‘අපි අරණායක නාය ගිය ස්ථානය බලන්න ගියා. . 1000ක් පමණ පිරිසකුත් අවට හිටියා. ඒ වෙලාවේ මහ වැස්ස. නාය ගිය පෙදෙසේ ඉතිරිව තිබූ එකම ස්ථානය වූ බුදු කුටිය අසල සෙවණට සිටියදී එක්වරම ලොකු ශබ්දයක් ඇසුණා. එය මහා විශාල ශබ්දයක්. අපි කලබල වුණා. වටපිට බැලුවා. එක්වරම ජල පහරක් සමග මඩ මහ කුට්ටි ගසාගෙන පහළට ආවා. නැවතත් ඊටත් වඩා විශාල ශබ්දයක් ආවා. අපට උතුර දකුණ බලාගන්න බැරිවුණා. දිව්වා. දුවද්දී බුදු පිළිමවහන්සේ සිටි තැනින් වම් පැත්තේ කන්දක් දැක්කා. ඒ කන්දට නැග්ගා. ඒ කන්දේ ගෙවල් තිබුණා. හැබැයි ගෙවල්වල කවුරුත් නෑ. අප දුටු පුදුමයනම් දෙවැනි වරටත් සාමසර කන්ද නායයාමෙන් බුදු පිළිමයට හෝ කුටියට හානියක් නොවීමයි.‘ යනුවෙන් ලංකාදීප මාධ්‍යවේදීහු සිය අත්දැකීම විස්තර කළහ.
අසල කන්දට නැග සිටියදී වැසි නතරවූ නමුත් තද වැහි කළුවක් දක්නට ලැබිණි. එවිට වේලාව පස්වරු 6ට පමණ විය. හෙම්බත්වී සිටි හමුදා සෙබළුද සෙසු සහන සේවකයෝද දවසේ මෙහෙයුම් අවසන් කළහ.
ගෙවල් 66 ක සිටි මිනිසුන්ගෙන් වැඩි පිරිසක් ඔවුන් උපන්දා සිටම හැදී වැඩුණු ගමේ අඩි ගණනක් යට වැළලී සිටිති.
මෙම නාය යෑම් බැලීමට පැමිණීම තදබල අනතුරුදායක බව ආපදා කළමනාකරණ ඒකකය පවසයි.
ඡායාරූප - කෞශල්‍ය සමින්ද
ඡායාරූපය - රතු කුරුස සංවිධානයේ අනුග්‍රහයෙනි
