ලාංකික සිනමා ක්ෂේත්‍රයට තම කුළුදුල් සිනමා නිර්මාණය වන මෝටර් බයිසිකල් රැගෙන ප්‍රේක්ෂක ඔබ හමුවට එන්න දින ගනිමින් ඉන්න තරුණ අධ්‍යක්ෂවරයෙක් වන ශමීර රංගන නාඔටුන්න සමඟයි හදසර මේ කතා බහ.
ශමීර කොහොමද? මේ දවස්වල මොකද කරන්නේ?
මේ මස 26 වැනිදා සිට මෝටර් බයිසිකල් චිත්‍රපටය දිවයින පුරා තිරගත වීම ආරම්භ වෙනවා. ඉතින් ඒ සඳහා අවශ්‍ය කරන මුලික සැලසුම් සහ ප්‍රචාරණ කටයුතු කරගෙන යනවා. ඒ නිසා ටිකක් කාර්යබහුල වෙලා ඉන්නේ.
ඔබ බොහෝ කාලයක සිට බලාපොරොත්තු වූ අවස්ථාවක් මේ. මොකද හිතෙන්නේ?
ඇත්තටම සතුටුයි. තරුණ පරපුරේ අලුත් සිනමාවේදියෙක් විදියට චිත්‍රපටයක් කරලා ඒක සම්මානවලට සහ ඇගයීම්වලට ලක්වීම සතුටක් විදිහට දැනෙන්නේ. ලංකාවේත් විවිධ අවස්ථාවන්හිදී මේ චිත්‍රපටය බලන්න සුළු ප්‍රේක්ෂක පිරිසකට අවස්ථාව උදා වුණා. ඉතින් ඒ අවස්ථාවලදීත් ප්‍රේක්ෂකයින්ගේ හොඳ ප්‍රතිචාර ලැබුණා මේ චිත්‍රපටයට. ඒ නිසා ලාංකික සමස්ත ප්‍රේක්ෂකයින්ටම බලන්න චිත්‍රපටය මුදා හරින්න ලොකු බලාපොරොත්තුවකින් හිටියේ. ටිකක් කල් ගියා. නමුත් ඒ අවස්ථාව දැන් හරි උදා වීම ගැන සතුටුයි. මම විශ්වාස කරනවා මම වගේම අලුත් සිනමාවේදින්ටත් බලාපොරොත්තු තැබිය හැකි කරුණක් මේ මෝටර් බයිසිකල් තිරගතවීම. විශේෂයෙන්ම තරුණ පරපුරේ අලුත් සිනමාවේදීන් මේ තුළින් දිරිගැන්වීමක් වෙනවා.
සම්මාන ගැන මතක් කළ නිසාම අපි කියමු ලද සම්මාන ගැනත්
2015 කොළඹ සාර්ක් අන්තර්ජාතික සිනමා උළෙලේ දකුණු ආසියාවේ හොඳම සිනමාපටයට හිමි සම්මානය, කොළඹ ජාත්‍යන්තර සිනමා උළෙලේ mosak of sri lankan new film කියන සම්මානය, එම උළෙලේම හොඳම ශ්‍රී ලාංකික චිත්‍රපටයට හිමි නෙට් පැක් සම්මානය යන සම්මාන ලැබුණා. ඒ වගේම 21 වැනි කල්කටා අන්තර්ජාතික සිනමා උළෙලේ දී ආසියාවේ හොඳම චිත්‍රපටයට නිර්දේශ වුණා. බැංගලෝර් සිනමා උළෙලෙත් මේ චිත්‍රපටය ආසියාව නියෝජනය කළා සහ යාපනය අන්තර්ජාතික චිත්‍රපට උළෙලේ තරගකාරී අංශය නියෝජනය කළා. ඒ වගේම 2015 දෙරණ සිනමා සම්මාන උළෙලේ දී හෙට දවසේ බලාපොරොත්තු තැබිය හැකි සිනමා නිර්මාණය විදියට සම්මාන ලැබුණා.
ඔබ ඔබේ පළමු නිර්මාණයට යොදාගත්ත ප්‍රස්තුතය ගැන අද මොකද හිතෙන්නේ?
නිර්මාණවේදියෙක් විදියට යම් ප්‍රස්තුතයක් තෝරාගනිද්දී සැලකිලිමත් වෙන්න ඕනේ රට සහ රටේ ජනතාව ගැන. මොකද රටේ ජනතාව අතරට තමා අපි කරන නිර්මාණය අරන් යන්න ඕනේ. මම හිතනවා මේ මෝටර් බයිසිකල් කියන නිර්මාණය තුළ විශ්වීය ලක්ෂණ තියෙනවා. මේ දේ ලංකාවේ වෙන්නත් පුළුවන් ඉන්දියාවේ වෙන්නත් පුළුවන්. ඒ වගේම අපි හැමෝගෙම ජීවිතවල මේ අත්දැකීම අඩු වැඩි වශයෙන් තියෙනවා. ඒ නිසා මේ නිර්මාණය අදටත් හෙටටත් වලංගුයි.
