විශේෂයෙන්ම පළතුරු සහ පළතුරු යුෂ සඳහා ඇති ඉල්ලුමේ වර්ධනයක් පෙන්නුම් කරන තත්ත්වයක් තුළ රාමදාන් සමයේ දී බොහෝ දෙනෙකු ගුණදායක ආහාර පාන අනුභව කිරීමට කැමැත්තක් දක්වන බවක් දකින්නට ලැබෙයි.
සීනි මට්ටම ඉහළ අගයක් ගන්නා බෝතල් කළ බීම වර්ග සහ රසකළ පාන වර්ගවලට සාපේක්ෂව පළතුරු, නැවුම් යුෂ වර්ග සහ යෝගට් අලෙවියේ ඉහළ යාමක් පෙනෙන්නට ඇති බව වෙළෙඳපොළ ආරංචිමාර්ග අනාවරණය කරයි.
බොහෝ දෙනෙකු රාමදාන් සමයේ දී සාම්ප්‍රදායික ආහාර සහ පාන වර්ග පාවිච්චියට කැමැත්තක් දක්වයි. කෙසේ වෙතත් බෝතල් කළ බීම වැනි සාම්ප්‍රදායික නොවන ආහාර වර්ග ද ඉෆ්තාර්වල දී පිළිගන්වනු ලැබේ.
උණුසුම් කාල ගුණය සහ දීර්ඝ කාලයක් උපවාසය කිරීම නිසා නැවුම් පළතුරු යුෂ අලෙවිය සියයට 15 කින් පමණ ඉහළ ගොස් ඇති බව වෙළෙන්දෝ පවසති.
බෝතල් කළ බීම වර්ගවලට සාපේක්ෂව බෝතල් කළ පළතුරු යුෂ සහ නැවුම් පළතුරු යුෂ සඳහා වන ඉල්ලුම ඉහළ බව සුපිරි වෙළෙඳ සංකීර්ණ පවසයි.
“රාමදාන් මාසයේ පළමු දිනේ ඉඳලා මිනිස්සු නැවුම් යුෂ වර්ග පළතුරු මිලට ගැනීම ආරම්භ කළා. පසුගිය වසර දෙකක කාලයක ඉඳලා ඉහත භාණ්ඩ සඳහා වන ඉල්ලුම සියයට 10-15 කින් පමණ ඉහළ යන බවක් අපට පෙනෙන්නට තියෙනවා. මේ වසරේදීත් ඒ විදිහටම ඉල්ලුම ඉහළ යයි කියලා අපි බලාපොරොත්තු වෙනවා. ඒ නිසා ඉල්ලුමට සරිලන ලෙසින් අපි තොග රැස් කරලා තියෙනවා” යැයි ප්‍රධාන පෙළේ සුපිරි වෙළෙඳ සංකීර්ණයක ඉහළ නිලධාරියෙක් “ද පෙනින්සියුලා” පුවත්පතට පවසා ඇත.
“පසුගිය සති දෙකක කාලය තුළ රස කළ බෝතල් බීම සඳහා වන ඉල්ලුම ද ඉහළ ගිහින් තියෙනවා. ඒත් එය නැවුම් පළතුරු යුෂ වර්ග සඳහා වන ඉල්ලුමට වඩා අඩුයි” යැයි ඔහු වැඩිදුරටත් පවසයි. ප්‍රධාන පෙළේ සුපිරි වෙළෙඳ සංකීර්ණ බොහෝමයක්ම විවිධ පළතුරු වර්ගවලට අමතරව ටින් සහ බෝතල් කරන ලද බීම වර්ග මෙන්ම නැවුම් පළතුරු යුෂ ද අලෙවියට තබා ඇත.
පැණි කොමඩු, පත්තක්කා, දොඩම්, අලි පේර, පීච් වැනි පළතුරු මෙන්ම එවැනි පළතුරුවලින් සකස් කරන ලද යුෂ වර්ගවලට සහ නැවුම් යෝගට් සඳහා ද අධික ඉල්ලුමක් ඇති බව ද ඔහු පෙන්වා දෙයි. විශේෂයෙන්ම තම පවුලේ සාමාජිකයන් නොමැතිව කටාර් හි ජීවත් වන පිරිස් අතර රාමදාන් මාසයේ දී කෙටි කෑම සහ පිසින ලද ආහාර වර්ග සඳහා වන ඉල්ලුම ඉහළ යයි.
