මීගමු වෙරළේ පෙම්වතුන්ගෙන් හා විදේශිකයන්ගෙන් කප්පම් ගන්නා පිරිසක් ගැන පසුගිය සතියේ වාර්තා කළෙමු. මේ එහි දෙවැනි කොටසයි.
දේශපාලන බලයෙන් මත් වූවන් පස්සේ යන කිහිප දෙනෙකු එක්ව සුන්දර මීගමුව අසුන්දර කරන අයුරු මෙතැකැයි කියා නිම වන්නේ නැත. ඒ එක් සිද්ධියක් වාර්තා කළ පසු තවත් සිද්ධි කිහිපයකම තොරතුරු ගලාගෙන එන නිසාය.
ගම්මානවල අතුරු පාරවල්හි තාර ඇතිරීම වෙනුවෙට කොන්ක‍්‍රීට් ඇතිරීමට වර්තමාන රජය ප‍්‍රමුඛත්වයක් දුන්නේය. දීර්ග කාලයක් රඳා පැවතීම සහ අඩු පිරිවැයක් දැරීම ඊට හේතුව බව බලධාරීහු කීහ.
මීටර් කියුබ් එකක කොන්ක‍්‍රීට් ඇතිරීමට සාමාන්‍ය මුදල රුපියල් 12000කි. බස්නාහිර ඇතැම් පාරවල්හි එම මුදලට කොන්ක‍්‍රීට් අතුරද්දී මීගමුවේ එය රුපියල් 16,000ක් පමණ විය. වැඩි වූ මුදල රුපියල් හාර දහසකි. ඒ මීටර් කියුබ් එකක් සඳහාය. එවැනි මීටර කියුබ් දහසක් නම් වැඩියෙන් වැය වූ අමතර මුදල රුපියල් හතළිස් ලක්ෂයකි.
මීගමුවේ කොන්ත‍්‍රාත් යන්නේ කාගේ හිතවතුන්ටදැයි සාමාන්‍ය වැසියන් පමණක් නොවන ප‍්‍රදේශයේ බොහෝ දේශපාලනඥයෝද දනිති. මීගමුවේ 
කොන්ත‍්‍රාත්කරුවන්ගෙන් කප්පම් ගන්නා කතාවක් ද ඇත. මීගමුවේ කොන්ත‍්‍රාත් කරුවනට වන අසාධාරණකම් ද එමට බව ඔවුහු කියති.
දැන් කියන්නට යන්නේ මීගමුවේ වෙන බව කියන තවත් ගැහිල්ලකි. විවධ වැඩවලට මීගමුවට බොහෝ දෙනෙක් එති. ඒ නිසා දිනකට මීගමුවට එන වාහන ගණනද විශාලය. ඒවා නැවැත්වීමට මීගමුවේ රථගාල්ද රැසකි. මේ රථගාල්වලින් වැඩිමනක් පාලනය වන්නේ දේශපාලනඥයකුගේ ඥාතියකු යටතේ යැයි තතු දත්තෝ කියති.
දිනකට ඒවායේ ආදායම රුපියල් ලක්ෂ ගණනක් වුවත් එම මුදල් සම්බන්ධයෙන් කුමක්වේදෝයි කිසිවෙක් නොදනිති. ඒවා ගැන නිසි විගණනයක් කළ යුතු යැයි ද ප‍්‍රදේශවාසීහු කියති.
රථගාල්වල විවිධ මිල ගණන් වලට ටිකට් තිබුණ ද හිතෙන හිතෙන පුද්ගලයන්ට දෙන්නේ හිතෙන හිතෙන ගණන්වල ටිකට්පත්ය. එක් ත‍්‍රීරෝද රථයකට රුපියල් 30ක ටිකට් පතක් දෙද්දී තවත් ත‍්‍රීරෝද රථයකට රුපියල් 50ක ටිකට් පතක් දෙයි. ඇතැම් විට වාහනවලින් නැවතුම් ගාස්තු ගත්තද ඒ සඳහා ටිකට් පතක් නිකුත් කරන්නේ නැත. මෙවැනි අසාධාරණකම් හමුවේ බොහෝ දෙනකු හිස නමන්නේ දේශපාලන හස්තයක් පිටුපසින් ඇති බව දන්නා හෙයිනි.
මසාජ් ක්ලීන් මුවාවෙන් යන ගණිකා ජාවාරම කොළඹ මෙන්ම අනෙක් පැතිවලටද පැතිරී හමාරය. හතු පිපෙන්නා සේ මීගමුවේ බිහි වන ඇතැම් මසාජ් ක්ලීනික් අස්සේ සිදු වන්නේ මොනවාදැයි ප‍්‍රසිද්ධ රහසකි. සුපිරි පන්නයට වැඩ සිදුවන නිසා ඇතැම් ස්ථාන පොලිස් ඇසින්ද මිදී ඇත. වීදි ගණිකාවක් දෙන්නෙක් අත්අඩංගුවට ගත්තත් සුපිරි පන්නයේ ස්ථාන වටලා ඇත්තේ අතේ ඇඟිලි ගණනටත් අඩුවෙනි.
