"චක්‍රය බිඳී යයි" (Breaking The Karmic Cycle) මුද්‍රානාට්‍ය අද (04දා) සවස ලයනල් වෙන්ටඩ්හිදී
නිදුක් මධුෂික
මීට විසි දෙවසකට පෙර තමන් ඉගෙන ගත් විවිධ නර්තන කලාවන් හා නාට්‍ය තවත් පරපුරක් වෙත ගෙන යාමේ අභිප්‍රා‘යෙන් ඔහු ක්‍රියේටිව් ඩාන්ස් ඇන්ඩ් ඩ්‍රාමා ඇකඩමිය ආරම්භ කළේය. එහි අස්වැන්න මේ වනවිට නාට්‍ය කලාවට නර්තන කලාවට ඔහු දායාද කරමින් සිටියි. ඔහු නර්තන ආචාර්ය නිලාන් මලිගැස්පය. රාජ්‍ය නාට්‍ය උලෙළට දිගු නාට්‍ය අංශයේ වැඩිම සහභාගීත්වයක්ද ඔහුගෙනි. ඔහුගේ නර්තන හා නාට්‍ය ඇකඩමියට වසර විසි දෙකක් සපිරීම නිමිත්තෙන් නිර්මාණය කරන ලද %චක්‍රය බිඳී යයි^ (Breaking The Karmic Cycle) මුද්‍රානාට්‍ය හෙට (04දා) සවස ලයනල් වෙන්ටඩ්හිදී වේදිකාගත කිරීමට නියමිතය. මේ ඒ පිළිබඳව මලිගැස්පයන් සමග කළ කතාබහකි.
මුලින්ම චක්‍රය බිඳී යයි මුද්‍රානාට්‍ය ගැන කතාකරමු?
සිදුහත් කුමරු ගිහිගෙයින් නික්ම ගිහින් පැවිදි බව ලබනකම් සිදුවන කතා පුවත තමයි මම බැලේ නාට්‍ය‘යෙන් දක්වන්නේ. මෙහිදී ඒ ගමන අතර අපි දකින සිදුවීම් කතා කරනවා. ඒ තුළ තිබුණු රියැලිටිය ගැන කතා කරන්න මම උත්සාහ කළා. මේ තුළ කතා කරන්නේ අපි අහලා තිබුණත් දකින්න උත්සාහ කළ නැති දේවල් ගැන. මම පසුගිය වසරේ මැල්සියාවේ ප්‍රදර්ශනය කළා. මීට පෙර ඔවුන් ලංකාවේ මුද්‍රානාට්‍යයක් දැක තිබුණේ නැහැ. ගිය වසරේ මම ඉන්දියාවේ චව් ඩාන්ස් සහ මොඩන් ඩාන්ස් මික්ස් කරලා නර්තන නිර්මාණයක් කළා. මෙවර කතක් නර්තනය යොදාගෙන තිබෙනවා. මේ "චක්‍රය බිඳී යයි" දන්න කතාවක් වෙන්න පුළුවන්. නමුත් නොදන්න දෙයක් මේ තුළ කතා කළ යුතුයි. මම ලොකු පසුතල හදන්නේ නැහැ. බොහෝ විට ඉවත දාන දේවල්වලින් පසුතල නිර්මාණය කරන්නේ.
මෙවැනි මුද්‍රානාට්‍යයක් නැරඹීමට එන ප්‍රේක්ෂකාගාරය ගැන තිබෙන්නේ කෙබඳු අදහසක්ද?
මුද්‍රානාට්‍ය කියන්නේ නර්තන කලාව තුළ ශාරීරික හා මානසිකත්වය සුවපත් කරන කලාවක්. ලංකාවෙත් එහෙම කාලයක් දශක තුනකට පමණ පෙර චිත්‍රසේන සර්ලාගේ කාලේ තිබුණා. මුද්‍රානාට්‍යවලත් තියන්නේ බැලේ තියෙන එක තමයි. ඒ කලාව අපේ සංස්කෘතියට බද්ධ වෙලා තමයි ගමන් කළේ. මම දකින්නේ මේ වෙනකොට මුද්‍රනාට්‍ය කලාව ක්ෂය වෙමින් ගිහින්. 1989 පසු මට මෙහි හොඳ තත්ත්වයක් දැකගත නොහැකි වුණා. එහෙත් මම එය නොනවත්වාම මම කරගෙන ගියා. මුද්‍රානාට්‍යයක් කියන්නේ චෙස් ක්‍රීඩාවක් වගේ ප්‍රභල දෙයක්. මම මුද්‍රානාට්‍ය කලාවට ඇතුළත් වෙන්නෙත් බාහිර නර්තන ශිල්පියෙක් ලෙස. මට මුද්‍රානාට්‍ය කරන්න පටන්ගන්න හිතුණා. මේ ගැන අධ්‍යයනය කරලා මම මොඩන් බැලේ පැත්තෙන් මේක ආරම්භ කළා. මේ මගේ 14 වැනි නිර්මාණය. මේ මොහොතේ විශාල පිරිසක් නැති වුණත් මෑතක ලොකු කතිකාවක් ඇතිවෙයි. මම දන්නේ නැහැ මගේ ප්‍රේක්ෂකාගාරයේ දෙදෙනෙක් ඉඳියිද තුන්දෙනෙක් ඉඳියිද කියලා. කරන දේ සමාජයට පිළිලයක් නොවන නිසා මම කැමැති මෙය නැවත නැවත සමාජයට ගේන්න.
