිබුණු අතර, සමරවීර මහතා එම වීදුරු ඉවත් කිරීමට පියවර ගෙන තිබිණ.
“මට ඕන නැවුම් සුළඟ. මේ ආලින්දය වායු සමනය කරන්න මට වුවමනා නැහැ” යයි මංගල සමරවීර මහතා හමුවීමට වරක් මෙම නිවසට ගිය ලියුම්කරුට ඔහු පැවසුවේය.
එකළ මනා ලෙසිනුත්, අලංකාරවත් තබා තිබූ ගෘහභාණ්ඩ මෙන්ම බිත්ති සරසමින් තිබූ විචිත්‍ර සිතුවම් කිසිවක් අද එහි නැත. ඒ වෙනුවට ඇත්තේ තැනින් තැන තබා තිබෙන කුෂන් පුටු කිහිපයක් පමණකි.
හිටපු ජනපතිවරයා සහ අගමැතිවරයා තමන් වෙනුවෙන් වෙන්කරගෙන තිබෙණ කාමරයත් අඳුරු, හුදෙකලා ස්වරූපයක් ගෙන තිබේ. අරලියගහ මන්දිරයේ තේජස එහි නොවිණ. කාමරයේ එක් කොණක වූ දිගු ඇඳි පුටුවක මහින්ද රාජපක්ෂ මහතා අසුන්ගෙන සිටියේය. ඔහු සැරසී සිටියේ සාමාන්‍යයෙන් අඳින රතු කමිසයෙන් සහ සරමෙනි. ඔහු, ලියුම්කරුව පිළිගත්තේ උණුසුම් සිනහවකිනි.
දේශපාලනික අනාගතය
ආචාර සමාචාරවලින් පසුව ප්‍රශ්න කිහිපයකට පිළිතුරු දීමට හැකිදැයි ලියුම්කරු ඔහුගෙන් විමසා සිටියේය. එසේ විමසා සිටියේ මාධ්‍ය ඇසින් වසන්ව සිටීමට ඔහු තරයේම පියවර ගෙන තිබුණු නිසා සහ ඔහුගේ කාර්යමණ්ඩලය මාධ්‍ය වෙත එවන් කිසිම අවස්ථාවක් එතෙක් ලබා දී නොතිබුණු නිසාත්ය.
“අපෝ පුලුවන්”... යයි ඔහු නොපැකිළි පිළිතුරු දුන්නේය.
ප්‍රශ්න ඇසීම ආරම්භ වූයේ ඔහුගේ දේශපාලන අනාගතය ගැන කැරුණු විමසුමක් සමගය.
“මම තවදුරටත් දේශපාලනයේ රැඳී සිටිනවා.”
“මම විශ්‍රාම යන්නේ සුදුසු කාලයේදී. ඒ වෙනකන් මම යන්නේ නැහැ” යැයි ඔහු පිළිතුරු දුන්නේය.
ශ්‍රී ලංකා පොදුජන පෙරමුණේ නායකයා ලෙස ඉදිරියටත් කටයුතු කරනවා ද? යන්න විමසා සිටි කල්හි ඔහුගේ පිළිතුර මෙවැන්නක් විය.
“ඒක පක්ෂය තීරණය කරන්න වුවමනා දෙයක්”
“ඒක එහෙම වුනත්, මම නීතීඥයෙක් නිසා මට අධිකරණ කටයුතුවල නියැලෙන්න පුලුවන්. එහෙම වුවමනාවක් ආවොත් මම යන්න සූදානම්” මහින්ද රාජපක්ෂ මහතා කීවේය.
මේ අතරවාරයේදී හිටපු ජනපති මෙන්ම ඔහුගේ බාල සොයුරු ගෝඨාභය රාජපක්ෂ ගැනත් ලියුම්කරු මහින්ද රාජපක්ෂගෙන් විමසා සිටියේය. ඊට ඔහු පිළිතුරු දුන්නේ මෙසේය.