මසාජ් ක්ලීනික් මුවාවෙන් කෙරෙන ඇතැම් ගණිකා නිවාස පාලනය වන්නේ ද දේශපාලන උණුහුම වැදුණු පිරිසකගේ බලයෙන් යැයි තතු දත්තෝ කියති. ඒවාට පාසල් ළමයින් යන්නේදැයි අපට විස්තර කීවකුගෙන් ඇසූවිට ඔහු කීවේ තමන් ඒ ගැන නොදන්නා බවයි. නමුත් අප කළ සොයාබැලීමේ දී හෙළි වූයේ ටියුෂන් පන්තිය යන ඇතැම් පොහොසත් දරුවන් මෙවැනි තැන්වලට යන බවයි.
ඒ ගැන ප‍්‍රදේශවාසියකු මෙසේ විස්තර කළේය.
‘‘ටියුෂන් යන සාමාන්‍ය ළමයින් නම් යන්නේ වෙරළ අයිනේ තියෙන පොඩි තැන්වලට. ඒත් සල්ලි තියෙන සමහර ළමයින් මේවගේ තැන්වලට එනවා. එයාලා එන්නේ මසාජ් කරගන්න නෙමේ. වෙන වෙන දේවල්වලට. මේවගේ තැන්වලට ගිහින් බලන් හිටියොත් දවසකට කී දෙනෙක් එනවද කියලා බලාගන්න පුළුවන්.’’
මීගමුවේ එක්තරා පොළක වෙළෙඳ කුටි වලින් මුදල් ගන්නා පිරිසක් ගැන ද කඩ හිමියෝ හා ප‍්‍රදේශවාසීහු කණස්සල්ල පළ කරති. එම මුදල් යන්නේ කාගේ 
සාක්කුවටදැයි ඔවුහු අසති. එම පොළට ගොස් වටේ කැරකි කැරකී සිටියහොත් මුදල් ගන්නා අයුරුද දැක බලා ගත හැකිය.
මීගමුවට මෑතකදී එල්ල වූ අලූ‍ත්ම තර්ජනය වන්නේ මුහුදු ප‍්‍රදේශයේ ඉඩම් බලහත්කාරයෙන් ලියවා ගැනීමය.
‘‘මේ පැත්තේ මුහුදු අයිනේ ඉඩම් ඒ මිනිස්සු බය කරලා ලියවා ගන්න ජාවාරමක් ගැන ආරංචි වුණා. හෝටල් වගේ විවිධ ඉදිකිරීම් වලට තමයි ඒවා ලියවා ගන්නේ.’’
ඒ එක පැත්තකි. මේ තවත් පැත්තකි.
‘‘කුඩු’’කිව් සැනින් මීගමුව මතක් වෙන කාලයක් තිබිණි. ලංකාවේ කොහේ කුඩු හිගයක් ආවත් මීගමුවේ එසේ නොවෙතියි වැඩිදෙනෙක් කීහ. දැන් එය ගංජා වලට ද අදාළවී ඇත. මීගමුවේ ගංජා ව්‍යාපාරයද ජයටම කෙරීගෙන යයි.
‘‘මීගමුවේ ගොඩක් තැන්වල ගංජා තියෙනවා. වෙරළ අයිනේ ගංජා විකුණන පොට් ගොඩක් තියෙනවා. සමහර කඩ වලත් විකුණනවා. මීගමුවට එන විදේශිකයන්ටත් ගංජා විකුණනවා. ඒත් වැඩිපුරම ගංජා ගහන්නේ අපේ කට්ටිය. පන්ති යන ළමයින්.
කුඩුත් ඒවගේම තමයි. ගොඩක් තැන්වල කුඩු තියෙනවා. විවිධ පැතිවල පන්ති යන ළමයින් පන්ති නොයො මීගමු වෙරළක් අයිනට ඇවිත් කුඩු, ගංජා ගහනවා. මීගමුවේ වෙරළ වැඩිය සෙනග ගැවසෙන්නේ නැති පැතිවල ගියොත් මේවගේ දර්ශන ඕනෑ තරම් දැක බලා ගන්න පුළුවන්.
