ජූලි 1 වැනිදා සිට දේශීය වෙළෙඳපොලේ සාම්ප්‍රදායික වායුසමීකරණ යන්ත්‍ර තහනම් කිරීම සඳහා නැවත වරක් සහන කාලයක් ලබාදෙන ලෙසට ඉදිරිපත්ව ඇති ඉල්ලීම නගර සභා සහ පරිසර අමාත්‍යාංශයේ උසස් නිලධාරියෙකු ප්‍රතික්ෂේප කරයි.
මේ සම්බන්ධයෙන් අදහස් දක්වන අමාත්‍යාංශයේ ප්‍රමිති සහ පිළිවිතරයන් සඳහා වන උප ලේකම් ආචර්ය මොහොමඞ් බින් සායිෆ් අල් කුවාරි පවසන්නේ කටාර් සහ ජීසීසී ප්‍රමිතීන්ට අනුකූල බලශක්ති කාර්යක්ෂම වායුසමීකරණ යන්ත්‍ර ආනයනය කිරීම සඳහා මේ වනවිට වෙළෙන්දන් 20 කට වැඩි සංඛ්‍යාවක් පිළිවිතරයන් සඳහා වන පොදු සංවිධානයේ ලියාපදිංචිය ලබාගෙන ඇති බවයි.
“සාමාන්‍ය වායුසමීකරණ යන්ත්‍ර තොග විශාල වශයෙන් තිබෙන නිසා අවසන් දිනය (ජූලි 1 වැනිදා) දීර්ඝ කරන ලෙසට සමහර වෙළෙඳුන් ලිඛිතව වගේම වාචිකවත් අපෙන් ඉල්ලීම් කර තිබෙනවා. ඒත් අපිට ඒ ගැන තනිවම තීරණයක් ගන්න බැහැ. මොකද කරාමා, පිළිවිතරයන් සඳහා වන පොදු සංවිධානය සහ ආර්ථික සහ වාණිජ අමාත්‍යාංශය ඒකාබද්ධවෙලා තමයි මෙම රෙකුලාසිය පැනෙව්වේ” යැයි අල් කුවාරි පවසයි.
“සාමාන්‍ය වායුසමීකරණ යන්ත්‍ර තොග ඉතිරිවෙලා තියෙන වෙළෙඳුන්ට ඒවා විකුණා ගන්න අපි වසර දෙකකටත් වඩා කාලයක් ලබා දුන්නා. ඒක හොඳටම ප්‍රමාණවත්. මේ වෙලාවේදී ඔවුන් කළ යුත්තේ ඔවුන්ගේ ආනයනික තොග නව රෙකුලාසිවලට අනුකූලව නව්‍යකරණය කිරීමයි” යැයි ඔහු වැඩිදුරටත් පවසයි.
ජූලි 1 වැනිදා සිට වෙළෙඳපොළේ අළෙවි කළ හැක්කේ බලශක්ති කාර්යක්ෂම වායුසමීකරණ යන්ත්‍ර පමණක් බවත්, අවම අවශ්‍යතාවය වන්නේ තරු තුනක් බවත් ඔහු පවසයි. එසේම තරු සළකුණු නොමැති වායුසමීකරණ යන්ත්‍ර රට තුළට රැගෙන ඒමට අවසර නොලැබෙනු ඇත. තරු සළකුණුවලින් වායුසමීකරණ යන්ත්‍රයේ බලශක්ති කාර්යක්ෂමතාවය පෙන්වයි.
සමහර කටාර් වෙළෙඳුන් තරු හතරේ, පහේ සහ හයේ වායුසමීකරණ යන්ත්‍ර සඳහා ලියාපදිංචිය ලබාගෙන ඇතත් මෙම පියවරේදී අවශ්‍ය වන්නේ තරු තුනේ වායුසමීකරණ යන්ත්‍ර පමණක් බවත් ඔහු පවසයි.
“එය දැකලා අපි විශ්මයට පත්වුණා. මොකද අපි ඊළඟ පියවරේදී තමයි වඩා ඉහළ මට්ටමකට යන්න සැළසුම් කරලා තියෙන්නේ” යැයි අල් කුවාරි පවසයි.
“ජූලි 1 වැනිදායින් පස්සේ රටට ඇතුළුවන ස්ථානවල පිහිටා ඇති අපේ කාර්යාල හරහා සියලුම ආනයන පරීක්ෂාවට ලක්කරනවා” ඔහු වැඩි දුරටත් පවසයි. සාමාන්‍ය වායුසමීකරණ යන්ත්‍රවලට සාපේක්ෂව තරු පහේ සහ හයේ යන්ත්‍ර විදුලිය සියයට 50-60 අතර ඉතිරි කරන අතර තරු 3 යන්ත්‍රයක් විදුලිය සියයට 30 කින් ඉතිරි කරන බවද ඔහු පෙන්වා දෙයි.
“තරු අටේ වායුසමීකරණ යන්ත්‍ර පාවිච්චි කරන්නේ ලෝකයේ එකම එක රටයි. ඒ තමයි දකුණු කොරියාව. 2022 වසරේදී අපේ ඉලක්කය ඒක තමයි”
