(ගයාන් සූරියආරච්චි)
අපරාධ බුද්ධි විශ්ලේෂණ හා නිවාරණ කොට්ඨාසයේ නව අධ්‍යක්ෂවරයා ලෙස විශ්‍රාමික ජ්‍යෙෂ්ඨ පොලිස් අධිකාරී ශානි අබේසේකර මහතා පොලිස් කොමිෂන් සභාවේ අනුමැතිය මත පත්කර ඇති බව පොලිස්පති ප්‍රියන්ත වීරසූරිය මහතා පැවැසීය.
එසේම මේවන විට පාර්ලිමේන්තු මහ මැතිවරණයක් ප්‍රකාශයට පත්කර ඇති අවස්ථාවක ඉහත පත්කිරීම සදහා මැතිවරණ කොමිෂන් සභාවේ පූර්ණ එකගතාවද හිමිව ඇති බව ද පොලිස්පතිවරයා කීය.
ආන්දෝලනාත්මක අපරාධ රැසක පරීක්ෂණ කටයුතුවල නියුතු විමර්ශන නිලධාරියකු ලෙස ශානි අබේසේකර මහතා හැදින්විය හැකි අතර රගර් ක්‍රීඩක තාජුඩීන් ඝාතනය, කොළඹ අවට තරුණයන් 11 දෙනකු පැහරගෙන ගොස් අතුරුදන් කිරිම, භාරත ලක්ෂ්මන් ප්‍රේමචන්ද්‍ර මහතා ඝාතනය, ලසන්ත වික්‍රමතුංග ඝාතනය වැනි අපරාධ ගණනාවක විමර්ශන නිලධාරියෙක් ලෙස අබේසේකර මහතා කටයුතු කළේය.
ශානි අබේසේකර මහතා කීර්තිමත් රහස් පරීක්ෂක නිලධාරියකු ලෙස කටයුතු කළ අතර අපරාධ පරීක්ෂණ දෙපාර්තමේන්තුවේ අධ්‍යක්ෂවරයා ලෙස ද කටයුතු කරනු ලැබීය.