මීගමුවට වැඩියෙන් කුඩු ගේන්නේ හලාවත පැත්තෙන්. හොඳ හොඳ වාහනවල තමයි කුඩු ගංජා එහෙට මෙහෙට යන්නේ. කුඩු ගන්න තියෙන තැනක් ළඟට ගිහින් බලාගෙන ඉන්න බඩු එන්නේ කොහොමද කියලා. එතතොට ඕනෑම කෙනකුට තේරේවි මේකේ හැටි.‘
මීගමුවේ කප්පම්, වංචා, දුෂණ, කුඩු සහ ගංජා නැතිවුවහොත් ඇතැම් අයගේ ජීවන තත්ත්වය කඩා වැටෙන අයුරු බලා ගත හැකිය යන්න වැඩි දෙනකුගේ මතයකි. පොලිසිය වෙනදාට වඩා මේ පැත්ත ගැන අවධානය යොමු කරයි නම් සති දෙකක් තිස්සේ අප ඉදිරිපත් කළදෑහි ඇත්ත නැත්ත හොඳහැටි වැටහෙනු ඇත.
|
නියෝජ්‍ය ඇමැතිවරයා යවා ඇති ලිපියේ මෙසේ ද සඳහන් වේ.
හිතවත් ලේකම්තුමනි, මීගමුව ආසනයේ මහජන නියෝජිතයා මාය. එහෙත් එම ලිපියෙන් පෙන්වා දී තිබුණේ එකී අකටයුතුකම්වල මෙහෙයුම්කරුවා එක්තරා දේශපාලකයකුගේ ඥාතියකු බවය. ඒ අනුව මීගමුව නමැති දෙවොලේ මෙලෙස පහරන්නේ කවුරුන් ද යන්න මීගමුවේ ජනතාව දන්නා බව එම ලිපියේ සඳහන් කර තිබීම ඒවා අනුමත නොකරන දේශපාලනඥයකු වශයෙන් මම එකී පුවත්පතට ස්තුතිවන්ත වෙමි. හිතවත් ලේකම්තුමනි, ජනාධිපතිතුමා 2005 වසරේ බලයට ආවේ ”මහින්ද චින්තනය” නමැති ලියවිල්ල රට කරවන සිය න්‍යාය පත‍්‍රය වශයෙන් ඉදිරිපත් කරමිනි.
සාර්ථකව එහි ඉලක්ක වෙත යාමෙන් පසු 2010 දී ”මහින්ද චින්තන ඉදිරි දැක්ම” එතුමා විසින් ඉදිරිපත් කළ බව රටම දන්නා සත්‍යයකි. මේ වන විට එයිනුත් ඔබ්බට ගොස් ඇති බැවින් ”මහින්ද චින්තන ආශ්චර්යයේ පිවිසුම”ට රට ගෙන යා යුතුව ඇත. 2016 වසර සංචාරක කර්මාන්තයේ ඉලක්ක වසරක් වශයෙන් ගෙන සංචාරකයන් ලක්ෂ 25ක් ගෙන්වා ගැනීමටත් ඒ තුළින් ඇමරිකන් ඩොලර් බිලියන 2.8ක වාර්ෂික ආදායමක් ලබා ගැනීමටත් අපේක්ෂිතය. මෙය ජනාධිපතිතුමාට තනිව ජයගත හැකි ඉලක්කයක් නොවේ. එහි වගකීම පැවරී ඇති සියලූ ආයතන හා වගකිව යුත්තන් ඒ සඳහා අවංකව කැපවිය යුතුය. මා කියන්නේ වැඩ කිරීම සඳහා නාගරික සංවර්ධන අධිකාරියේ පරිපාලන රටාව ආදර්ශයට ගෙන රාජ්‍ය ආරක්ෂක හා නාගරික සංවර්ධන අමාත්‍යාංශයේ ලේකම් ආචාර්ය ඝෝඨාභය රාජපක්ෂ මැතිතුමා අනුව යා යුතු බවය. එබැවින් වෙළෙඳ නගරයක් වශයෙන් සංවර්ධනය කිරීමට යෝජිත මීගමුව විනාශ වෙන්නට නොදී පොලිසියේ කාර්යය ඔවුන් විසිනුත්, ලංකා සංචාරක සංවර්ධන අධිකාරියේ වගකීම් එම අධිකාරිය විසිනුත්, වෙරළ සංරක්ෂණ දෙපාර්තමේන්තුවේ කාර්යයන් එහි නිලධාරීන් විසිනුත්, මීගමුව මහ නගර සභාවේ වගකීම් ඔවුන් විසිනුත්, මිල පාලන දෙපාර්තමේන්තුවේ හා පාරිභෝගික අධිකාරිය ඇතුළු අදාළ අනෙකුත් ආයතනවල කාර්යයන් ඒ ඒ ආයතනවලිනුත් නොපමාව ඉටු විය යුතුය. ඔවුනොවුන්ගේ වගකීම් නිසි පරිදි ඉටු වූයේ නම් අති බහුතරය ගුණ යහපත් මිනිසුන් ජීවත් වන මාගේ හදවත බඳුවූ මීගමුව, ඉරිදා ලංකාදීප පුවත්පතින් එලෙස අපවාදයට ලක් වන්නේ නැත. |
