නව තාක්ෂණයෙන් යුතු ස්මාර්ට් ජංගම දුරකථන සහ ටැබ්ලට් වෙළෙඳපොළට පැමිණීමත් සමග දෝහා නුවර පවත්වාගෙන යන සයිබර් කැෆේ හෙවත් අන්තර්ජාල මධ්‍යස්ථානවල අවසානය උදාවී ඇත.
අන්තර්ජාල මධ්‍යස්ථානවලින් බොහෝමයක් මේ වනවිටත් වසාදමා ඇති අතර තවමත් ඉතිරිව ඇති මධ්‍යස්ථාන කිහිපය සිය ව්‍යාපාරය ආරක්ෂා කරගැනීම සඳහා තමන් ලබාදෙන සේවාවන් විවිධාංගීකරණය කරමින් සිටියි.
මේවායේ ගනුදෙනුකරුවන්ගෙන් බහුතරයක් දෙනා සන්නිවේදනය, විනෝදය සහ වෙනත් අවශ්‍යතා සපුරාගැනීම සඳහා මේ සියල්ල එකවිට ලබාදෙන අඩු මිල ස්මාර්ට් ජංගම දුරකථන වෙත මාරුවී තිබේ.
අන්තර්ජාල මධ්‍යස්ථානවල අවසන් ගමන් වේගවත් කිරීමට බලපා ඇති තවත් හේතුවක් වන්නේ ජාත්‍යන්තර වෙළෙඳ නාම සහිත කෝපි අවන්හල්වල දේශීය ශාඛා හතු පිපෙන්නාක් මෙන් රටපුරාම විවෘත වීමයි. සුපිරි සාප්පු සංකීර්ණ තුළද පවත්වාගෙන යන මෙම අවන්හල් තුළ නොමිලේ වයි-ෆයි සේවාවද ලබාදෙන නිසා ගනුදෙනුකරුවන් ඒවාට ආකර්ෂණය වීම අන්තර්ජාල මධ්‍යස්ථානවල වෙළෙඳාමට දැඩි බලපෑමක් එල්ලකර තිබේ. මීට අමතරව විදුලි සංදේශ සැපයුම්කරුවන්ද තරගකාරි අන්තර්ජාල සහ ඬේටා පැකේජ හඳුන්වා දී ඇති අතර ඉන් අන්තර්ජාල මධ්‍යස්ථාන වෙත එල්ල වී ඇති තර්ජනය සුළු පටු එකක් නොවේ.
“දැන් අපේ කැෆේවලට එන්නේ අඩු ආදායම්ලාභී සේවකන් කිහිපදෙනෙක් විතරයි. ඔවුන් බොහෝවිට මවුරටේ ඉන්න තමන්ගේ පවුලේ සාමාජිකයන් සමග ස්කයිප් සහ ෆේස්බුක් හරහා සම්බන්ධ වෙන අය” යැයි පවසන්නේ ඕල්ඞ් ඝානිම් හි සානා අතුරුමාරුව අසල පවත්වාගෙන යන අන්තර්ජාල මධ්‍යස්ථානයක සේවකයෙකි.
“සමහර විට අලුතින් ස්මාර්ට් ෆෝන් එකක් සහ මොබයිල් ඬේටා පැකේජ් එකක් ගන්න තරම් වත්කමක් ඔවුන්ට නැතිව ඇති. ඒ නිසා තමයි ඔවුන් පවුලේ අයට කතා කරන්න තවමත් අන්තර්ජාල මධ්‍යස්ථානවලට යන්නේ. අපේ සේවාව ඉතාමත් ලාභදායකයි. අපි පැයකට අය කරන්නේ කටාර් රියාල් 5යි. ගනුදෙනුකරුට පුළුවන් කටාර් රියාල් 3කට පැය භාගයක් තෝරගන්න. ඔවුන් විනාඩි 45කට සේවාව ලබගන්නවා නම් අපි අයකරන්නේ කටාර් රියාල් 4යි” යැයි ඔහු පවසයි.
