යුද්ධය ජයග්‍රහණය කළ ද පසුගිය කාලයේ සාමය පරාජය වී තිබුණු බවත්, සාමය දිනා ගැනීමට දැන් අවස්ථාව ලැබී ඇති බවත් හිටපු ජනාධිපති චන්ද්‍රිකා බණ්ඩාරනායක කුමාරතුංග මහත්මිය පැවසුවාය.
යුද්ධයේ අත්දැකීම් අළලා රදිකා පද්මනාදන් තරුණිය ලියූ ‘මාව ම සොයනවා මම එළිය නම් අඳුරේ‘ නම් කෘතිය එළි දැක්වීමේ උළෙලට සහභාගී වෙමින් හිටපු ජනපතිනිය එලෙස කීවාය.
වසර 30ක පමණ යුද්ධයක් පැවැති රටක සාමය දිනා ගැනීම පහසු නොවන බවත්, ආකල්ප වෙනස් කරමින් සාමය ඇති කිරීමට මග පාදා ගත යුතු බවත්, ඒ සදහා රජයේ සහයෝගය ද අත්‍යවශ්‍ය බවත් බණ්ඩාරනායක මහත්මිය සඳහන් කළාය.
ජාතීන් අතර ප්‍රශ්නය හා මෑතකදී නිර්මාණය වූ ආගම් අතර ප්‍රශ්නය විසඳා ගැනීම සඳහා පක්ෂ පාට වැනි පටු බේදවලින් තොරව එකතු වී කටයුතු කරන ලෙස තමා යෝජනා කරන බව ද ඇය කීවාය.
රාධිකා පද්මනාදන් තරුණිය (23) යුද බිමි දිවි ගෙවා ඇති බවත්, ළාමක වියේදී ඊළාම් රාජ්‍යක් උදෙසා අවි දරා ඇති බවත්, ඉන් පසු එම සංවිධානයෙන් රහසිගතව පළා එද්දී වෙඩි වැදී පාදයක් තුවාල වී ඇති බවත්, රොහල් කිහිපයක ප්‍රථිකාර ලැබීමෙන් පසු කොළඹ ජාති රෝහලට මාරු කර ඇති බවත් මෙම කෘතියට හැඳින්වීමක් එක් කරමින් පාර්ලිමේන්තු මන්ත්‍රී වාසුදේව නානායක්කාර මහතා සඳහන් කරයි.
ජාතික රෝහලේ ප්‍රතිකාර කරන සමයේ කාත් කවුරුත් නැතිව දුකින් හා මානසික පීඩනයකින් සිටි බව ද, ඉන් පසු වෛද්‍යවරුන් සහ අනෙකුත් අය සමග සුහද වූ බව ද, රෝහලේ සිටිය දී සිතේ වූ පීඩනය පිට කිරීම සඳහා කවි ලියූ බව ද රාධිකා පද්මනාදන් කීවාය.
මව පියා නැති ඇයට ඉන් පසු මව සහ පියා වී ඇත්තේ සිංහල පුද්ගලයන්ය.
‘යුද්ධෙ ඇතුළේ මොකද වෙන්නේ කියා බොහෝ දෙනෙක් දන්නේ නෑ. ඒ පිඩනය ගැන අනිත් අයටත් දැන ගන්නයි මේ පොත එළි දක්වන්නේ. එදා රෝහලේ සිටිය දී කවි ලිව්වේ පීඩනය දරා ගන්න බැරිවයි. කවි ලියන්න ලියන්න සිත සැහැල්ලු වුණා. අම්මා තාත්තා නැති මට මේ සමාජයෙන් අම්මා තාත්තා වගේ අය ලැබුණා. අද මට ගොඩක් සතුටුයි.‘ යැයි ද රාධිකා පැවසුවාය.
හිටපු ජනාධිපතිනිය ප්‍රධාන මේසයේ සිටිය දී එතැනට අමුත‍්තකු ලෙස ආ වාසුදේව නානායක්කාර මහතාට ද ප්‍රධාන මේසයට එන ලෙස ආරාධිතයන් කතා කළ ද ඔහු පැමිණියේ නැත.
ප්‍රවීන නාට්‍යවේදියකු වන ධර්මසිරි බණ්ඩාරනායක මහතා ද කතාවක් කළේය.