මෙම විෂයෙහි සාර්ථකත්වයට මෙය අධ්‍යාපනය පද්ධතිය තුළටත් ඇතුළත් විය යුතුයි නේද?
මට පාසල්වලත් මෙය කරන්න අවශ්‍යතාව තිබුණා. කිසිම අධ්‍යාපනයක් ලබාදෙන්නැති විෂයක් ගැන හදාරන්න කැම්පස් එකෙන් කිහිපදෙනෙක් ඉඳහිට බිහිවෙනවා. ඔවුන් මුද්‍රානාට්‍ය ගැනවත් සමහර අවස්ථාවල දන්නේ නැහැ. පාසල් අධ්‍යාපන පද්ධතියටවත් ඇතුළත් කළ හැකි නම් මම හිතනවා එය සාධනීය දෙයක් වෙයි. එහෙත් අකුරු කියවන්න බැරි කෙනෙකුට අකුරු කියවන්න දීලා ඔටෝ කියවෙයි කියලා බලන් හිටියට වෙන්නේ නැහැ. අද IT උපරිමයට ගිහින් තියෙනවා. නමුත් ගෙදරදී ශිෂ්‍යයා තේ කෝප්පෙ බීලා කැරපොත්තෝ, හූනෝ වහනකම් තේ කෝප්පේ අයින් කරන්නේ නැහැ. අම්මා හරි තාත්තා හරි හෝදනකම් බලන් ඉන්නවා. පරිගණකය තුළ ඉන්න ඔවුන් නාට්‍යකරණයට යොදාගත හැකි නම් ඉතා හොඳයි. දරුණු දේවලට හිත යොමුවෙන්නේ නැහැ. මම හිතනවා විසි තුන්වැනි සංවත්සරයේ ඉඳන් විවෘත මුද්‍රනාට්‍ය තරගයක් පවත්වන්න. කැසිකල්, බැලේ සහ මොඩන් බැලේ ලෙස ඛාණ්ඩ දෙකකට තරග පවත්වන්න.
ප්‍රේක්ෂකාගාරයක් නැති වුණාම නිෂ්පාදකයන් අභියෝගාත්මක තැනකට එනවා?
මම වර්ෂයක් පාසා කරන නිෂ්පාදන මගේ මුදලින් හෝ මම ප්‍රදර්ශනය කරනවා. මම ස්වේච්ඡාවෙන් ශිෂ්‍යයන්ට මේ දැනුම ලබාදෙන්නේ. මට අවශ්‍ය නව දක්ෂයන් මෙයට ගෙන එන්න. මෙවරත් අම්පිටිය ප්‍ර‘දේශයේ ශිෂ්‍යයන් කිහිප දෙනෙක් වැඩකරනවා. මම ලංකාව පුරා ගිහිං වැඩ මුළු කරනවා. නිෂ්පාදනයටත් වඩා මට ඕන මෙය ව්‍යාප්ත කරන්න. මම හිතන්නේ ලංකා ප්‍රේක්ෂකාගාරයටත් මෝඩන් බැලේ වගේ දෙයකට යනවා. ඉන්දියානු සංස්කෘතික මධ්‍යස්ථානය, ජර්මන් සංස්කෘතික මධ්‍යස්ථානය මට උදව් කරනවා. පන්තියේදීත් අපි තැනකට එක් සීමා නොවී කටයුතු කරනවා. මම හැමෝටම ආරාධනා කරනවා ඒ වගේම නර්තනය ගැන නාට්‍ය ගැන හැදෑරීමට කැමති කෙනෙක් ඉන්නවා නම් මට කතා කරන්න පුළුවන්.
නිලාන් මලිගැස්ප, ACDA 289/12, සේපාලිකා උයන, වටරැක, පාදුක්ක
0714740799
- නිලාන් මලිගැස්පගේ 'Breaking the Karmic Cycle'
- නිලාන් මලිගැස්පගේ 'Breaking the Karmic Cycle' ජුනි 4 වැනිදා
