මේ දිනවල ෆේස්බුක් සමාජ ජාලය තුළ එහා මෙහා මාරුවන වීඩියෝවක් ලෙස "යාල් දේවි" රූපවාහිනි කතාමාලාවේ ප්‍රචාරය පටය හැඳින්විය හැකිය. සිංහල දමිළ මිනිසුන් අතර ඇති සහෝදරත්වය සහ කුරිරු යුද්ධයෙන් පසුව එම මිනිසුන්ගේ ජීවිත කෙසේ හැඩගැහුණේද යන්න කියාපෑමට උත්සාහයක් දරනා කතාමාලාවක් ලෙස "යාල් දේවි" රූපවාහිනි කතාමාලාව හැඳින්විය හැකිය. මෙහි ප්‍රධාන චරිතයක් සඳහා රංගනයෙන් දායක වන සුභාෂිනී බාලසුබ්‍රමනියම් එම කතාව පිළිබඳව පවසන්නේ මෙවැන්නකි.
"යාල් දේවි" ගැන කියනවානම් මේ වෙනකම් මෙගා නාට්‍යවලින් තිබුණු විලාසිතාවෙන් එහා ගිය කතාවක් කියලා කියන්න පුළුවන්. සාමාන්‍යයෙන් කොටස් 40 කින් විතර කියන කතාවක් මෙගා පැත්තට හැරුණා කියලා කියන්න පුළුවන්. ඒ තරම් ලස්සන කතාවක් කියලා කියන්න පුළුවන්. මෙගා ටෙලිනාට්‍යවල අවසානය මොකක්ද කියල රංගනයෙන් දායක වන කවුරුත් දන්නේ නැහැනේ. නමුත් "යාල් දේවි" එකේ අවසානය මොකක්ද කියලා අපි හැමෝම දන්නවා. ඒවගේ නාට්‍යයක් තමයි "යාල් දේවි" කියන්නේ. ඒ වගේම කසුන් සමීර කියන්නේ තරුණ අධ්‍යක්ෂකවරයෙක්. "මීදුමක් වගේ" හොඳ නාට්‍යයක් කරපු කෙනෙක්. අනෙක් පැත්තට හැරිලා "යාල් දේවි" කියන නාට්‍යයෙන් වෙනසක් කරලා තියෙනවා කියලා කියන්න පුළුවන්.
ඒ සඳහා දායක කරගෙන තියෙන කණ්ඩායමත් ගොඩක් සහයෝගයක් දක්වනවා. මොරින් ආන්ටි, සාරංග අයියා, විනු, ශෙහානි, නිරංජනී වගේ කට්ටිය එකතු කරගෙන තියෙන එකම පුදුමයි. මොකද ඒ චරිත සඳහා හරියන කට්ටිය තමයි මේ සඳහා දායක කරගෙන තියෙන්නේ. ඒ බව දැනෙන්නෙ ඒ අයත් එක්ක රංගනයෙන් දායක වෙද්දී. "යාල් දේවි" කියන්නෙ යුද්ධ කාලයේදී තිබුණු ප්‍රශ්න පෙන්නන එකක් නෙමෙයි. "යාල් දේවි" කියන නම බලද්දී ගොඩක් අයට හිතෙයි ආයෙත් ඉතිං යුද කතාවක් හා එහිදී තිබුණ යුද්ධය පෙන්නයි කියලා. නමුත් එහෙම නෙමෙයි. එතැනින් එහාට අද වෙනකොට ජීවිතය කොහොමද තියෙන්නේ, සිංහල හා දෙමළ මිනිස්සු අතර තියෙන මිත්‍රත්වය කොහොමද? ඒ අය අතර තියෙන පොඩි පොඩි ප්‍රශ්න මොනවාද කියලා හරි ලස්සනට කියපු කතාවක් තමයි "යාල් දේවි" කියන්නේ.
ඩිලාන් ක්‍රිෂාන්ත / ඡායාරූප - සුභාෂිනිගේ ෆේස්බුක් ගිණුම
