ඔහු මහරාස්ට්‍රා ප්‍රාන්තයේ විශ්‍රාමික සහකාර රේගු අධ්‍යක්‍ෂකවරයකි. ඔහුගේ බිරිඳ තානා දිස්ත්‍රික්කයේ ප්‍රධාන විදුහලක විදුහල්පතිනියයි. ඔවුන්ගේ එකම දියණිය දුරකථන සමාගමක විධායක නිලධාරිනියකි. ඔවුන් සියලු දෙනා ශ්‍රී ලංකාවේ සංචාරයකට ගොස් නැවත බුම්බායි වලට පැමිණයහ. මෙයට දින කිහිපයකට පෙර රාත්‍රී භෝජන සාදයකදී මා හට ඔවුන් මුණ ගැසිනි.
ලංකාවට වශී වුණ රේගු අධ්‍යක්ෂක සාදය තුළ ශ්‍රී ලංකාව හා ඉන්දියාව සංසන්දනය කළේ මෙසේය.
ඇත්තෙන්ම අපේ දුව මහාචාර්ය ජෙෆ්රි භාවාට හරිම කැමැති. අපිට ඔහු නිර්මාණය කළ පාර්ලිමේන්තුවත් දැකගන්න ලැබුණා. ලංකාදීප එසැණ පුවත්පතේ කතෘ මණ්ඩලය නිසා ජෙෆ්රි භාවා ජිවත් නිවසත් බලා ගන්න ලැබුණා. අපි දියුණු රටවලත් සංචාරය කර තිබෙනවා. ඒ වගේම දකුණු ආසියාවේ රටවලටත් ගිහින් තියෙනවා. ඇත්තටම ඔබේ රට දකුණු ආසියාවේ දියුණුම රට කියන්න පුළුවන්. අපි දුටු දේ එකින් එක කියන්න බැහැ. පාරවල් ටික හොදටම හදලා තියෙනවා. අපි කොළඹ සිට යාල දක්වා ගියා. අපේ රටේ වගේ කන් බිහිරි වෙන තරමට වාහන වල හෝන් හඩ ඇහැන්නේ නැහැ. ඔබ බලන්න අපේ රටේ ආර්ථික නගරය තමයි මුම්බායි. බලන්න පාරවල් වල හැටි, අපිරිසිදුකම, අපේ රට අපි බාල්දු කරනවා නෙමෙයි. වගකීමක් ඇති සේවයක් කිසිම තැනකින් ඉටු වෙන්නේ නැහැ.
කොළඹ ඉදලා යාල යනකම් අපි බැලුවේ ඔබේ රටේ පිරිසිදුකම ගැනයි. බලන්න මුම්බායි වල දුවන හැම වාහනයක්ම වගේ මොකක් හෝ හිරිමකට ලක්වෙලා. නැත්නම් කෑලි නැහැ. ඔබේ රටේ මම දැකපු හැම වාහනයක්ම ලස්සනට තියන් ඉන්නවා. රථවාහන නිතිය හරියට ක්‍රියාත්මක වෙනවා කියලයි මට හිතෙන්නේ. අනික කියන්නම ඕනෑ දෙයක් තමයි ගිලන් රථ, අලුත්ම ගිලන් රථයි පාරේ දුවන්නේ. ඒවා දියුණු රටවල ගිලන් රථ වගෙයි. බලන්න අපේ සමහර රෝහල්වල තියෙන ගිලන් රථ, ඒවා පරණ ඩේලිකා වෑන්. අපේ රටේ හදිසි අවස්ථාවකට රෝහල් කරා යන ගිලන් රථයකට ඉඩදෙන්නේ නැහැ. ඔබේ රටේ මිනිස්සු එහෙම කරනවා මම දැක්කේ නැහැ. අපි තව මාස තුනකින් නැවතත් ඔබේ රටට යනවා. ඒ ගියාම මාතර සිට මුහුදුබඩ දුම්රිය මාර්ගය ඔස්සේ බදුල්ලට යන්න අපි ආසයි.
මහරාස්ට්‍රා ප්‍රාන්තයේ හිටපු සහකාර රේගු අධ්‍යක්ෂක මගේ රට පිළිබඳව සාදයේදී මා සමඟ එසේ වර්ණා කරන විට ඉන්දියාවේ ඉහළ රැකියා වල නියුතු ඉතාලි ප්‍රංශ බෙල්ජියම් හා තවත් ඉන්දියා ජාතිකයෝ පිරිසක් එය අසා සිටියහ.