මේ කාලය තුළ තිරගත වීම ගැන මොකද හිතෙන්නේ?
මෙහෙමයි මම හිතන්නේ. මේ කර්මාන්තය රැකෙන්න නම් සිනමා ශාලා වෙත ප්‍රේක්ෂකයෝ එන්න ඕනේ. එතකොට තමා කර්මාන්තයක් විදියට මේක දියුණු වෙන්නේ. ඒ වගේම සිනමා ශාලාවට ප්‍රේක්ෂකයෝ ගෙන්න ගන්න පුළුවන් නිර්මාණ හැදෙන්න ඕනේ. අපි හදන සිනමාපටය හොඳ නම් අවංක නම් සහ සාර්ථක නම් ඒ නිර්මාණය ප්‍රේක්ෂකයෝ වැළඳ ගන්නවා. ඒකට කාලය බලපාන්නේ නැහැ. ප්‍රේක්ෂකයන්ට දැනෙන සිනමාපටයක් නම් එයාලා තමා ඒ සිනමාපටය ඉදිරියට අරගෙන යන්නේ.
නිර්මාණයට සම්බන්ධ පිරිස ගැනත් මතක් කරමු
ඔව් අනිවාර්යෙන්ම ඒ ගැන මතක් කරන්න ඕනේ. විශේෂයෙන්ම නිෂ්පාදක සුරංග ජයසුරිය. ඔහු මා වැනි අලුත් කෙනෙක් කෙරෙහි විශ්වාසය තැබීම ගැන මගේ ස්තූතිය පිරිනමනවා. ඒ වගේම කැමරා ශිල්පී විශ්වජිත් කරුණාරත්න, කලා අධ්‍යක්ෂණය රංගන සේනානායක, සංස්කරණය තිස්ස සුරේන්ද්‍ර, සංගීත අධ්‍යක්ෂවරයා අජිත් කුමාරසිරි, ශබ්ද පරිපාලනයෙන් අරුණ ප්‍රියන්ත කළුආරච්චි, වේෂ නිරූපණයෙන් ප්‍රියන්ත එස් වන්නිනායක, සහය අධ්‍යක්ෂණය දමින්ද ඩී. මඩවල, නිෂ්පාදන කළමනාකරු දීපාල් ගුණරත්න මේ හැමෝගෙම සාමුහික ප්‍රයත්නයක් විදියට තමා මම මේ නිර්මාණය දකින්නේ. ඒ වගේම රංගනයෙන් ප්‍රධාන චරිත දෙක කරන්න දසුන් පතිරණ සහ සමනලී ෆොන්සේකා, ප්‍රවීණ රංගන ශිල්පීන් ශිල්පිනියන් වන මහේන්ද්‍ර පෙරේරා, වීණා ජයකොඩි, කුමාර තිරිමාදුර, නෙතලි නානායක්කාර මේ හැමෝම ලොකු කැපවීමක් කළා.
ප්‍රෙක්ෂකයින්ට මොකක්ද කියන්නේ?
මම කියන්නේ මෝටර් බයිසිකල් චිත්‍රපටය ශ්‍රී ලාංකික ප්‍රේක්ෂකාගාරයට අලුත් අත්දැකීමක් එකතු කරනවා. මේක අපි ගැන කතා කරන චිත්‍රපටයක්. මේ තුළ තියෙන්නේ යථාර්ථය. ඒවගේම තාරුණ්‍යය ගැන සිහින ගැන ආදරය ගැන බලාපොරොත්තු ගැන කතා කරන්නේ. ඔබට පවුලේ සියලු දෙනා එක්කම එකට නැරඹිය හැකි චිත්‍රපටයක්. ඒ නිසා 26 වැනිදායින් පසු ළඟම තියෙන සිනමා ශාලාවට එන්න කියලා ආරාධනා කරනවා.
අවසාන වශයෙන් මොනවද කියන්න තියෙන්නේ?
විශේෂයෙන්ම ජාතික චිත්‍රපට සංස්ථාවේ සභාපති දීපාල් චන්ද්‍රරත්න මහතාටත් මේ චිත්‍රපටයට දායක වුණු සියලුම දෙනාටත් ස්තූතිවන්ත වෙන්න හදසර අවස්ථාවක් කරගන්නවා. ඒ වගේම නැවතත් ආරාධනා කරනවා ආදරණීය ප්‍රේක්ෂකයින්ට එන්න මෝටර් බයිසිකල් චිත්‍රපටය බලන්න. මේ ඔබට ඔබවම හමුවෙන චිත්‍රපටයක්.
අනූෂා රණසිංහ
