(බිමල් ශ්‍යාමන් ජයසිංහ සහ ඉන්දිකා රාමනායක)

විදේශගතව සිටින සංවිධානාත්මක අපරාධකරුවකුගේ අනුදැනුම මත අපරාධයක් සිදු කිරීම සඳහා මෝටර් රථයක් තුළ ටී 56 ගිනි අවියක් සඟවාගෙන සිටි පොලිස් විශේෂ කාර්ය බළකායේ වැඩ තහනමට ලක් වූ පොලිස් පරීක්ෂකවරයකු අත්අඩංගුවට ගත් බව මනුෂ්‍ය ඝාතන හා සංවිධානාත්මක අපරාධ විමර්ශන අංශය කියයි.

එම මෝටර් රථය තුළ තිබී  පතුරම් 30 ක් ද පොලිස් භාරයට ගෙන ඇත.

අත්අඩංගුවට ගත් සැකකරු සංවිධානාත්මක අපරාධ කරුවකු වන ගනේමුල්ල සංජීව යන අයගේ ගෝලයකු වන ගම්පහ පැටි මංජු ගේ සහෝදරයකු වන දැනට විදේශගතව සිටින කදමුල්ල ආරච්චිගේ දිනේෂ් වසන්ත යන අයගේ සමීපතමයකු බව පොලිසිය කියයි.

පුද්ගලයකු අපරාධයක් සිදු කිරීම සඳහා ඔහුට අයත් මෝටර් රථයෙන් ගිනි අවි හා පුපුරන ද්‍රව්‍ය ප්‍රවාහනය කරන බවට ලද තොරතුරකට අනුව බුද්ධි හා ආවේෂණ ඒකකයේ ස්ථානාධිපති උපපොලිස් පරීක්ෂක සම්පත් ඇතුළු නිලධාරීන් කණ්ඩායමක්  වැලිපැන්න පොලිස් වසමට ගොස් බුද්ධි ආවේෂණ රාජකාරී සිදු කිරීමෙන් පසු සැකකරු පදිංචි නිවස වෙත ගොස් පරීක්ෂණ සිදුකර ඇතැයි පොලිසිය කියයි.

එහිදී නිවස අසල නවතා තිබූ මෝටර් රථයේ අසුන යට සූක්ෂම ලෙස සඟවා තිබූ ටි 56 ගිනි අවිය සහ 7.62-39 ප්‍රමාණයේ  පතුරම් 30 සොයා ගැනීමෙන් අනතුරුව සැකකරුගෙන් සිදු කළ ප්‍රශ්න කිරීමේදී එයට බලපත්‍රයක් නොමැති බවට අනාවරණය වී ඇත.