“එයා තමන් කළ යුතුව තිබුණු දෙය අවසානයක් කළ යුතුව තිබුණා. ඒත් ගෝඨාභය කියන්නේ දේශපාලකයෙක් නොවෙයි”
රටින් පළායාමට ප්‍රථම ගෝඨාභය ඔහුගෙන් (මහින්ද රාජපක්ෂ මහතාගෙන්) උපදෙස් ලබාගත්තේදැයි ලියුම්කරු විමසා සිටියේය.
“ඔහු මට ඒ බවක් කීවේ නැහැ. අනෙක ඔහු එසේ නොයා යුතුව තිබුණා”
“ඒ තීරණය ගත්තට පස්සේ මම යනවා කියා ඔහු මට කිව්වා. මම මුකුත් කිව්වේ නැහැ” යයි ගෝඨාභය රාජපක්ෂ පාලනය යටතේ රටේ අගමැතිවරයා ලෙස කටයුතු කළ පුද්ගලයා පැවසුවේය.
“යන්නද? එපාද? කියා මගෙන් ඔහු ඇහුවා නම්, මම කියන්නේ යන්න එපා කියලා” යයි මහින්ද රාජපක්ෂ මහතා වැඩිදුරටත් කීවේය.
“රටේ තියෙන ප්‍රශ්න වලට ගෝඨාභය රාජපක්ෂ තනිවම වගකිව යුතු නැහැ. මාත් ඇතුලුව සියලුම පැවති රජයන් ඒකට උත්තර බඳින්න වුවමනායි”
“නමුත් අවාසනාවකට, ගෝඨාභය වැඩ කළේ ඔහු විශ්වාස කළ විශේෂඥයින්ගේ උපදෙස් අනුව. ඒ නිසා ඔහුට දොස් පවරන්න බැහැ” යයි හිටපු අගමැතිවරයා ඉඟි කළේ මහ බැංකුවේ හිටපු අධිපතිවරුන් ගැනය.
“ආරක්ෂක ලේකම්වරයා ලෙස කටයුතු කළ සමයේ ඔහු ඉතාම ඉහළ පරිපාලන හැකියාවන් පෙන්නුවා. නමුත් ජනපතිවරයා ලෙස ඔහුට දැඩි පීඩනයන්ට ලක්වෙන්නට සිදුවුණා”
“මේ සියල්ලට පෙර ඔහු දැඩි මතධාරියෙක්. නමුත් ඔහු මෘදු පුද්ගලයෙක් බවට පත්වුණා”
“ඔහු කළ දේවල් එසේ නොකළ යුතුව තිබුණා”
“ඔහු දේශපාලකයෙක් නොවෙයි. තමන් ඉදිරියේ තිබුණු රාජකාරිය ඔහු නිවැරදිව අවසන් කළ යුතුව තිබුණා” යයි ද හිටපු අගමැති මහින්ද රාජපක්ෂ මහතා කීවේය.
බාධාකිරීම
මේ අවස්ථාවේ දී, සිවිල් ඇඳුමින් සැරසුණු උස මහත පුද්ගලයෙක් පැමිණ අප දෙදෙනගේ සංවාදයට බාධා කළේය. මහින්ද රාජපක්ෂ මහතාගේ කණට යමක් මිමිණූ ඔහු, ලියුම්කරු දෙසට හැරී, අපි දැන් නවත්තමු යැයි දැඩි ස්වරයෙන් කියා සිටියේය. එයින් ඔහු ඉඟි කළේ ලියුම්කරු තවදුරටත් ප්‍රශ්න නොඇසිය යුතු බවය.
හිටපු ජනපතිවරයාගේ මුහුණේ ඉරියව් මේ බාධා කිරීමත් සමග වෙනස් වුවත් මෙම පුද්ගලයා එතැනින් නික්ම ගිය පසුව ඔහු සාමාන්‍ය පරිදි ලියුම්කරු සමග සංවාදයේ යෙදිණ. නමුත් මෙවර සංවාදය යොමුවූයේ ගෝඨාභය රාජපක්ෂට නොව වෙනත් ගැටලු දෙසටය.
කවුරුන් හෝ අප දෙදෙනගේ සංවාදයට රහසින් සවන්දෙමින් සිටියා ද?
ද සන්ඩේ ටයිම්ස් අනුග්‍රහයෙනි
පරිවර්තනය - කෝවිද ගුණසේකර
